আমেৰিকাৰ ৰাষ্ট্ৰপতি পদৰ ডেম’ক্ৰেট প্ৰাৰ্থী জো বিডেনৰ লগতে উপ ৰাষ্ট্ৰপতি পদৰ প্ৰাৰ্থী হিচাপে যোৱা বুধবাৰে সন্মুখলৈ আহে কমলা হেৰিছৰ নাম।
কমলা হেৰিছে উইলমিংটনৰ এক অনুষ্ঠানত সদৰী কৰিছে যে তেওঁৰ বাবে তেওঁৰ পৰিয়ালৰ গুৰুত্ব অপৰিসীম।
তেওঁ স্বামী ড’গলাছ এমহ’ফৰ লগতে সন্তান কোলে আৰু এলাৰ পৰিচয়ো দাঙি ধৰে।
সেই একেখন মঞ্চতে হেৰিছৰ স্বামী ড’গলাছ এমহ’ফেও উপৱিষ্ট হৈ সকলোকে অভিবাদন জনায়।
হেৰিছৰ সমৰ্থকসকল এমহ’ফৰ বিষয়ে ভালকৈয়ে অৱগত আৰু তেওঁলোকে দেখিছে কেনেকৈ তেওঁ পত্নীৰ ৰাষ্ট্ৰপতি পদৰ বাবে দৌৰত অতি উৎসাহেৰে সহযোগ কৰিছে।
জো বিডেনে কমলা হেৰিছৰ নাম তেওঁৰ ৰাণিং মেট হিচাপে ঘোষণা কৰাৰ পাছতে তেওঁৰ উৎসাহ প্ৰকাশ কৰি টুইট কৰে।
ড’গলাছ এমহ’ফ গ্ল’বেল আইনী সংস্থা DLA পাইপাৰৰ এগৰাকী পাৰ্টনাৰ আৰু মনোৰঞ্জনমূলক বিষয়ক আইন সম্পৰ্কীয় বৌদ্ধিক সম্পত্তিৰ বিষয়ক বিশেষজ্ঞ। তেওঁ নিজৰ অধিকাংশ সময় লছ এঞ্জেলছ আৰু ৱাশ্বিংটন ডিচিৰ মাজতে কটাই আহিছে।
তেওঁ ছাউথাৰ্ণ কেলিফ’ৰ্ণিয়া য়ুনিভাৰ্ছিটিৰ গ’উলড্ স্কুল অফ ল’ৰ পৰা আইন স্নাতক হোৱাৰ পাছত নব্বৈৰ দশকৰ শেষলৈ নিজেই প্ৰতিষ্ঠাতি হোৱাৰ আগলৈকে এখন স্থানীয় ফাৰ্মত কাম কৰিছিল।
তেওঁ ২০০০চনত নিজৰ সংস্থা মুকলি কৰে যিটো পাছত ২০০৬চনত ভেনেবলে লয়। ২০১৭চনত তেওঁ ভেনেবল ত্যাগ কৰি DLA পাইপাৰৰ এগৰাকী পাৰ্টনাৰ হিচাপে যোগদান কৰে।
ড’গলাছ এমহ’ফ আৰু কমলা হেৰিছৰ প্ৰথম সাক্ষাত হৈছিল ২০১৩চনত। ইয়াৰ এবছৰ পাছতে দুয়ো এক অনুষ্টুপীয়া অনুষ্ঠানৰ জৰিয়তে বিবাহপাশত আৱদ্ধ হয়।
তেওঁলোক দুয়োগৰাকীয়ে ইজনে সিজনৰ সংস্কাৰৰ প্ৰতি শ্ৰদ্ধা ৰাখিছিল। বিয়াত এমহ’ফে হিন্দু পৰাম্পৰা অনুসৰি এডাল মালা পৰিধান কৰিছিল আৰু কমলা হেৰিছেও ইহুদী পৰম্পৰা অনুসৰি এট গিলাচ ভাঙিছিল।
এমহ’ফৰ প্ৰথম বিবাহৰ ফালৰ পৰা দুটা সন্তান আছে-কোলে আৰু এলা। এই দুয়োটিকে হেৰিছে মৰমতে ‘ম’মালা’ বুলি মাতে কিয়নো তেওঁলোকে ‘মাহীমাক’ শব্দটো পছন্দ নকৰে।
এমহ’ফে যোৱা বছৰ এক সাক্ষাৎকাৰত কৈছিল যে তেওঁৰ পত্নীৰ ৰাজনৈতিক জীৱন আছিল ‘অন্তহীন আকৰ্ষণ’।
অহা ৩ নৱেম্বৰত ৰাষ্ট্ৰপতি নিৰ্বাচনত জো বিডেন বিজয়ী হ’লে ভাৰতীয় মূলৰ কমলা হেৰিছ উপ ৰাষ্ট্ৰপতি হোৱাটো নিশ্চিত। আৰু সেয়া হ’লে কমলা হেৰিছৰ স্বামী ড’গলাছ এমহ’ফ হ’ব আমেৰিকা যুক্তৰাষ্ট্ৰৰ প্রথমগৰাকী ‘ছেকেণ্ড জেন্টেলমেন’।