চাকৰি দিয়াৰ নামত ধন সংগ্ৰহ কৰিবলৈ মুখ্যমন্ত্ৰী হিমন্ত বিশ্ব শৰ্মা আৰু ৰাজ্যৰ মুখ্য সচিব ৰবি কোটাৰ কণ্ঠ নকল কৰাৰ অভিযোগত অসমত এগৰাকী জিলা প্ৰশাসনৰ শীৰ্ষ বিষয়াক গ্ৰেপ্তাৰ কৰা হৈছে। ধেমাজি জিলাৰ উন্নয়ন আয়ুক্ত দেবেশ্বৰ বৰাৰ বিৰুদ্ধে চাকৰি দিয়াৰ লগতে চৰকাৰী সুবিধা প্ৰদান কৰাৰ নামত মানুহৰ পৰা ধন লোৱাৰ অভিযোগ উত্থাপন হৈছে।
আৰক্ষীৰ তথ্য অনুসৰি, দেবেশ্বৰ বৰাই মানুহক সহজে বিশ্বাসত লোৱাৰ বাবে এগৰাকী মিমিক্ৰী শিল্পীক ভাড়াত লৈছিল। সেই শিল্পীগৰাকীয়ে ফোনযোগে কেতিয়াবা মুখ্যমন্ত্ৰী হিমন্ত বিশ্ব শৰ্মাৰ কণ্ঠত, কেতিয়াবা মুখ্য সচিব ৰবি কোটাৰ কণ্ঠত আৰু আন সময়ত অন্য চৰকাৰী বিষয়াৰ পৰিচয় দি লোকসকলৰ সৈতে কথা পাতিছিল।
তদন্তকাৰীসকলৰ মতে, দেবেশ্বৰ বৰাই তেওঁৰ মুখ্যমন্ত্ৰীৰ সৈতে পোনপটীয়া যোগাযোগ আছে বুলি দাবী কৰিছিল। ৰাজ্যৰ শীৰ্ষ প্ৰশাসনিক বিষয়াসকলৰ সৈতেও তেওঁৰ ঘনিষ্ঠ সম্পৰ্ক আছে বুলি কৈছিল। প্ৰয়োজন হ’লে তেওঁলোকৰ সৈতে ফোনযোগে পোনপটীয়াকৈ কথা পাতিব পাৰিব বুলিও লোকসকলক আশ্বাস দিছিল।
এই বিশ্বাস সৃষ্টি কৰাৰ পাছতেই আৰম্ভ হৈছিল তেওঁৰ প্ৰতাৰণাৰ কৌশল। ভাড়াত লোৱা মিমিক্ৰী শিল্পীগৰাকীৰ জৰিয়তে মুখ্যমন্ত্ৰী, মুখ্য সচিব অথবা আন কোনো চৰকাৰী বিষয়াৰ কণ্ঠ নকল কৰি ফোন কৰোৱা হৈছিল। এইদৰে একাংশ লোকৰ বিশ্বাস অৰ্জন কৰি চাকৰি অথবা চৰকাৰী সুবিধা দিয়াৰ নামত মোটা ধন সংগ্ৰহ কৰাৰ অভিযোগ উঠিছে।
এগৰাকী চিকিৎসকে দাখিল কৰা অভিযোগৰ ভিত্তিত ভিজিলেন্সে দেবেশ্বৰ বৰাৰ বিৰুদ্ধে তদন্ত আৰম্ভ কৰিছিল। তদন্তৰ সময়ত তেওঁৰ আয়ৰ সৈতে সামঞ্জস্য নথকা সম্পত্তিৰ সন্ধান লাভ কৰা হয়। সেই তদন্ত আগবঢ়াৰ সময়তে তেওঁৰ প্ৰতাৰণাৰ এই অভিনৱ কৌশলৰ কথাও পোহৰলৈ আহে। ইয়াৰ পাছতে তেওঁক গ্ৰেপ্তাৰ কৰা হয়।
দেবেশ্বৰ বৰা ১৯৯৯ চনৰ অসম অসামৰিক সেৱাৰ বিষয়া। ২০২২ চনৰ পৰা ২০২৫ চনলৈ তেওঁ চিকিৎসা শিক্ষা আৰু গৱেষণা বিভাগৰ সচিব হিচাপে কাৰ্যনিৰ্বাহ কৰিছিল। সেই সময়তো তেওঁৰ বিৰুদ্ধে দুৰ্নীতিৰ অভিযোগ উত্থাপন হৈছিল। শেহতীয়াকৈ তেওঁক ধেমাজি জিলাৰ উন্নয়ন আয়ুক্ত হিচাপে নিযুক্তি দিয়া হৈছিল।
ইফালে, ধেমাজিৰ এগৰাকী নেতাইও দেবেশ্বৰ বৰাৰ বিৰুদ্ধে প্ৰতাৰণাৰ অভিযোগ উত্থাপন কৰিছে। ইয়াৰ পূৰ্বে ২০২০ চনত কোকৰাঝাৰৰ অতিৰিক্ত উপায়ুক্ত হিচাপে কাৰ্যনিৰ্বাহ কৰাৰ সময়তো তেওঁৰ বিৰুদ্ধে ধৰ্ষণৰ অভিযোগ উত্থাপন হৈছিল।
