অসমৰ বাবে গৌৰৱৰ আন এক খবৰ কঢ়িয়াই আনিছে গিৰিজানন্দ চৌধুৰী বিশ্ববিদ্যালয়ৰ দুই ছাত্ৰীয়ে। বিশ্ববিদ্যালয়খনৰ গুৱাহাটীৰ চৌহদত বি ফাৰ্ম অধ্যয়ন কৰি থকা চাৰ্লিন মাহালিয়া আৰু প্ৰাচিতা দুৱাৰাই মস্কোত অনুষ্ঠিত হ’বলগীয়া আন্তঃৰাষ্ট্ৰীয় ৰুছপ্ৰেমী আন্দোলনৰ চতুৰ্থ কংগ্ৰেছত ভাৰতক প্ৰতিনিধিত্ব কৰাৰ সুযোগ লাভ কৰিছে।
১৬ আৰু ১৭ ছেপ্টেম্বৰত ৰাছিয়াৰ মস্কোত অনুষ্ঠিত হ’বলগীয়া এই আন্তঃৰাষ্ট্ৰীয় সন্মিলনত অংশগ্ৰহণ কৰিব দুই ছাত্ৰীয়ে। সোমবাৰে গুৱাহাটীৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰৰ পৰা তেওঁলোকে যাত্ৰা আৰম্ভ কৰে। ভাৰতৰ ৩০জনীয়া প্ৰতিনিধি দলৰ সদস্য হিচাপে চাৰ্লিন আৰু প্ৰাচিতাই এই সন্মিলনত অংশ ল’ব।
গিৰিজানন্দ চৌধুৰী বিশ্ববিদ্যালয়ৰ দুই ছাত্ৰীৰ এই বাছনিয়ে বিশ্ববিদ্যালয়খনৰ লগতে অসমলৈও গৌৰৱ কঢ়িয়াই আনিছে। আন্তঃৰাষ্ট্ৰীয় পৰ্যায়ত সাংস্কৃতিক আৰু শৈক্ষিক কাৰ্যসূচীত অসমৰ যুৱ প্ৰজন্মৰ অংশগ্ৰহণ ক্ৰমাৎ বৃদ্ধি পোৱাৰ এক সুন্দৰ উদাহৰণ হিচাপে এই অংশগ্ৰহণক গণ্য কৰা হৈছে।
মস্কোত অনুষ্ঠিত হ’বলগীয়া এই সন্মিলনৰ জৰিয়তে দুই ছাত্ৰীয়ে বিভিন্ন দেশৰ প্ৰতিনিধিৰ সৈতে মত বিনিময় কৰাৰ লগতে ৰাছিয়াৰ ইতিহাস, সংস্কৃতি আৰু ঐতিহ্যৰ বিষয়ে পোনপটীয়াকৈ জানিবলৈ সুযোগ লাভ কৰিব। শিক্ষা, সংস্কৃতি আৰু দুয়োখন দেশৰ জনসাধাৰণৰ মাজৰ সম্পৰ্ক শক্তিশালী কৰাৰ ক্ষেত্ৰতো এই সন্মিলন এক গুৰুত্বপূৰ্ণ আন্তঃৰাষ্ট্ৰীয় মঞ্চ হিচাপে বিবেচিত হৈছে।
আন্তঃৰাষ্ট্ৰীয় ৰুছপ্ৰেমী আন্দোলনে বিভিন্ন দেশৰ ৰাছিয়াৰ ইতিহাস আৰু সাংস্কৃতিক ঐতিহ্যৰ প্ৰতি আগ্ৰহী ব্যক্তি, সংস্কৃতি আৰু বিজ্ঞানৰ সৈতে জড়িত প্ৰতিনিধি, বিশেষজ্ঞ আৰু অন্যান্য নাগৰিকক একত্ৰিত কৰে। এই আন্দোলনৰ মূল উদ্দেশ্য হৈছে বিদেশত ৰাছিয়াৰ ইতিহাস আৰু সাংস্কৃতিক ঐতিহ্য সংৰক্ষণ আৰু জনপ্ৰিয় কৰি তোলা।
চতুৰ্থ কংগ্ৰেছত ইতিহাসৰ স্মৃতি সংৰক্ষণ, পাৰস্পৰিক সন্মান, বন্ধুত্ব আৰু গঠনমূলক আন্তঃৰাষ্ট্ৰীয় মত বিনিময়ৰ ওপৰত গুৰুত্ব আৰোপ কৰা হ’ব। ইয়াৰ লগতে ৰাছিয়াৰ দীৰ্ঘ ইতিহাস, সংস্কৃতি আৰু আধ্যাত্মিক-নৈতিক পৰম্পৰাৰ বিষয়েও আলোচনা হোৱাৰ কথা।
সন্মিলনৰ অন্যতম লক্ষ্য হৈছে আন্তঃৰাষ্ট্ৰীয় মানৱীয় আৰু জনসম্পৰ্ক অধিক শক্তিশালী কৰা, সংস্কৃতি, বিজ্ঞান আৰু বিশেষজ্ঞ মহলৰ মাজত সহযোগিতা বৃদ্ধি কৰা, ইতিহাসৰ স্মৃতি সংৰক্ষণৰ বাবে বিভিন্ন পদক্ষেপক উৎসাহিত কৰা আৰু নতুন প্ৰজন্মৰ মাজত ইতিহাস আৰু সাংস্কৃতিক ঐতিহ্যৰ প্ৰতি সন্মান বৃদ্ধি কৰা।
অসমৰ দুই যুৱ ছাত্ৰী চাৰ্লিন মাহালিয়া আৰু প্ৰাচিতা দুৱাৰাৰ এই অংশগ্ৰহণে ভাৰত-ৰাছিয়া বন্ধুত্ব আৰু সাংস্কৃতিক বুজাবুজি অধিক শক্তিশালী কৰাৰ ক্ষেত্ৰত যুৱ প্ৰজন্মই কেনেদৰে ভূমিকা ল’ব পাৰে, সেই কথাও প্ৰতিফলিত কৰিছে। গিৰিজানন্দ চৌধুৰী বিশ্ববিদ্যালয়ে দুই ছাত্ৰীলৈ সন্মিলনত সফল আৰু সমৃদ্ধ অভিজ্ঞতাৰ বাবে শুভেচ্ছা জ্ঞাপন কৰিছে।
