কেন্দ্ৰীয় চৰকাৰে পাৰমাণৱিক শক্তি খণ্ডত ব্যক্তিগত কোম্পানীসমূহৰ অংশগ্ৰহণৰ বাবে পথ মুকলি কৰাৰ মাত্ৰ দুমাহৰ পাছতে আদানী গ্ৰুপে এই গুৰুত্বপূৰ্ণ খণ্ডত নিজৰ প্ৰৱেশ নিশ্চিত কৰিছে। শেহতীয়াকৈ প্ৰণয়ন কৰা পাৰমাণৱিক শক্তিৰ বহনক্ষম হাৰ্নেছিং এণ্ড এডভান্সমেণ্ট অৱ নিউক্লিয়াৰ এনাৰ্জি ফৰ ট্ৰেন্সফৰ্মিং ইণ্ডিয়া চমুকৈ শান্তি আইনৰ অধীনত দেশত প্ৰথমবাৰৰ বাবে ব্যক্তিগত খণ্ডক পাৰমাণৱিক কেন্দ্ৰ চলোৱাৰ অনুমতি দিয়া হৈছে। এই নতুন আইনৰ সুবিধা গ্ৰহণ কৰি আদানী গ্ৰুপে এই খণ্ডত কাম কৰিবলৈ আনুষ্ঠানিকভাৱে প্ৰস্তুতি সম্পূৰ্ণ কৰিছে।
দ্য হিন্দুৰ এক প্ৰতিবেদন অনুসৰি যোৱা ১২ ফেব্ৰুৱাৰীত আদানী গ্ৰুপে এক নিয়ন্ত্ৰণমূলক ফাইলিঙৰ জৰিয়তে এই নতুন যাত্ৰাৰ কথা ঘোষণা কৰে। নেশ্যনেল ষ্টক এক্সচেঞ্জত দাখিল কৰা তথ্য অনুসৰি আদানী পাৱাৰ লিমিটেডে নিজৰ সম্পূৰ্ণ মালিকানাধীন সহযোগী কোম্পানী হিচাপে আদানী এটমিক এনাৰ্জি লিমিটেড গঠন কৰিছে। এই নতুন সহযোগী কোম্পানীটোৰ জৰিয়তে আদানী গ্ৰুপে এতিয়াৰে পৰা পাৰমাণৱিক শক্তি উৎপাদনৰ দিশত আগবাঢ়িব।
উল্লেখযোগ্য যে যোৱা ডিচেম্বৰ মাহত সংসদৰ দুয়োটা সদনতে শান্তি আইনখন গৃহীত হৈছিল যিয়ে পুৰণি ১৯৬২ চনৰ পাৰমাণৱিক শক্তি আইনখনৰ ঠাই লৈছে। এই নতুন আইনে ব্যক্তিগত খণ্ডক কেৱল পাৰমাণৱিক শক্তি কেন্দ্ৰ নিৰ্মাণ আৰু পৰিচালনাৰ অনুমতি দিয়াই নহয় বৰঞ্চ বিদেশী কোম্পানীসমূহৰ সৈতে কাৰিকৰী সহযোগিতাৰ বাবে যৌথ উদ্যোগ গঠন কৰাৰো সুযোগ দিছে। ইয়াৰ উপৰিও ব্যক্তিগত কোম্পানীসমূহে এতিয়াৰে পৰা ইউৰেনিয়াম সমৃদ্ধিকৰণ আৰু পাৰমাণৱিক ইন্ধন উৎপাদনৰ দৰে গুৰুত্বপূৰ্ণ কাৰ্যটো অংশ ল’ব পাৰিব।
আদানী গ্ৰুপৰ এই পদক্ষেপক লৈ ইতিমধ্যে দেশৰ ৰাজনৈতিক মহলত তীব্ৰ প্ৰতিক্ৰিয়াৰ সৃষ্টি হৈছে। বিৰোধী দল কংগ্ৰেছে চৰকাৰৰ এই সিদ্ধান্তক চোকা সমালোচনা কৰিছে। কংগ্ৰেছৰ জ্যেষ্ঠ নেতা তথা ৰাজ্যসভাৰ সাংসদ জয়ৰাম ৰমেশে চৰকাৰক আক্ৰমণ কৰি কয় যে এই আইনখন কেৱল নিৰ্বাচিত একাংশ পুঁজিপতিৰ স্বাৰ্থৰ বাবেহে খৰখেদাকৈ গৃহীত কৰা হৈছে। তেওঁ এই সন্দৰ্ভত উপহাস কৰি কয় যে শান্তি শব্দৰ প্ৰকৃত অৰ্থ এতিয়া স্পষ্ট হৈ পৰিছে যিটো হ’ল আদানীৰ নিউক্লিয়াৰ টেক ইনিচিয়েটিভ।
আনহাতে কংগ্ৰেছ সাংসদ মনীষ তেৱাৰীয়েও সুৰক্ষাৰ দিশটোৰ ওপৰত গুৰুত্ব দি উদ্বেগ প্ৰকাশ কৰিছে। তেওঁৰ মতে লাভৰ বাবে ব্যক্তিগত খণ্ডক এনে স্পৰ্শকাতৰ আৰু বিপজ্জনক খণ্ডত কাম কৰিবলৈ দিয়াটোৱে জনসাধাৰণৰ স্বাস্থ্য আৰু পৰিৱেশৰ প্ৰতি ভাবুকি কঢ়িয়াই আনিব পাৰে। বিৰোধীৰ মতে চৰকাৰে ব্যক্তিগত খণ্ডক আইনী সুৰক্ষা দি জনসাধাৰণৰ প্ৰতি থকা নিজৰ দায়িত্বৰ পৰা আঁতৰি যাব বিচাৰিছে। যদিও আদানী পাৱাৰৰ তৰফৰ পৰা বৰ্তমানলৈকে এই সমালোচনাৰ কোনো সঁহাৰি পোৱা হোৱা নাই তথাপিও এই পদক্ষেপে দেশৰ শক্তি খণ্ডত এক নতুন বিতৰ্কৰ সূচনা কৰিছে।
