বৃহস্পতিবাৰে মাৰ্ঘেৰিটা মহকুমাৰ লেখাপানী আৰক্ষীৰ জিম্মাত বন্দী হৈছে নৱগঠিত বিদ্ৰোহী সংগঠন মৰান নেশ্যনেল লিবাৰেশ্যেন ফ্ৰন্ট চমুকৈ MNLF ৰ ৪জন সদস্য।
অৰুণাচলৰ দুৰ্গম অঞ্চলত অসম আৰু অৰুণাচল আৰক্ষীৰ যুটীয়া অভিযানত গ্ৰেপ্তাৰ হৈছিল আটাইকেইজন।
সদস্য কেইজন ক্ৰমে মণ্টু মৰাণ ওৰফে ৰক্তিম অসম, প্ৰমোদ চুতীয়া, অবিনাশ চেতিয়া আৰু মধু মৰাণ।
ৰক্তিম মৰাণ পূৰ্বতে আলফা স্বাধীনৰ সদস্য আছিল যদিও পৰৱৰ্তী সময়ত নতুনকৈ গঠন হোৱা বিদ্ৰোহী সংগঠন MNLF ৰ নেতৃত্ব বহন কৰিছিল। মুঠ ৫জন সদস্য আছিল বুলি ৰক্তিম মৰাণে স্বীকাৰ কৰাৰ লগতে তেওঁলোকে ভাৰতৰ স্বাৰ্থত এই সংগঠন জন্ম দিছিল বুলি সংবাদ মাধ্যমদ আগত প্ৰকাশ কৰে।
তেওঁলোক কৰায়ত্ত হোৱাৰ পাছত তেওঁলোকৰ এই সংগঠনৰ যৱনিকা পৰে বুলিও উল্লেখ কৰে।
ইতিমধ্যেই অসম আৰক্ষীয়ে ধৃত চাৰিজনক জেৰা অব্যাহত ৰখাৰ লগতে অধিক তথ্য লাভৰ বাবে তদন্ত অব্যাহত ৰাখিছে বুলি জানিব পৰা গৈছে।
উল্লেখ যে কিছুদিন পূৰ্বে এই সকল সদস্যই অত্যাধুনিক মাৰণাস্ত্ৰ হাতত লৈ থকা ফটো ফেচবুকত ভাইৰেল হৈ পৰিছিল।
ইয়াৰ পাছতে অসম আৰক্ষী, ভাৰতীয় সেনা আৰু অৰুণাচল আৰক্ষীয়ে ইয়াৰ বিৰুদ্ধে অভিযান আৰম্ভ কৰিছিল।
