গৌৰৱ গগৈৰ পাকিস্তানী লিংকক লৈ মুখ্যমন্ত্ৰী হিমন্ত বিশ্ব শৰ্মা আৰু তেওঁৰ সাংগো-পাংগোসকলে বহু লম্ফজম্ফ কৰিলে। বহু পানী ঘোলা হ’ল। এছ আই টিৰ প্ৰতিবেদন কেন্দ্ৰীয় গৃহমন্ত্ৰালয়লৈ প্ৰেৰণ কৰাৰ কথাও জনোৱা হ’ল। বিষয়টো তাপ মাৰিলে যদিও মাজে মাজে ‘গেৰুৱা টোপ’ আহি থাকিল। কিন্তু এই বিষয়ত ‘জোকৰ মুখত চূণ পৰা’দি আহিল লোকসভা অধ্যক্ষৰ এক সিদ্ধান্ত।
বিশ্বৰ ৬৪ খন দেশলৈ মৈত্ৰীৰ বাৰ্তা দিবলৈ ৭০৩জন সাংসদক প্ৰেৰণ কৰাৰ সিদ্ধান্ত লোৱা হৈছে। বিদেশ কূটনীতিৰ সৈতে সম্পৰ্ক থকা সেই প্ৰতিনিধি দলৰ ভিতৰত ফিলিপাইনছলৈ যাবলগীয়া দলটোৰ নেতৃত্বৰ দায়িত্ব দিয়া হৈছে লোকসভাৰ বিৰোধী উপ দলপতি সাংসদ গৌৰৱ গগৈক। স্বাভাৱিকতে লোকসভাৰ অধ্যক্ষৰ এই সিদ্ধান্তই মুখ্যমন্ত্ৰী হিমন্ত বিশ্ব শৰ্মাৰ নেতৃত্বত অসম বিজেপিৰ ট্ৰোল বাহিনীক নিৰাশ কৰিব।
ইয়াৰ পূৰ্বে পাকিস্তানৰ বিৰুদ্ধে ‘অপাৰেচন সিন্দুৰ’ৰ সফলতাৰ ওপৰত আলোকপাত কৰি সন্ত্ৰাসবাদ বিৰোধী ভাৰতৰ স্থিতিৰ প্ৰচাৰৰ বাবে মোডী চৰকাৰে বিদেশলৈ সাংসদ প্ৰেৰণ কৰিছিল। ৭টা সৰ্বদলীয় প্ৰতিনিধি দলত ৩২খন দেশলৈ গৈছিল ৫৯জন সাংসদ। বিদেশী দেশক নিজৰ কাষলৈ টনাৰ চেষ্টাত ভাৰতে ভুলৰ কোনো ত্ৰুটি ৰখা নাই।
এইবাৰ লোকসভা সচিবালয়ে মৈত্ৰি গঢ়ি তোলাৰ উদ্যোগ লৈছে। এইবাৰ চৰকাৰে নহয়, লোকসভাৰ অধ্যক্ষ ওম বিৰলাই নিজেই উদ্যোগ লৈছে। তেওঁ বিশ্বৰ ৬৪খন দেশলৈ (লোকসভা আৰু ৰাজ্যসভা মিলি) মুঠ ৭০৩জন সাংসদক প্ৰেৰণৰ পৰিকল্পনা কৰিছে।
অৱশ্যে সেই তালিকাত চুবুৰীয়া বাংলাদেশৰ নাম নাই। কিছুদিন পূৰ্বে প্ৰধানমন্ত্ৰীৰ প্ৰতিনিধি হিচাপে ওম বিৰলা বাংলাদেশৰ নতুন চৰকাৰৰ শপত গ্ৰহণ অনুষ্ঠানলৈ গৈছিল। বাংলাদেশৰ প্ৰধানমন্ত্ৰী তাৰিক ৰহমানৰ সৈতেও সাক্ষাৎ কৰে। গতিকে স্বাভাৱিকতে প্ৰশ্ন উত্থাপন হয়, বাংলাদেশৰ সৈতে ভাৰতৰ বন্ধুত্ব বৃদ্ধিৰ কোনো আগ্ৰহ নাই নেকি? নে ভাৰতত প্ৰাক্তন প্ৰধানমন্ত্ৰী শ্বেখ হাছিনাক লুকুৱাই ৰখাটো বাংলাদেশৰ বাবে অস্বস্তিৰ পৰা হাত সাৰিবলৈ চেষ্টা কৰিছে? পাকিস্তানও নাই।
ভাৰত হৈছে সৰ্ববৃহৎ গণতন্ত্ৰ। সেই বাৰ্তা বিদেশত প্ৰেৰণ কৰাৰ উপৰিও ভাৰতীয় সাংসদসকলে বিভিন্ন দেশৰ বিধায়িনী দলৰ সৈতেও মত বিনিময় কৰিব। লোকসভা সচিবালয়ৰ সূত্ৰ অনুসৰি কূটনৈতিক প্ৰভাৱ বৃদ্ধিৰ বাবে এই পদক্ষেপ লোৱা হৈছে। সেয়ে অধ্যক্ষই সংসদীয় মৈত্ৰী গোট গঠন কৰিছে। ৬৪টা গোটত যাব বিজেপি-এনডিএৰ ৩৪৮জন সাংসদ আৰু কংগ্ৰেছকে ধৰি ৩৫৫ জন বিৰোধী সদস্য।
জাপান ভ্ৰমণত প্ৰিয়ংকা গান্ধীৰ নাম আছে যদিও লোকসভাৰ বিৰোধী দলপতি ৰাহুল গান্ধীক কোনো দলতে ৰখা হোৱা নাই। আমেৰিকা, জাপান, শ্ৰীলংকা, জাৰ্মানী, চুইজাৰলেণ্ড আদি ৬৪খন দেশ ভ্ৰমণলৈ সাংসদ পঠোৱাৰ হঠাতে লোৱা সিদ্ধান্তটো কেৱল মৈত্ৰীৰ লক্ষ্যই নে? নে অধ্যক্ষ ওম বিৰলাই বিৰোধীক সন্তুষ্ট কৰিবলৈ চেষ্টা কৰিছে? কিয়নো পক্ষপাতিত্বৰ অভিযোগত তেওঁক অপসাৰণৰ পদক্ষেপ লৈছে বিৰোধীয়ে!
