বৰ্তমান ৰে’লযোগে বৃদ্ধি পাইছে অবৈধ ভাঙৰ সৰবৰাহ ৷ নিতৌ ৰে’লযোগে বহিঃ ৰাজ্যলৈ ন ন কৌশলেৰে দুষ্ট চক্ৰই সৰবৰাহ কৰিছে ভাং ৷
বঙাইগাঁও চহৰৰ নিউ বঙাইগাঁও ৰে’লৱে জংচনত আগৰতলাৰ পৰা বাংগালোৰ অভিমুখী নামনিমুৱা হামছফৰ এক্সপ্ৰেছৰ পৰা ৰে’লৱে আৰক্ষীয়ে বৃহৎ পৰিমাণৰ অবৈধ ভাং জব্দ কৰাৰ লগতে এই ভাং সৰবৰাহৰ লগত জড়িত অজয় ৰয় আৰু আব্দুল মজিদ নামৰ দুজন ব্যক্তিকো আটক কৰে ৷
নিউ বঙাইগাঁও ৰে’লৱে আৰক্ষীয়ে জানিবলৈ দিয়া মতে আগৰতলাৰ পৰা বাংগালোৰ অভিমুখী ১২৫০৩ নম্বৰৰ নামনিমুৱা হামসফৰ এক্সপ্ৰেছযোগে বহি:ৰাজ্যলৈ দুষ্ট চক্ৰই ভাং সৰবৰাহ কৰাৰ গোপন তথ্য লাভ কৰাৰ পিচতে ৰে’লৱে আৰক্ষীয়ে অভিযানৰ বাবে এটা দল গঠন কৰি ৰে’লখন নিশাৰ ভাগত নিউ বঙাইগাঁও জংচনত আহি উপস্থিত হোৱাৰ লগে লগে ৰে’লখনৰ ডবাত তালাচী অভিযান চলায় ৷
এই অভিযানৰ সময়তে ৰে’লখনৰ এটা ডবাত চিটত শুই থকা অজয় ৰয় নামৰ এজন ব্যক্তিৰ ওপৰত সন্দেহ ওপজাত তালাচী চলোৱাত ব্যক্তিজনে ব্যৱহাৰ কৰা গাৰুৰ ভিতৰত চাৰ্টৰ বক্সত গোপনে সৰবৰাহ কৰা অৱস্থাত ভাং জব্দ কৰে ৷ ইয়াৰ পিচতে ব্যক্তিজনক সোধ-পোচ কৰাৰ লগতে তলত থকা দুটা ৰঙৰ ড্ৰামৰ ওপৰত সন্দেহ ওপজে আৰক্ষীৰ ৷ ড্ৰাম দুটাত দৈ আছিল যদিও আৰক্ষীয়ে ভালকৈ চোৱাত ভিতৰত ভাঙৰ পেকেট উদ্ধাৰ কৰে ৷
পিচত ভাং সৰবৰাহকাৰী অজয় ৰয়ক আটক কৰে ৷ সেইদৰে অভিযানকাৰী দলে আন তিনিখন বহা টুলৰ ভিতৰতো গোপনে সৰবৰাহ কৰা অৱস্থাত আৰু ভাং উদ্ধাৰ কৰি জব্দ কৰে ৷
লগতে অভিযানকাৰী দলে আব্দুুল মজিদ নামৰ আন এজন ভাং সৰহৰাহকাৰীকো আটক কৰে ৷ অভিযানকাৰী দলে সকলো মিলাই প্ৰায় ২০ কিলোগ্ৰাম ভাং জব্দ কৰে ৷ ৰে’লৱে আৰক্ষীয়ে জানিবলৈ দিয়া মতে অবৈধভাৱে সৰবৰাহ কৰা ভাংখিনি বিহাৰলৈ লৈ গৈ আছিল ৷ উল্লেখ্য যে শনিবাৰে পুৱাৰ ভাগত নামনিমুৱা কামৰূপ এক্সপ্ৰেছৰ পৰা নিউ বঙাইগাঁও জংচনত আৰ পি এফৰ ৰঙিয়াৰ অপৰাধ শাখাই অভিযান চলাই ২০ কিলোগ্ৰাম অবৈধভাৱে সৰবৰাহ কৰা ভাং উদ্ধাৰ কৰি জব্দ কৰিছিল ৷