সমাগত বিটিচি নিৰ্বাচন। এই নিৰ্বাচনক কেন্দ্ৰ কৰি প্ৰধানতঃ বিপিএফ, য়ুপিপিএল, আৰু গণ সুৰক্ষা পাৰ্টীৰ মাজত নিৰ্বাচনত জয়ী হোৱাৰ বাবে ইতিমধ্যে আৰম্ভ হৈ গৈছে প্ৰস্ততি।
বিপিএফে কংগ্ৰেছ আৰু এআইয়ুডিএফৰে সৈতে মিত্ৰতা কৰাক কেন্দ্ৰ কৰি এতিয়া সৰৱ হৈ পৰিছে কোকৰাঝাৰৰ অবড়ো সাংসদ নৱ শৰণীয়া।
শৰণীয়াৰ মতে গণ সুৰক্ষা পাৰ্টী কাৰোৰে সৈতে মিত্ৰতাৰ পক্ষত নাই।
শনিবাৰে দিছপুৰ প্ৰেছ ক্লাৱত এক সংবাদমেল সম্বোধন কৰি এই সন্দৰ্ভত শৰণীয়াই কয় ‘গণ সুৰক্ষা পাৰ্টী কোনো মিত্ৰতাৰ পক্ষতে নাই। মিত্ৰতা কৰিলে সমস্যা সমাধান নহয়।’
ইপিনে, উক্ত সংবাদমেলতে বিপিএফ-য়ুপিপিএলে কোনো কাৰণতে চৰকাৰ গঠন কৰিব নোৱাৰে বুলি দাবী কৰি শৰণীয়াই কয় ‘য়ুপিপিএলৰ কেইখনমান আসনত প্ৰতিদ্বন্দ্বিতা হ’ব যদিও অধিকাংশ আসনতে তেওঁলোকৰ প্ৰাৰ্থী প্ৰতিদ্বন্দ্বিতাত নাহে। বিপিএফৰ বৰ্তমান স্থিতি আগতকৈ সৱল হৈছে যদিও জয়ী হ’ব পৰাকৈ তেওঁলোক সক্ষম হৈ উঠা নাই।’
আনহাতে, উক্ত সংবাদমেলতে বিটিএডিত থকা মুঠ ৩০৮২ খন গাঁৱৰ এজন লোককো বিগত ১৪ বছৰত বিপিএফে চাকৰি দিয়া নাই বুলি অভিযোগ তোলে শৰণীয়াই।
তেওঁ লগতে কয় ‘২০ হেজাৰ লোকক চাকৰি দিব লাগিছিল। কিন্তু ২৪০০ লোককো চাকৰি দিয়া নাই বিটিচিত। প্ৰধানমন্ত্ৰী মোডীয়ে ২ কোটি চাকৰি দিয়াৰ কথা কৈছিল। কিন্তু ৬ বছৰতো এক কোটি লোককো দিয়া হোৱা নাই চাকৰি।‘
তাৎপৰ্যপূৰ্ণভাৱে, উক্ত সংবাদমেলতে বিটিচিত এইবাৰ গণ সুৰক্ষা পাৰ্টীয়ে চৰকাৰ গঠন কৰিব নোৱাৰিলে চিৰদিনৰ বাবে ৰাজনীতিক বিদায় দিবলৈ প্ৰস্তুত বুলি দাবী কৰে শৰণীয়াই।
তেওঁ কয় ‘যদিহে আমাৰ পাৰ্টিয়ে আগন্তুক বিটিচি নিৰ্বাচনত শেষ হাঁহি মাৰিবলৈ সক্ষম নহয় তেতিয়াই মই ৰাজনীতিৰ পৰা বিদায় ল’ম।‘
ইপিনে, সাংসদগৰাকীয়ে চৰকাৰ গঠন কৰাৰ বিষয়ে কোৱাত তেওঁ কিহৰ ভিত্তিত বিটিচিত চৰকাৰ গঠন কৰাৰ দাবী কৰিছে বুলি সাংবাদিকে সোধাত তেওঁ কয়, ‘আজি অবড়ো লোকৰ নামত বিটিচিত ১০ শতাংশ মাটিও নাই। এইবাৰ চৰকাৰ গঠন কৰিব নোৱাৰিলে আমি আৰু নোৱাৰিম। ৮১ শতাংশ লোকে বিটিএডিত অসমীয়া ভাষা কয়।’
