অসমৰ তিনিটা কাৰ্য্যকালৰ মুখ্য মন্ত্ৰী তৰুণ গগৈৰ নশ্বৰ দেহ আজি নৱগ্ৰহ শ্মশানত পঞ্চভূতত বিলীন হৈ যায়।
সম্পুৰ্ণ ৰাষ্ট্ৰীয় মৰ্যদাৰে সন্মান জনোৱাৰ পাছত পুত্ৰ গৌৰৱ গগৈয়ে তৰুণ গগৈৰ নশ্বৰ দেহত মুখাগ্নি কৰি আৱেগিক হৈ পৰে।
‘‘অসমবাসী ৰাইজে দেউতাৰ প্ৰতি যি শ্ৰদ্ধা, মৰম আৰু সন্মান দেখুৱালে তাৰবাবে মই কৃতজ্ঞ। অসমবাসী ৰাইজৰ মৰম আৰু আশীৰ্বাদত দেউতাৰ আত্মাই সদগতি লাভ কৰিছে,’’ আৱেগিক হ’লেও অসমবাসী ৰাইজৰ প্ৰয়াত পিতৃৰ প্ৰতি দেখুওৱা মৰমৰ বাবে গৌৰৱ গগৈ দুখ অনুভৱ নকৰা বুলি উল্লেখ কৰি এনেদৰে কয়।
আনহাতে, গুৱাহাটী চিকিৎসা মহাবিদ্যালয় হস্পিটেলত চিকিৎসাধীন হৈ থকা অৱস্থাত তৰুণ গগৈয়ে তিতাবৰলৈ যাবলৈ বিচাৰিছিল আৰু পাছত সমগ্ৰ অসম ভ্ৰমণ কৰিব বিচাৰিছিল বুলি গৌৰৱ গগৈয়ে কয়।
ইপিনে, সংবাদ মাধ্যমক সম্বোধন কৰিও অসমবাসী ৰাইজৰ সৈতেও প্ৰাক্তন মুখ্য মন্ত্ৰী তৰুণ গগৈয়ে কথা পাতিবলৈ বিচাৰিছিল বুলি পুত্ৰ গৌৰৱে কয়।
‘‘মই পুত্ৰ হিচাপে দেউতাৰ এই তিনিটা অন্তিম ইচ্ছা পুৰণ কৰিবলৈ বিচাৰো। আমি পৰিয়ালৰ সৈতে আলোচনা কৰি দেউতাৰ চিতা ভস্ম তিতাবৰ আৰু সমগ্ৰ অসমলৈ লৈ যোৱাৰ ব্যৱস্থা কৰিম,’’ গৌৰৱ গগৈয়ে সংবাদ মাধ্যমৰ আগত কয়।
আনহাতে, বিগত সময়ছোৱাত অসমৰ সাংবাদিক সকলে গুৱাহাটীলৈ আহিব নোৱাৰা অসমৰ ৰাইজক তৰুণ গগৈৰ অন্তিম যাত্ৰা অশেষ কষ্ট আৰু ত্যাগ স্বীকাৰ কৰি দেখুওৱা বাবেও গৌৰৱ গগৈয়ে ধন্যবাদ জ্ঞাপন কৰে।
আনহাতে, কংগ্ৰেছৰ বিধায়ক, কৰ্মী আৰু জিলা প্ৰশাসনকো গৌৰৱে ধন্যবাদ জ্ঞাপন কৰে।
