অসম লোক সেৱা আয়োগৰ (এপিএছচি)ধনৰ বিনিময়ত চাকৰি কেলেংকাৰিৰ গুৱাহাটী উচ্চ ন্যায়ালয়ে শুকুৰবাৰে এক ন্যায়িক তদন্তৰ নিৰ্দেশ দিয়ে।গুৱাহাটী উচ্চ ন্যায়ালয়ে লগতে এপিএছচিৰ নিলম্বিত অধ্যক্ষ ৰাকেশ পালৰ বিৰুদ্ধে চিবিআই তদন্তৰো নিৰ্দেশ দিয়ে।
ওক্ৰাম প্ৰশান্ত সিঙৰ এক আবেদনৰ শুনানি গ্ৰহণ কৰি গুৱাহাটী উচ্চ ন্যায়ালয়ে অসম চৰকাৰক এমাহৰ ভিতৰতে এপিএছচিৰ কেলেংকাৰিৰ এক তদন্ত কমিটি গঠনৰ নিৰ্দেশ দিয়ে।
অসম চৰকাৰে গুৱাহাটী উচ্চ ন্যায়ালয়ে ২০১৫ চনতে এপিএছচিয়ে নিযুক্তিৰ বাবে অনুষ্ঠিত কৰা পৰীক্ষাৰ খেলিমেলি সন্দৰ্ভত এক ন্যায়িক আয়োগ গঠনৰ বাবে দিয়া নিৰ্দেশ অদ্যাবধি ৰূপায়ন কৰা নাই।
উল্লেখযোগ্য যে ৰাকেশ পালৰ নেতৃত্বত অসম লোক সেৱা আয়োগক চাকৰি প্ৰদানৰ ক্ষেত্ৰত হোৱা বিয়াগোম কেলেংকাৰিৰ বিৰুদ্ধে ৰাজ্যখনত ব্যাপক প্ৰতিবাদী আন্দোলন গঢ়ি উঠিছিল। প্ৰতিবাদকাৰী পক্ষই ৰাকেশ পালৰ বিৰুদ্ধে উত্থাপিত দুৰ্নীতিৰ অভিযোগসমূহৰ এক নিৰপেক্ষ তদন্তৰ দাবী কৰিছিল।
ইতিমধ্যে অসম লোকসেৱা আয়োগৰ দুৰ্নীতিৰ বিৰুদ্ধে বিভিন্ন ব্যক্তিয়ে আদালতত গোচৰ তৰি আহিছে।
চিবিআইয়ে ৰাকেশ পালৰ বিৰুদ্ধে প্ৰাথমিক অনুসন্ধান চলাই আদালতত প্ৰতিবেদন দাখিল কৰিছে। এই প্ৰতিবেদনৰ আধাৰত গুৱাহাটী উচ্চ ন্যায়ালয়ে চিবিআই পৰৱৰ্তী তদন্ত চলাই যোৱাৰ নিৰ্দেশ দিয়ে।
চিবিআইক পালৰ বিৰুদ্ধে উত্থাপিত বিভিন্ন দুৰ্নীতিৰ অভিযোগসমূহৰ লগতে তেওঁৰ নামে-বেনামে থকা সা-সম্পত্তিৰ সম্পৰ্কতো তদন্ত চলাবলৈ ন্যায়ালয়ে নিৰ্দেশ দিছে।
