তিহাৰত নিহত হ’ল টিল্লু ওৰফে সুনীল তাজপুৰীয়া। দিল্লীৰ ৰোহিনী আদালতৰ গুলীচালনাৰ গোচৰৰ অভিযুক্ত টিল্লু গুৰুতৰভাৱে আহত হয় এটা জেল গেঙৰ বাবে। আহত টিল্লুক চিকিৎসালয়লৈ লৈ যোৱা হয় যদিও চিকিৎসালয়ত মৃত্যু হয় অভিযুক্ত টিল্লু।
এই ঘটনাৰ পিছতেই এতিয়া তিহাৰ জেলৰ নিৰাপত্তাক লৈ এটা ডাঙৰ প্ৰশ্ন উত্থাপন হৈছে। জানিব পৰা মতে আৰক্ষীৰ সন্মুখত এই ‘গেং ৱাৰ’ সংঘটিত হৈছিল। এই ঘটনাৰ বাবে ইতিমধ্যে নিলম্বন কৰা হৈছে ৯ জন আৰক্ষী জোৱানক।
তিহাৰ কাৰাগাৰত টিল্লুৰ হত্যাকাণ্ডৰ দিনটোৰ চিচিটিভি ফুটেজ ইতিমধ্যে ভাইৰেল হৈ পৰিছে। য’ত দেখা গৈছে ১০ জন আৰক্ষী জোৱানৰ সন্মুখত টিল্লু তাজপুৰীয়াক লোহাৰ ৰডেৰে প্ৰহাৰ কৰা হৈছে। বুকু আৰু পিঠিত আঘাত কৰাৰ লগতে প্ৰায় ১০০ বাৰ ছুৰীৰে আঘাত কৰা হৈছে । এই সকলোবোৰ দৃশ্য আৰক্ষীৰ সন্মুখতে সংঘটিত হৈছে।
ফুটেজটোত দেখা গৈছে যে এই ৰক্তাক্ত যুদ্ধ বন্ধ কৰিবলৈ এজনো আৰক্ষীয়ে কোনো প্ৰচেষ্টা চলোৱা নাই। সকলোৱে নিৰৱ দৰ্শক হিচাপে চাই আছে। এই ১০ জন কৰ্মী তামিলনাডু বিশেষ আৰক্ষী দলৰ সদস্য বুলি জানিব পৰা গৈছে।
ঘটনাৰ চিচিটিভি ফুটেজ পোহৰলৈ অহাৰ পিছতে ৯ জন আৰক্ষীক নিলম্বন কৰা হয়। ইয়াৰ ভিতৰত আছে এজন সহকাৰী বেংক বিষয়া।
তদুপৰি দেখা গৈছে যে টিল্লু তাজপুৰীয়াৰ ৰক্তাক্ত দেহটো কম্বলত মেৰিয়াই কাৰাগাৰৰ কোঠাৰ পৰা তিনিজন আৰক্ষীয়ে উলিয়াই আনিছে। সেই সময়ত আন তিনিজন কয়দী মঞ্জিত মহল, যোগেশ টুণ্ডা আৰু দীপক তিতাৰে আৰক্ষীৰ পৰা টিল্লুৰ আহত দেহ কাঢ়ি লৈ পুনৰ ছুৰীৰে আঘাত কৰিবলৈ ধৰে।
অনুমান কৰা হৈছে যে এই কাম আৰক্ষীক ভাবুকি দি কৰা হৈছিল। একাধিকবাৰ ছুৰীৰে আঘাত পোৱাৰ পিছতো টিল্লু জীয়াই থকা দেখি ৰিয়াজ আৰু ৰাজেশ বাৱানিয়া নামৰ আন দুজন বন্দীয়ে পুনৰ আঘাত কৰিবলৈ ধৰে।
এই হত্যাকাণ্ড পৰিকল্পিত বুলি ধাৰণা কৰা হৈছে। হৰহিমৰ এই ভিডিঅ’টো ওলোৱাৰ লগে লগে আৰক্ষী আৰু তিহাৰ কৰ্তৃপক্ষৰ ভূমিকাক লৈ কেইবাটাও প্ৰশ্ন উত্থাপন হৈছে।
