মঙলবাৰে কেন্দ্ৰীয় কেবিনেটে এক অতি গুৰুত্বপূৰ্ণ সিদ্ধান্ত গ্ৰহণ কৰিছে। এতিয়াৰে পৰা ৰাষ্ট্ৰীয় গীত বন্দে মাতৰমক অপমান কৰিলে বা গোৱাত বাধা দিলে কঠোৰ শাস্তি বিহা হ‘ব। ইয়াৰ বাবে ১৯৭১ চনৰ ৰাষ্ট্ৰীয় গৌৰৱ অৱমাননা প্ৰতিৰোধ আইনখন সংশোধন কৰাৰ বাবে কেবিনেটে অনুমোদন জনাইছে বুলি এক চৰকাৰী সূত্ৰই প্ৰকাশ কৰিছে।
বৰ্তমানৰ নিয়ম অনুসৰি ৰাষ্ট্ৰীয় সংগীত জন গণ মন, ৰাষ্ট্ৰীয় পতাকা আৰু ভাৰতৰ সংবিধানক অপমান কৰিলে সৰ্বাধিক তিনি বছৰলৈকে কাৰাদণ্ড বা জৰিমনা অথবা দুয়োটা দণ্ডৰে দণ্ডিত কৰাৰ ব্যৱস্থা আছে। এই আইনখনৰ ৩ নম্বৰ অনুচ্ছেদত স্পষ্টকৈ উল্লেখ আছে যে কোনো লোকে ইচ্ছাকৃতভাৱে ৰাষ্ট্ৰীয় সংগীত গোৱাত বাধা দিলে বা এনে অনুষ্ঠানত খেলিমেলিৰ সৃষ্টি কৰিলে তেওঁক তিনি বছৰৰ জে‘ল বা জৰিমনা বিহা হ‘ব। আইনখন সংশোধন হোৱাৰ পিছত এতিয়া বন্দে মাতৰমৰ ক্ষেত্ৰতো একেই নিয়ম প্ৰযোজ্য হ‘ব।
পশ্চিমবংগত ভাৰতীয় জনতা পাৰ্টীয়ে বিপুল ভোটাধিক্যৰে জয়লাভ কৰাৰ এদিন পিছতেই কেবিনেটে এই ডাঙৰ সিদ্ধান্তটো গ্ৰহণ কৰিছে। উল্লেখযোগ্য যে শেহতীয়া নিৰ্বাচনত বিজেপিয়ে পশ্চিমবংগৰ ২৯৩খন আসনৰ ভিতৰত ২০৭খন আসন লাভ কৰি ৰাজ্যখনত প্ৰথমবাৰৰ বাবে চৰকাৰ গঠন কৰিবলৈ ওলাইছে। ইয়াৰ পিছতেই কেন্দ্ৰীয় চৰকাৰৰ এই পদক্ষেপে বিশেষ তাৎপৰ্য বহন কৰিছে।
বন্দে মাতৰম গীতটি বংকিম চন্দ্ৰ চট্টোপাধ্যায়ে ৰচনা কৰিছিল আৰু ১৮৮০ৰ দশকত তেওঁৰ আনন্দমঠ উপন্যাসত ইয়াক প্ৰকাশ কৰা হৈছিল। ১৯৩৭ চনত ভাৰতীয় জাতীয় কংগ্ৰেছে তেওঁলোকৰ সভাসমূহত এই গীতটোৰ প্ৰথম দুটা স্তৱক গোৱাৰ সিদ্ধান্ত লৈছিল। পৰৱৰ্তী সময়ত স্বাধীন ভাৰতৰ সংবিধানে ইয়াক ৰাষ্ট্ৰীয় গীতৰ মৰ্যাদা প্ৰদান কৰে। অৱশ্যে প্ৰধানমন্ত্ৰী নৰেন্দ্ৰ মোদীয়ে অভিযোগ কৰিছে যে ব্ৰিটিছৰ শাসনকালত মুছলিম লীগত সন্তুষ্ট কৰিবলৈ কংগ্ৰেছ দলে এই গীতটো আধৰুৱাকৈ গোৱাৰ ব্যৱস্থা কৰিছিল।
যোৱা ৬ ফেব্ৰুৱাৰীত কেন্দ্ৰীয় গৃহ মন্ত্ৰালয়ে ৰাজ্য চৰকাৰ আৰু অন্যান্য চৰকাৰী বিভাগসমূহলৈ এক নিৰ্দেশনা জাৰি কৰিছিল। এই নিৰ্দেশনাত কোৱা হৈছিল যে চৰকাৰী অনুষ্ঠানসমূহত বন্দে মাতৰমৰ আটাইকেইটা অৰ্থাৎ ছটা স্তৱক সম্পূৰ্ণকৈ গাব লাগিব। প্ৰায় তিনি মিনিটতকৈ অধিক সময়ৰ এই সম্পূৰ্ণ গীতটোৱে ৰবীন্দ্ৰনাথ ঠাকুৰে ৰচনা কৰা ৰাষ্ট্ৰীয় সংগীততকৈয়ো অধিক অগ্ৰাধিকাৰ পাব বুলি মন্ত্ৰালয়ে জনাইছিল। গৃহ মন্ত্ৰালয়ৰ এই নিৰ্দেশনাসমূহ কেৱল পৰামৰ্শমূলক আছিল আৰু ইয়াৰ কোনো আইনী ভিত্তি নাছিল। কিন্তু এতিয়া কেবিনেটে ১৯৭১ চনৰ আইনখন সংশোধন কৰাৰ সিদ্ধান্ত লোৱাৰ লগে লগে ৰাষ্ট্ৰীয় গীতটোক অপমান কৰাটো এক দণ্ডনীয় আইনী অপৰাধ হিচাপে পৰিগণিত হ‘ব।
