বুধবাৰে কৰ্ণাটকৰ মুখ্যমন্ত্ৰী হিচাপে শপত গ্ৰহণ কৰে ডি কে শিৱকুমাৰে। শপত গ্ৰহণৰ পিছতেই তেওঁ ৰাজ্যবাসীৰ বাবে কেইবাটাও ডাঙৰ ঘোষণা কৰে। তেওঁ প্ৰতিশ্ৰুতি দিয়ে যে অতি সোনকালেই কৰ্ণাটকৰ ছাত্ৰ-ছাত্ৰীসকলে চৰকাৰী বাছত বিনামূলীয়াকৈ যাতায়াত কৰিব পাৰিব। ইয়াৰ উপৰিও নিবনুৱা যুৱক-যুৱতীসকলৰ কৰ্মসংস্থাপনৰ বাবে এটা বিশেষ কেন্দ্ৰ গঢ়ি তোলা হ’ব। কেৱল সেয়াই নহয়, যুৱ সমাজৰ সৱলীকৰণ আৰু আন্তঃগাঁথনি উন্নয়নৰ খণ্ডতো বৃহৎ পৰিমাণৰ ধন আৱণ্টন দিয়াৰ প্ৰতিশ্ৰুতি প্ৰদান কৰিছে তেওঁ। এই সমগ্ৰ ব্যৱস্থাটোক শিৱকুমাৰে যুৱ যুগ বুলি নামাকৰণ কৰিছে।
বুধবাৰে দায়িত্ব গ্ৰহণ কৰাৰ পিছতেই কৰ্ণাটকৰ নতুন মুখ্যমন্ত্ৰীগৰাকীয়ে মন্ত্ৰীসভাৰ প্ৰথমখন বৈঠকত অংশগ্ৰহণ কৰে। এই বৈঠকত ছাত্ৰ-ছাত্ৰী, চাকৰি বিচাৰি থকা যুৱক-যুৱতী, কৃষক আৰু চহৰ অঞ্চলৰ বাসিন্দাসকলৰ সুবিধাৰ্থে কেইবাটাও গুৰুত্বপূৰ্ণ পদক্ষেপ গ্ৰহণ কৰা হয়। শিৱকুমাৰে স্পষ্ট কৰি দিয়ে যে নিৰ্বাচনৰ সময়ত তেওঁলোকে যিবোৰ প্ৰতিশ্ৰুতি দিছিল, সেয়া তেওঁৰ চৰকাৰে নিশ্চিতভাৱে পূৰণ কৰিব। সাংবাদিকৰ আগত তেওঁ কয় যে প্ৰথমখন মন্ত্ৰীসভাৰ বৈঠকতে জনসাধাৰণক যুৱ যুগ নামৰ এক নতুন উপহাৰ দিয়াৰ সিদ্ধান্ত লোৱা হৈছে। এইবোৰ কেৱল প্ৰতিশ্ৰুতি হৈ নাথাকে, অতি সোনকালেই ইয়াক বাস্তৱায়নো কৰা হ’ব।
মন্ত্ৰীসভাৰ এই প্ৰথমখন বৈঠকত গ্ৰহণ কৰা আন কেতবোৰ গুৰুত্বপূৰ্ণ সিদ্ধান্তৰ ভিতৰত আছে ৰাজ্যখনৰ বিভিন্ন চৰকাৰী বিভাগত ৫৬ হাজাৰ পদত নিযুক্তি প্ৰদান কৰা আৰু ১০ হাজাৰ নতুন যুৱ ক্লাৱ গঠন কৰা। মুখ্যমন্ত্ৰীগৰাকীয়ে জানিবলৈ দিয়া মতে, প্ৰতিটো যুৱ ক্লাৱত ১৫০ ৰ পৰা ২০০ জনকৈ সদস্য থাকিব আৰু চৰকাৰৰ তৰফৰ পৰা প্ৰতিটো ক্লাৱক ১০ লাখ টকাকৈ আৰ্থিক অনুদান আগবঢ়োৱা হ’ব।
