সামৰণি পৰিল কাটাৰ বিশ্বকাপ। দেওবাৰে সমগ্ৰ বিশ্বই উপভোগ কৰিলে আৰ্জেণ্টিনা-ফ্ৰান্সৰ শিহৰণকাৰী যুঁজ। দুবাৰকৈ পিছ পৰাৰ পাছতো দুৰন্ত প্ৰত্যাৱৰ্তনেৰে যুঁজ দি কাটাৰত দেওবাৰে ফ্ৰান্সে বিশ্ব জয়ৰ লক্ষ্যত আৰ্জেণ্টিনাক বান্ধি ৰাখিলে শেষ মুহূৰ্তলৈকে।
অৱশ্যে পেনাল্টি শ্বুট আউটত ফ্ৰান্সৰ দুগৰাকী খেলুৱৈ পেনাল্টি কাৰ্যকৰী কৰাত ব্যৰ্থ হোৱাত একেলেঠাৰিয়ে দুবাৰকৈ বিশ্বকাপ জয়ৰ আশা ভংগ হয় ফ্ৰান্সৰ। এই আশা ভংগৰ পাছত দলৰ পৰাজয় মানি ল’ব নোৱাৰি ফ্ৰান্সৰ সমৰ্থকসকলে সৃষ্টি কৰে হিংসাত্মক পৰিস্থিতিৰো।
কিন্তু এইবাৰ ফ্ৰান্সৰ ফুটবল অনুৰাগীয়ে আক্ৰমণৰ লক্ষ্য কৰি লৈছে জাতীয় দলৰ ফুটবলাৰসকলকে। বীৰৰ দৰে যুঁজ দি শেষ মুহূৰ্তলৈকে বিশ্বজয়ৰ আশা জীয়াই ৰখা দলৰ তিনিগৰাকী ফুটবলাৰক চূড়ান্ত বৰ্ণবাদী মন্তব্যৰে সামাজিক মাধ্যমত আক্ৰমণ কৰিছে ফৰাচী সমৰ্থকসকলে।
বৰ্ণবাদৰ চিকাৰ হোৱা এই তিনিগৰাকী খেলুৱৈ হৈছে ক্ৰমে চুৱামেনী, মুয়ানি আৰু ক’মান। ফাইনেলৰ এক্সট্ৰা টাইমত ৩-৩ গলত ড্ৰ হৈ থকাৰ সময়তে অন্তিম মিনিটত গল স্ক’ৰ কৰাৰ এক সুৱৰ্ণ সুযোগ লাভ কৰিছিল মুৱানিয়ে।
কিন্তু আৰ্জেণ্টাইন গলৰক্ষক মাৰ্টিনেজে এক চমকপ্ৰদ প্ৰতিহতেৰে আন এক ফৰাচী জাগৰণৰ আশাত চেঁচাপানী ঢালে। আনহাতে বৰ্ণবাদৰ চিকাৰ হোৱা আন দুগৰাকী খেলুৱৈ চুৱামেনী আৰু ক’মান ব্যৰ্থ হৈছিল পেনাল্টি কাৰ্যকৰী কৰাত।
পৰাজয়ৰ হতাশাত ফ্ৰান্সৰ সমৰ্থকসকলে এই তিনিওগৰাকী কৃষ্ণাংগ ফুটবলাৰকে ঘৃণনীয় বৰ্ণবাদী আচৰণৰ লক্ষ্য কৰি লয়। খেলপথাৰত বিশ্বজয়ৰ আকাংক্ষা কঢ়িয়াই অনা তিনিওগৰাকী খেলুৱৈ মুহূৰ্ততে এইসকল সমৰ্থকৰ চকুত হৈ পৰে জাতীয় খলনায়ক।
অৱশ্যে এই বৰ্ণবাদী আক্ৰমণৰ বিৰুদ্ধে থিয় দি তীব্ৰ প্ৰতিবাদ কৰে জাৰ্মান ক্লাৱ বায়াৰ্ন মিউনিখে। দলৰ সদস্য ক’মানৰ ফটো পোষ্ট কৰি জাৰ্মান ক্লাবটোৱে কয় যে, “বায়াৰ্ন মিউনিখে ক’মান লক্ষ্য কৰি প্ৰয়োগ কৰা আক্ৰমণাত্মক ভাষাৰ বিৰুদ্ধে তীব্ৰ প্ৰতিবাদ কৰিছে।”
“আমাৰ সমাজত বৰ্ণবাদৰ কোনো স্থান নাই। এই কঠিন পৰিস্থিতিত আমি ক’মানৰ কাষত থিয় দিছো।”— বায়াৰ্ন মিউনিখে লগতে কয়।
অৱশ্যে ক’মানে এই সমৰ্থন লাভ কৰিলেও বাকী দুগৰাকী খেলুৱৈয়ে প্ৰতিনিধিত্ব কৰা ক্লাবৰ পৰা এনে সমৰ্থন দেখা পোৱা নগ’ল। খেলুৱৈ তিনিগৰাকীৰ সমৰ্থনত এই পৰ্যন্ত কোনো ভাষ্য দিয়াৰ পৰা বিৰত আছে ফ্ৰান্সৰ ফুটবল এছ’চিয়েশ্যনো।
ইফালে তিনিও ফুটবলাৰৰ বিৰুদ্ধে কৰা বৰ্ণবাদী মন্তব্যক লৈ আপত্তি প্ৰকাশ কৰিছে মেটাই। ফেচবুক, ইনষ্টাগ্ৰামৰ দৰে জনপ্ৰিয় ছ’চিয়েল মিডিয়াৰ স্বত্বাধিকাৰী কোম্পানীটোৰ মতে ফুটবল খেলুৱৈক হাৰাশাস্তি কৰা যিকোনো পোষ্ট ডিলিট কৰা হ’ব।
ইয়াৰ সমান্তৰালকৈ এনে কোনো পোষ্ট বা মন্তব্যত কিছুমান বিশেষ শব্দ থাকিলে, সেই মন্তব্য বা পোষ্টটো কোনোৱে দেখা নোপোৱাৰ ব্যৱস্থা গ্ৰহণ কৰিছে কোম্পানীটোৱে। লগতে মেটাই ফুটবলাৰ তিনিগৰাকীয়ে স্বাভাৱিকভাৱে ছ’চিয়েল মিডিয়া ব্যৱহাৰ কৰিব পৰাৰ ব্যৱস্থা গ্ৰহণ কৰাৰো আশ্বাস দিয়ে।
