গোলাঘাটত আজি সদৌ অসম ছাত্ৰ সন্থাৰ জিলা গোটটোৱে এটা প্ৰতিবাদী কাৰ্য্যসূচী গ্ৰহণ কৰি অসম আন্দোলনৰ ফলত লাভ কৰা নুমলীগড় শোধনাগাৰটো ব্যক্তিগত খণ্ডলৈ হস্তান্তৰৰ পৰিকল্পনাৰ ঘোৰ বিৰোধিতা কৰে।
ছাত্ৰ সংগঠনটোৱে নুমলীগড় ৰিফাইনেৰি লিমিটেডৰ প্ৰধান প্ৰৱেশদ্বাৰত দুঘণ্টীয়া প্ৰতিবাদী কাৰ্য্যসূচী ৰূপায়ণ কৰি নৰেন্দ্ৰ মোদী হায়, হায়, নৰেন্দ্ৰ মোদী মুৰ্দাবাদ, সৰ্বানন্দ সোণোৱাল কাম নাই, আদি ধ্বনি দিয়ে।
প্ৰতিবাদী কাৰ্য্যসূচীটো আছুৰ গোলাঘাট জিলাৰ সভাপতি নিৰঞ্জন সোণোৱাল আৰু সাধাৰণ সম্পাদক প্ৰিন্স দলেৰ নেতৃত্বত উলিওৱা হয়।
মোদী চৰকাৰে ভাৰত পে’ট্ৰ’লিয়াম ক’ৰ্পৰেইশ্যন লিমিটেড (বি পি চি এল) নামৰ দেশৰ অন্যতম লাভদায়ক ৰাষ্ট্ৰীয় উদ্যোগটো ব্যক্তিগত খণ্ডলৈ গতাবলৈ কৰা পৰিকল্পনাটোৱে বি পি চি এলৰ অধীন নুমলীগড় শোধনাগাৰ লিমিটেডকো ব্যক্তিগত খণ্ডৰ অধীনলৈ নিব বুলি সংগঠনটোৰ দাবী।
“ব্যক্তিগতকৰণৰ দীৰ্ঘস্থায়ী পৰিণা আছে, ই ৰাজ্যখনৰ অৰ্থনীতিক ক্ষতিগ্ৰস্ত কৰিব আৰু পিছপৰা উত্তৰ-পূবৰ উন্নয়নত প্ৰভাৱ পেলাব। শোধনাগাৰটো স্থাপনৰ উদ্দেশ্যক ই বিফল কৰিব” আছুৰ গোলাঘাট জিলাৰ সহকাৰী সাধাৰণ সম্পাদক মানোৱাৰ হুছেইনে কয়।
কিছুদিন পূৰ্বে গোলাঘাট আছুৱে প্ৰধান মন্ত্ৰী আৰু অসমৰ মুখ্য মন্ত্ৰীলৈ সুকীয়া সুকীয়াকৈ প্ৰেৰণ কৰা স্মাৰক পত্ৰত শংকা প্ৰকাশ কৰি কৈছিল যে যিহেতু এন আৰ এলত বি পি চি এলৰ ৬১.৬৫ শতাংশ অংশীদাৰিত্ব আছে, গতিকে মূল প্ৰতিষ্ঠানটো (বি পি চি এল) ব্যক্তিগতকৰণ কৰিলে ইয়াৰ অধীন প্ৰতিষ্ঠানটোও ব্যক্তিগতকৰণ হৈ পৰিব।
ছাত্ৰ সংগঠনটোৱে কয়, এন আৰ এল ছবছৰীয়া অসম আন্দোলনৰ ফল, যিটো আন্দোলন হৈছিল ৰাজ্যখনত থকা অবৈধ বিদেশীৰ বহিষ্কাৰৰ দাবীত আৰু ৮০০-ৰো অধিক যুৱক চহিদ হৈছিল।
আন্দোলনৰ সমাপ্তি ঘটোৱা অসম চুক্তিখনত এই শোধনাগাৰ স্থাপনৰ চৰ্ত অন্তৰ্ভুক্ত কৰা হৈছিল।
স্থাপন কৰাৰ পিছত ২০০১ চনৰ পৰা ই বৰ্তমানলৈকে ধাৰাবাহিকভাৱে খাৰুৱা তেল শোধনৰ কাম কৰি আহিছে আৰু মূল্যৰ ফালৰ পৰা ইয়াক দেশৰ উল্লেখযোগ্য সম্পদৰ ভিতৰত ধৰা হয়। এতিয়ালৈকে শোধনাগাৰটোৱে দেশ তথা ৰাজ্যলৈ ৩০,০০০ কোটি টকাৰো অধিক ৰাজহৰ বৰঙনি আগ বঢ়াইছে।
সংগঠনটোৱে প্ৰধান মন্ত্ৰী মোদীক কেন্দ্ৰীয় চৰকাৰৰ এই পৰিকল্পনা ত্যাগ কৰিবলৈ দাবী জনাইছে।
