২৬ জানুৱাৰিৰ দিনটোত গণৰাজ্য দিৱস উদযাপনৰ মাজতে ৰাজ্যখনৰ দুটাকৈ পৃথক স্থানত সংঘটিত পথ দুৰ্ঘটনাত চাৰিজনকৈ লোকে প্ৰাণ হেৰুৱাবলগীয়া হয়। ইয়াৰে প্রথমটো দুৰ্ঘটনা সংঘটিত হয় বকোত য’ত তিনিজন যুৱকে প্ৰাণ হেৰুৱাই আৰু আনটো দুৰ্ঘটনা টিহুত সংঘটিত হয়। আৰু এই দুৰ্ঘটনাত ঘটনাস্থলীতে এজন নিহত হয়।
প্ৰথমটো দুৰ্ঘটনা সংঘটিত হয় কামৰূপ জিলাৰ বকোত। ঘটনাৰ বিৱৰণী মতে শনিবাৰে নিশা বকোৰ বন্দাপাৰাত এ এছ ২৫ ডি চি ৭২৬৭ নম্বৰৰ এখন তীব্ৰ বেগী টাটা ডি আই পিক আপ ভান আৰু এ এছ ০১ এ এইচ ৪০৭৭ নম্বৰৰ এখন মটৰচাইকেলৰ মাজত মুখামুখি সংঘৰ্ষ লাগে। ফলত তিনিজনকৈ যুৱকে ঘটনাস্থলীতে প্ৰাণ হেৰুৱাব লগীয়া হয়।
নিহত তিনিজনৰ ভিতৰত দুজনক ক্ৰমে বিকাশ ৰাভা আৰু চিন্ময় ৰাভা বুলি চিনাক্ত কৰাৰ লগতে আনজনক বাতৰি লিখা পৰলকৈ চিনাক্ত কৰিব পৰা হোৱা নাই বুলি আৰক্ষী সূত্ৰৰ পৰা জানিব পৰা গৈছে।
একেদৰে আনটো দুৰ্ঘটনা সংঘটিত হয় টিহুত। এখন তীব্ৰ বেগী ছুইফট ডিজাইয়াৰ আৰু এখন মাৰতি ৮০০ৰ মাজত হোৱা মুখামুখি সংঘৰ্ষৰ ফলত বিৰাজ চৌধুৰী নামৰ এজন লোক ঘটনাস্থলীতে নিহত হয়। আৰু ৬ জনকৈ লোক দুৰ্ঘটনাটোত গুৰুতৰভাৱে আহত হয়।
দুৰ্ঘটনাটোত নিহত বিৰাজ চৌধুৰী পাঠশালাৰ নিৱাসী বুলি আৰক্ষী সূত্ৰ পৰা জানিব পৰা গৈছে। ইফাল দুৰ্ঘটনাত গুৰুতৰভাৱে আহত সকলক তাৎক্ষণিকভাৱে সমীপৱৰ্তী চিকিৎসালয়লৈ প্ৰেৰণ কৰে।
