যোগ্যতা অৰ্জনৰ দ্বিতীয় ৰাউণ্ডতে অভিযানৰ অন্ত পৰে। ইয়াৰ বাবে উত্তৰ আমেৰিকাত আৰম্ভ হ’বলগীয়া আগন্তুক ফুটবল বিশ্বকাপ (ফিফা বিশ্বকাপ ২০২৬)ত ভাৰতে স্থান নাপালে। কিন্তু তাৰ অৰ্থ এইটো নহয় যে দেশখনৰ একেবাৰে স্পৰ্শ নাথাকিব!
আমেৰিকা, কানাডা আৰু মেক্সিকোৱে আয়োজন কৰা এই ৪৮ দলৰ বিশ্বকাপত ভাৰতীয় মূলৰ কেইবাগৰাকীও ফুটবলাৰ আন দেশৰ জাৰ্চি পিন্ধি খেলপথাৰত নামিব। কোনোবাই নিউজিলেণ্ডৰ মিডফিল্ড চম্ভালিব, কোনোবাই কাটাৰৰ আক্ৰমণত গতি আনিব, কোনোবাই অষ্ট্ৰেলিয়া বা ডেম’ক্ৰেটিক ৰিপাব্লিক অৱ কংগোৰ বাবে গুৰুত্বপূৰ্ণ ভূমিকা পালন কৰিব!
তালিকাৰ আটাইতকৈ চিনাকি নামটো হ’ল ছৰপ্ৰীত সিং। যদিও তেওঁৰ জন্ম ৱেলিংটনত, তেওঁৰ পৰিয়ালৰ শিপা পঞ্জাৱৰ জলন্ধৰত। এই ২৭ বছৰীয়া মিডফিল্ডাৰজনে এসময়ত বায়াৰ্ন মিউনিখৰ হৈ খেলিছিল। পিছলৈ তেওঁ জাৰ্মানী আৰু পৰ্তুগালৰ বিভিন্ন ক্লাবলৈ যাত্ৰা কৰে।
বৰ্তমান তেওঁ ৱেলিংটন ফিনিক্সৰ হৈ খেলি আছে। ২০১৮ চনত নিউজিলেণ্ডৰ হৈ অভিষেক ঘটোৱাৰ পিছত ইতিমধ্যে ২৪খন আন্তঃৰাষ্ট্ৰীয় মেচ খেলিছে। আঁঠুৰ গুৰুতৰ আঘাতৰ পৰা সুস্থ হৈ উঠাৰ পিছত তেওঁ বিশ্বকাপত দলটোৰ মিডফিল্ডত অন্যতম ভৰসা।
তাহচিন মহম্মদ জামশ্বিদো চৰ্চাত আছে। তেওঁক কাটাৰৰ দলত অন্তৰ্ভুক্ত কৰা হৈছে। কেৰালাৰ মালয়ালী পৰিয়ালৰ পুত্ৰ তাহছিনৰ জন্ম কাটাৰত। আল ডুহাইলৰ ফুটবলাৰ ১৯ বছৰীয়া উইংগাৰ। কাটাৰ ষ্টাৰছ লীগত খেলা ভাৰতীয় মূলৰ প্ৰথমজন খেলুৱৈ হিচাপে তেওঁ ইতিহাস ৰচনা কৰে।
অষ্ট্ৰেলিয়াৰ বিশ্বকাপৰ দলত আছে নিশান ভেলুপিল্লাই। জন্ম মেলবৰ্ণত। ২৫ বছৰীয়া ফুটবলাৰগৰাকীৰ পিতৃ মালয়েছিয়ান তামিল বংশৰ, মাতৃ এংলো-ইণ্ডিয়ান। মেলবৰ্ণ ভিক্টোৰীৰ একাডেমীৰ পৰা ওলাই অহা নিশানে ক্লাবটোৰ হৈ ১২৮খন মেচ আৰু ৰাষ্ট্ৰীয় দলৰ হৈ ৬খন মেচ খেলিছে। বিশ্বকাপত অষ্ট্ৰেলিয়াৰ আক্ৰমণত তেওঁৰ ভূমিকা গুৰুত্বপূৰ্ণ।
কংগোৰ হৈ খেলিব চেমুৱেল মুটুছামিয়ে। তেওঁৰ জন্ম পেৰিছত। বয়স ২৯ বছৰ। মিডফিল্ডত খেলে। চেমুৱেলৰ পিতৃ ভাৰতীয় মূলৰ তামিল পৰিয়ালৰ। মাকৰ সূত্ৰে কংগোৰ হৈ খেলাৰ সিদ্ধান্ত লয়। ২০১৯ চনৰ পৰা চেমুৱেলে ইতিমধ্যে ৫৭ খন আন্তঃৰাষ্ট্ৰীয় মেচত অংশ লৈছে।
এই প্ৰসংগত আন এটা নাম চৰ্চালৈ আহিছে। তেওঁ হৈছে নিয়াল মেছন। জন্ম ইংলেণ্ডৰ ব্ৰাইটনত। মাক ভাৰতীয়। কাটাৰৰ প্ৰাৰম্ভিক দলত স্থান লাভ কৰিছিল যদিও শেষত চূড়ান্ত দলত সুযোগ নাপালে। বৰ্তমান কাটাৰ এছ চিৰ হৈ খেলে। পজিচন ডিফেন্স। বিশ্বকাপত নাথাকিলেও ভৱিষ্যতে তেওঁ কাটাৰ জাতীয় দলৰ নিয়মীয়া মুখ হ’ব পাৰে বুলি বহুতে আশাবাদী।
ভাৰতীয় দল বিশ্বকাপত নথকাৰ এয়া নতুন খবৰ নহয়। কিন্তু এই প্ৰতিযোগিতাত ভাৰতীয় মূলৰ চাৰিজন ফুটবলাৰৰ উপস্থিতিয়ে এটা কথা সোঁৱৰাই দিছে যে ফুটবলৰ মানচিত্ৰ বিশ্বকাপৰ বাহিৰত থাকিলেও এই দেশৰ শিপা বিশ্বকাপৰ গভীৰত ৰৈ গৈছে।
