বিধানসভা নিৰ্বাচনৰ প্ৰচাৰ অভিযান তীব্ৰতৰ হৈ পৰাৰ সময়তে মুখ্যমন্ত্ৰী ড° হিমন্ত বিশ্ব শৰ্মাৰ বিৰুদ্ধে সৰৱ হৈ পৰিছে কংগ্ৰেছ নেতা তথা সাংসদ গৌৰৱ গগৈ। মঙলবাৰে যোৰহাটত মুখ্যমন্ত্ৰীৰ পৰিয়াল আৰু আত্মীয়ৰ সৈতে জড়িত প্ৰায় ১২ হাজাৰ বিঘা ভূমিৰ তথ্য অতি শীঘ্ৰেই ৰাজহুৱা কৰিব বুলি হুংকাৰ প্ৰদান কৰাৰ লগতে শিল্পী জুবিন গাৰ্গৰ ন্যায়ৰ প্ৰসংগতো তেওঁ মুখ্যমন্ত্ৰীক তীব্ৰ সমালোচনা কৰে। মুখ্যমন্ত্ৰীয়ে শেহতীয়াকৈ কংগ্ৰেছৰ বিৰুদ্ধে নিৰ্বাচনী স্বাৰ্থত জুবিন গাৰ্গক ব্যৱহাৰ কৰাৰ যি অভিযোগ আনিছিল, তাৰ প্ৰত্যুত্তৰ হিচাপেই কংগ্ৰেছ নেতাজনে এই প্ৰতিক্ৰিয়া ব্যক্ত কৰে।জুবিন গাৰ্গৰ প্ৰসংগটোক কংগ্ৰেছে ৰাজনৈতিক স্বাৰ্থত ব্যৱহাৰ কৰা বুলি মুখ্যমন্ত্ৰীয়ে কৰা অভিযোগৰ প্ৰত্যুত্তৰ দি গৌৰৱ গগৈয়ে কয় যে, খোদ মুখ্যমন্ত্ৰীয়েই পূৰ্বতে কৈছিল যে জুবিন গাৰ্গক ন্যায় প্ৰদান কৰিব নোৱাৰিলে ৰাইজে তেওঁক ভোট দিয়াৰ প্ৰয়োজন নাই। আজি সেই একেগৰাকী মুখ্যমন্ত্ৰীয়েই কংগ্ৰেছক প্ৰশ্ন কৰা কাৰ্য্যক আশ্চৰ্যজনক বুলি অভিহিত কৰি গগৈয়ে প্ৰশ্ন কৰে যে মুখ্যমন্ত্ৰীয়ে এতিয়া জুবিন গাৰ্গক ন্যায় প্ৰদান কৰা হ’ল নে নাই তাৰ উত্তৰ দিব পাৰিবনে।
উল্লেখ্য যে, ইয়াৰ পূৰ্বে গুৱাহাটীত বিজেপিৰ ‘সংকল্প পত্ৰ’ মুকলি কৰি মুখ্যমন্ত্ৰী শৰ্মাই অভিযোগ কৰিছিল যে ‘ইনক্লুছিভ মাইণ্ডছ’ নামৰ এটা ৰাজনৈতিক পৰামৰ্শদাতা প্ৰতিষ্ঠানৰ পৰামৰ্শ মৰ্মে কংগ্ৰেছে নিৰ্বাচনী প্ৰচাৰত জুবিন গাৰ্গৰ প্ৰসংগ বাৰে বাৰে উত্থাপন কৰিছে। আনকি পুনৰ শাসনলৈ আহিলে উক্ত ষড়যন্ত্ৰৰ বাবে প্ৰতিষ্ঠানটোৰ সদস্যসকলক গ্ৰেপ্তাৰ কৰিব বুলিও মুখ্যমন্ত্ৰীয়ে সংবাদ মাধ্যমৰ আগত প্ৰকাশ কৰিছিল।এই ৰাজনৈতিক বাকযুদ্ধৰ মাজতে কংগ্ৰেছ নেতাজনে মুখ্যমন্ত্ৰীৰ বিৰুদ্ধে ভূমি কেলেংকাৰীৰ অভিযোগ উত্থাপন কৰি বিষয়টো আন এক দিশলৈ ঢাল খুৱায়। গগৈয়ে দাবী কৰে যে মুখ্যমন্ত্ৰীৰ পৰিয়ালৰ নামত কেনেদৰে ভূমি অধিগ্ৰহণ কৰা হৈছে সেয়া অসমৰ প্ৰতিগৰাকী ব্যক্তিয়ে অৱগত। মুখ্যমন্ত্ৰী হিমন্ত বিশ্ব শৰ্মা আৰু তেওঁৰ আত্মীয়ৰ সৈতে জড়িত প্ৰায় ১২ হাজাৰ বিঘা ভূমিৰ সবিশেষ কংগ্ৰেছে অতি শীঘ্ৰেই জনসাধাৰণৰ সন্মুখত দাঙি ধৰিব বুলি তেওঁ দৃঢ়তাৰে প্ৰকাশ কৰে।
আনহাতে, নিৰ্বাচন আয়োগৰ ওচৰত তথ্য লুকুৱাই পাকিস্তান আৰু লণ্ডনত গৌৰৱ গগৈয়ে সম্পত্তি গঢ়া বুলি বিজেপিয়ে উত্থাপন কৰা অভিযোগসমূহকো সাংসদগৰাকীয়ে ৰাজনৈতিক উদ্দেশ্যপ্ৰণোদিত আৰু ভিত্তিহীন বুলি নাকচ কৰে। জনসাধাৰণক বিপথে পৰিচালিত কৰিবলৈকে এইধৰণৰ অভিযোগ অনা হৈছে বুলি উল্লেখ কৰি তেওঁ কয় যে কংগ্ৰেছ দলে কেৱল অসমৰ ৰাইজৰ প্ৰকৃত সমস্যামূহ উত্থাপন কৰাতহে মনোনিৱেশ কৰিছে। মুখ্যমন্ত্ৰীৰ প্ৰতি তীব্ৰ কটাক্ষ কৰি গগৈয়ে লগতে কয় যে মুখ্যমন্ত্ৰীৰ ভৰিৰ তলৰ মাটি কঁপিবলৈ আৰম্ভ কৰিছে আৰু সত্য এদিন পোহৰলৈ অহাৰ লগতে ৰাইজে নিজেই প্ৰকৃত বাস্তৱ দেখিবলৈ পাব।
