অসম প্ৰদেশ কংগ্ৰেছ কমিটিয়ে ভয় আৰু শংকামুক্ত এখন অসম গঢ়াৰ সংকল্প লৈ ৰাজ্যজুৰি জনজাগৰণ অভিযান আৰম্ভ কৰিছে। এই উপলক্ষে কাৰ্বি আংলঙৰ হামৰেণত আয়োজিত সংবাদমেলত প্ৰদেশ কংগ্ৰেছৰ সভাপতি গৌৰৱ গগৈয়ে মুখ্যমন্ত্ৰী হিমন্ত বিশ্ব শৰ্মাৰ ওপৰত তীব্ৰ আক্রমণ কৰি কয় বিজেপিৰ ভয়-ভাবুকি ৰ বিৰুদ্ধে ৰাজ্যবাসী এতিয়া জাগ্ৰত হৈছে।
গগৈয়ে অভিযোগ তোলে যে মুখ্যমন্ত্ৰীয়ে কাৰ্বি আংলঙত তুলিৰাম ৰংহাঙক নিজৰ ৰাজত্ব স্থাপন কৰিবলৈ দিছে আৰু ফলত সাধাৰণ ৰাইজৰ উন্নয়নৰ পথ প্ৰায় বন্ধ হৈ পৰিছে। “তুলিৰাম ৰংহাঙৰ সম্পৰ্কীয়সকল ধনী হ’ল, কিন্তু সাধাৰণ লোক পিছ পৰিছে,” বুলিও মন্তব্য কৰে গগৈয়ে।
চাহ উদ্যোগৰ ধ্বংস, ক্ষুদ্ৰ চাহ খেতিয়কৰ কঁকাল ভঙা অৱস্থা আৰু বাঁহ খেতিৰ ক্ষেত্ৰত চৰকাৰৰ অনীহাৰ সমালোচনা কৰি গগৈয়ে কয়, “বিগত ১০ বছৰত বিজেপি চৰকাৰে উদ্যোগ মানে টাটা, আদানি আৰু আম্বানীকহে বুজিছে।” ইয়াৰ উপৰিও তেওঁ সৰ্থেবাৰীৰ কাঁহ উদ্যোগ বন্ধ হৈ যোৱাটো গভীৰ উদ্বেগৰ কাৰণ বুলি উল্লেখ কৰে।
তেওঁ লগতে মুখ্যমন্ত্ৰী হিমন্ত বিশ্ব শৰ্মাক “জনজাতি-বিৰোধী” বুলি আখ্যা দি কয় যে “হিমন্ত বিশ্ব শৰ্মাই তুলিৰাম ৰংহাঙক ছিংগাপুৰত ছ্যুটকেছ দাঙিবলৈ লৈ গৈছিল, তাত কি আছিল মই নাজানো।” তিৱা নেতা ৰমাকান্ত দেউৰীক মুখ্যমন্ত্ৰীয়ে “পুতলাৰ দৰে ব্যৱহাৰ” কৰা বুলি গুৰুতৰ অভিযোগ তোলে গগৈয়ে। তদুপৰি, প্ৰমোদ বড়োৰ ৰাজনৈতিক জীৱনো মুখ্যমন্ত্ৰীয়ে ধ্বংস কৰিছে বুলিও তেওঁ মন্তব্য কৰে।
গগৈৰ মতে, মুখ্যমন্ত্ৰীয়ে ৰাজ্যৰ স্বায়ত্বশাসিত পৰিষদসমূহত নিজৰ হাতৰ মুঠিত ৰাখিব বিচাৰিছে, কাৰ্বি আংলঙত তুলিৰাম ৰংহাঙ আৰু ডিমা হাছাওত দেৱলাল গাৰ্লোছা তাৰ উজ্বল নিদৰ্শন দাঙি ধৰিছে। তেওঁ আৰু কয় যে “জুবিন গাৰ্গৰ মৃত্যুৰ সন্দৰ্ভত মুখ্যমন্ত্ৰীয়েও সত্য গোপন কৰিছে। হত্যাকাণ্ড বুলি কৈছে, কিন্তু কেনেকৈ আৰু কিয় হ’ল, সেইটো ৰাইজক জনোৱা নাই।”
২০২৬ চনৰ নিৰ্বাচনৰ প্ৰাক মুহুৰ্তত গৌৰৱ গগৈয়ে মুখ্যমন্ত্ৰী হিমন্ত বিশ্ব শৰ্মাক প্ৰত্যাহ্বান জনাই কয় যে “আপুনি কৈছিল ১০ ছেপ্টেম্বৰৰ ভিতৰত মোৰ পাকিস্তান সংযোগৰ তথ্য প্ৰকাশ কৰিব। এতিয়ালৈকে সেই তথ্য জনসাধাৰণৰ হাতত কিয় নাই? যদি অভিযোগ সঁচা,প্ৰমাণ কৰক, আৰু মোক গ্ৰেপ্তাৰ কৰক।” আৰু কয় যে বিজেপিৰ ভয় আৰু ভ্ৰমৰ ৰাজনীতি অসমবাসীয়ে নস্যাৎ কৰিব।
