লকডাউনৰ ফলত প্ৰায় এক ডেৰ মাহ দিন ধৰি বন্ধ হৈ পৰিছে গোলাঘাটৰ সকলো ব্যৱসায় প্ৰতিষ্ঠান। অন্যান্য সৰু-সুৰা ব্যৱসায়ীৰ লগতে চৰম আৰ্থিক অনাটনত ভোগা চহৰখনৰ কাপোৰ ব্যৱসায়ীসকল সোমবাৰে এই লৈ সোচ্ছাৰ হৈ পৰে।
ক’ভিড পৰিস্থিতিৰ ফলত দিকভ্ৰান্ত হৈ পৰিছে এই সকল কাপোৰৰ ব্যৱসায়ী। যাৰফলত প্ৰশাসনৰ বিৰুদ্ধে এইদৰে প্ৰতিবাদ কৰিবলৈ ওলাই আহে এই ব্যৱসায়ী সকল।
মাহ মাহ ধৰি দোকান বন্ধ থকাৰ ফলত ৰূমৰ ভাড়া, কৰ্মচাৰীৰ দৰমহা প্ৰদান কৰাতো চৰম অসুবিধাৰ সন্মুখীন হৈছে এওঁলোক।
ভূতৰ ওপৰত দানহ পৰাৰ দৰে বৃদ্ধি হৈ থকা লকডাউনৰ ফলত সম্পূৰ্ণৰূপে বন্ধ হৈ পৰিছে আয়ৰ একমাত্ৰ উৎস।
বন্ধ দোকানত এতিয়া এন্দুৰ-নিগনিয়ে বাস লৈছে। একপ্ৰকাৰ এতিয়া দোকানৰ ভিতৰ চৰাত সমস্ত কাপোৰ-কানি, এন্দুৰ – নিগনিয়ে কুটি বিস্তৰ ক্ষতিসাধন কৰাৰো অভিযোগ কৰিছে ব্যৱসায়ী সকলে।
উপায়ন্তৰ হৈ পৰা এই ব্যৱসায়ীসকলে অনতিপলমে জিলা প্ৰশাসনক কিবা ব্যৱস্থা লবলৈ আহ্বান জনাইছে। অন্যথা তেওঁলোকক বিহ দি মাৰি দিবলৈ আহ্বান জনাইছে।যিহেতু গোলাঘাটত বিগত প্ৰায় ডেৰ মাহে সম্পূৰ্ণ লকডাউন চলি আছে।
সময় সাপেক্ষে খাদ্য সামগ্ৰীৰ দোকান খুলিবলৈ দিছে যদিও কাপোৰৰ দোকান সমূহ সম্পূৰ্ণ ৰূপে বন্ধ ৰাখিবলগীয়া হৈছে। ফলত এতিয়া এই সকল কাপোৰ ব্যৱসায়ীৰ পানীত হাঁহ নচৰা এক অৱস্থাৰ সৃষ্টি হৈছে।