বাংলাদেশৰ লালমণিৰহাটত হঠাৎ বৃদ্ধি পাইছে শিয়ালৰ আক্ৰমণ। শিয়ালৰ আক্ৰমণত আহত হৈছে কেইবাজনো লোক। ঘৰচীয়া জন্তু চুৰি কৰি ৰাইজৰ নিদ্ৰা হৰিছে শিয়ালে।
ইফালে লালমণিৰহাটত সংঘটিত হৈছে এক ভয়ংকৰ ঘটনা। শিয়ালৰ আক্ৰমণত আহত হৈছে ৯ জনকৈ লোক।
সম্প্ৰতি আঘাতপ্ৰাপ্ত লোকসকলক লালমনিৰহাট সদৰ চিকিৎসালয়ত ভৰ্তি কৰাৰ লগতে সংকটজনক অৱস্থাত থকা আন দুজন লোকক ৰংপুৰ চিকিৎসা মহাবিদ্যালয় চিকিৎসালয়ত ভৰ্তি কৰোৱা হৈছে।
সোমবাৰে নিশা প্ৰায় ৯ বজাত মহানগৰীৰ ব্যস্ত অঞ্চল মিছন ম’ৰ, চাৰ্কিট হাউচ, পুলিচ লাইন আৰু বট্টালাত সংঘটিত হয় এই ঘটনা।
ইয়াৰে এজন লোকৰ অণ্ডকোষ কাঢ়ি নিয়ে শিয়ালে। জানিব পৰা মতে, শিয়ালৰ কামুৰত জেমছ পিটাৰ শচীন নামৰ এজন শ্ৰমিক নেতাৰ অণ্ডকোষ চিঙি যায়। ইয়াৰ লগতে মোখলেছ নামৰ এজন আদবয়সীয়া লোকৰ কাণো কামুৰি চিঙি পেলায় শিয়ালে। পিছত তেওঁলোকক উদ্ধাৰ কৰি চিকিৎসালয়লৈ লৈ যোৱা হয় আৰু সংকটজনক অৱস্থাত তেওঁলোকক ৰংপুৰ মেডিকেল কলেজ হাস্পতাললৈ প্ৰেৰণ কৰা হয়।
লালমণিৰহাট বন বিভাগৰ এজন বিষয়া মাহবুবুল হকে জানিবলৈ দিয়া মতে, খাদ্যৰ অভাৱ আৰু আশ্ৰয়ৰ অভাৱত শিয়ালকে ধৰি কিছু বন্যপ্ৰাণী স্থানীয় অঞ্চলটোত প্ৰৱেশ কৰিছে। শিয়ালৰ কামোৰত ৯-১০ জন পথচাৰী আহত হোৱা বুলি খবৰ পোৱা গৈছে। এই সন্দৰ্ভত আৰক্ষী প্ৰশাসনক অৱগত কৰা হৈছে আৰু ৰাইজৰ সুৰক্ষাৰ প্ৰতি লক্ষ্য ৰখা হৈছে।
