অসমত চলি থকা অবৈধ কয়লা চিণ্ডিকেট সম্পৰ্কত আজি লোকসভাত প্ৰশ্ন উত্থাপন কৰি বিৰোধী উপ-দলপতি তথা কংগ্ৰেছ সাংসদ গৌৰৱ গগৈ ডাঙৰীয়াই কেন্দ্ৰীয় চৰকাৰক প্ৰশ্ন কৰে যে – “কেন্দ্ৰীয় চৰকাৰে এই বিষয়ে অৱগত নে যে এইবৰ্ষৰ ২৫ এপ্ৰিল তাৰিখে ED (Enforcement Directorate) এ এক প্ৰেছ বিজ্ঞপ্তি জাৰি কৰিছিল ! য’ত তেওঁলোকে উল্লেখ কৰিছিল- ED এ অসম আৰু মেঘালয়ৰ ১৫ টাকৈ স্থানত তালাচী অভিযান চলাইছিল। উক্ত প্ৰেছ বিজ্ঞপ্তিতে তেওঁলোকে স্পষ্টকৈ কৈছিল যে অসম আৰু মেঘালয়ৰ অবৈধ কয়লাৰ চিণ্ডিকেট চলি আছে। য’ত বৈধ কয়লা খনিৰ নামত বহু ভুৱা বিল বনাই কৰ ফাঁকি দি কোটি কোটি টকাৰ মুনাফা লুটি আছে।
এনে পৰিপ্ৰেক্ষিতত মই জানিব বিচাৰো যে নিৰ্দিষ্ট মন্ত্ৰালয়ে সম্প্ৰতি কি কৰি আছে? এতিয়ালৈকে কেন্দ্ৰীয় চৰকাৰৰ অনুসন্ধানকাৰী সংস্হাৰ তৰফৰ পৰা কিয় কোনো তদন্ত আৰম্ভ কৰা নাই? কেৱল অভিযান চলাই ধন জব্দ কৰিয়েই দায়িত্ব আৰু বিষয়টো সমাপ্ত কৰিলে নেকি?
অতি গুৰুতৰ দুৰ্নীতিৰ বিষয়টোৰ সন্দৰ্ভত বিভাগীয় মন্ত্ৰণালয়ৰ মৌনতা কেৱল হতাশাজনকেই নহয়, ই দুৰ্নীতি- অন্যায়ক প্ৰশ্ৰয় দিয়াৰ দৰেই হৈছে।
অসমৰ কয়লাৰ এই অবৈধ ব্যৱসায়ৰ দূ্নীতিয়ে দিল্লী আৰু তেলেংগানাৰ বৃহৎ সুৰা কেলেংকাৰীকো চেৰ পেলাব। এনে এক বিয়াগোম দূৰ্নীতিৰ লগত জড়িত সকলৰ বিৰুদ্ধে অনতিপলমে কেন্দ্ৰীয় অনুসন্ধানকাৰী সংস্থাৰ দ্বাৰা উচিত তদন্ত কৰি কৰায়ত্ব কৰিব লাগে। অন্যথা গণতান্ত্ৰিক ব্যৱস্থা আৰু দায়বদ্ধতাৰ প্ৰতি জনগণৰ বিশ্বাস আৰু আস্হাৰ প্ৰতি বিশ্বাসঘাটকতা কৰা হ’ব।
এই বিষয়টো কেৱল মাত্ৰ কয়লাৰ লগতে জড়িত নহয়, ইয়াৰ লগত চৰকাৰৰ দায়বদ্ধতাৰ প্ৰশ্নও জড়িত আছে। প্ৰকৃত সত্যক অস্বীকাৰ কৰাৰ পৰিবৰ্তে স্বীকাৰ কৰি বিহিত গ্ৰহণ কৰাটো চৰকাৰৰ কৰ্তব্য আৰু দায়িত্ব।
