তেলেংগানাৰ নগৰকুৰনুল জিলাত এক চাঞ্চল্যৰ সৃষ্টি কৰা ঘটনা পোহৰলৈ আহিছে। এখন আৱাসিক ছোৱালী বিদ্যালয়ৰ ১৬ বছৰীয়া এগৰাকী ছাত্ৰীয়ে পৰীক্ষা দি থকাৰ মাজতে হঠাৎ পেটৰ বিষত ভুগিবলগীয়া হয়। প্ৰায় এঘণ্টা সময় পৰীক্ষা দিয়াৰ পিছত বিষ অসহ্যকৰ হৈ পৰাত তেওঁৰ পৰিয়ালক খবৰ দিয়া হয়। পৰিয়ালৰ লোকে ততাতৈয়াকৈ কিশোৰীগৰাকীক এখন ব্যক্তিগত চিকিৎসালয়লৈ লৈ যায়। চিকিৎসালয়ৰ চিকিৎসকে স্বাস্থ্য পৰীক্ষাৰ বাবে তেওঁক ওচৰৰে এটা ডায়েগনষ্টিক চেণ্টাৰলৈ পঠিয়াই দিয়ে।
ডায়েগনষ্টিক চেণ্টাৰত স্বাস্থ্য পৰীক্ষাৰ বাবে অপেক্ষা কৰি থকাৰ সময়তে কিশোৰীগৰাকীয়ে মাকৰ সৈতে শৌচাগাৰলৈ যায়। অভিযোগ অনুসৰি সেই শৌচাগাৰৰ ভিতৰতে কিশোৰীগৰাকীয়ে এটি সন্তান জন্ম দিয়ে। আটাইতকৈ ভয়ংকৰ কথাটো হ’ল যে ডায়েগনষ্টিক চেণ্টাৰৰ কৰ্মচাৰীসকলে কিশোৰীগৰাকী আৰু তেওঁৰ মাতৃয়ে নৱজাতকটোক শৌচাগাৰৰ ডাষ্টবিনত পেলাই থৈ যোৱা বুলি দাবী কৰিছে। এই ঘটনাৰ উমান পোৱাৰ লগে লগে কৰ্মচাৰীসকলে আৰক্ষীক খবৰ দিয়ে।
আৰক্ষীয়ে ঘটনাস্থলীত উপস্থিত হৈ নৱজাতকটো উদ্ধাৰ কৰাৰ লগতে ঘটনাটোৰ তদন্ত আৰম্ভ কৰিছে। কিশোৰীগৰাকী এগৰাকী নাবালিকা হোৱাৰ বাবে এই সমগ্ৰ বিষয়টোৱে এতিয়া আইনী জটিলতাৰ সৃষ্টি কৰিছে। আৰক্ষীয়ে বৰ্তমান কিশোৰীগৰাকীৰ পৰিয়ালক সোধা-পোছা অব্যাহত ৰাখিছে আৰু এই গৰ্ভধাৰণৰ আঁৰত কোন ব্যক্তি জড়িত আছে সেই সন্দৰ্ভত তথ্য সংগ্ৰহ কৰিছে। দোষীৰ বিৰুদ্ধে পকচো আইনৰ অধীনত গোচৰ ৰুজু কৰাৰ সম্ভাৱনা আছে।
উল্লেখ্য যে যোৱা মাহতো মধ্যপ্ৰদেশত ঠিক একেধৰণৰ এটা ঘটনা সংঘটিত হৈছিল য’ত এগৰাকী ১৭ বছৰীয়া কিশোৰীয়ে পৰীক্ষা কেন্দ্ৰৰ ভিতৰতে সন্তান জন্ম দিছিল। তেলেংগানাৰ এই ঘটনাই বৰ্তমান সমগ্ৰ দেশতে চৰ্চা লাভ কৰিছে। বিশেষকৈ স্কুলীয়া ছাত্ৰীগৰাকীৰ স্বাস্থ্য আৰু সুৰক্ষাক লৈ বহুতে প্ৰশ্ন উত্থাপন কৰিছে। বৰ্তমান আৰক্ষীয়ে কিশোৰীগৰাকীৰ লগতে তেওঁৰ মাতৃৰ ভাষ্য গ্ৰহণ কৰি সমগ্ৰ ঘটনাৰ সত্যতা নিৰূপণৰ চেষ্টা চলাইছে।
