গোলাঘাট আৰক্ষীৰ হাতত গ্ৰেপ্তাৰ হ’ল কুখ্যাত ড্ৰাগছ ব্যৱসায়ী মৃণাল গগৈ ওৰফে জ’জ। গ্ৰেপ্তাৰৰ পিছতে জেললৈ প্ৰেৰণ কৰা হয় কুখ্যাত ড্ৰাগছ ব্যৱসায়ী জ’জক।
এনডিপিএচ আইনৰ অধীনত ২ বছৰ পৰ্য্যন্ত কাৰাগাৰতে দিন কটাব লাগিব গোলাঘাট চানমাৰিৰ ভগা গাঁওৰ নিবাসী মৃণাল গগৈ ওৰফে জ’জে।
জ’জক 21(a)/NDPS আইনৰ অধীনত গ্ৰেপ্তাৰ কৰা হয়। ড্ৰাগছ ব্যৱসায়ী জ’জ সহ দীপজ্যোতি সিংহ আৰু দেবজিত চেতিয়া নামৰ দুজন ড্ৰাগছ ব্যৱসায়ীকো গ্ৰেপ্তাৰ কৰে গোলাঘাট আৰক্ষীয়ে l
উল্লেখযোগ্য যে জজক পূৰ্বেও কেইবাবাৰো আৰক্ষীয়ে গ্ৰেপ্তাৰ কৰি জে’ল হাজোতলৈ প্ৰেৰণ কৰিছিল l কিন্তু প্ৰতিবাৰেই জামিনত জে’লৰ পৰা ওলাই আহি পুনৰ ড্ৰাগছৰ ৰমৰমীয়া ব্যৱসায় চলাই আহিছিল জ’জে।
কুখ্যাত ড্ৰাগছ মাফিয়া জ’জক ২০১৬ চনত ২২(এ)/২৭ এন ডি পি এচৰ অধীনত গ্ৰেপ্তাৰ কৰিছিল আৰক্ষীয়ে। কিন্তু কাৰাগাৰৰ পৰা জামিন লাভ কৰাৰ পাছতে পুনৰ ড্ৰাগছ ব্যৱসায়ৰ লগত জড়িত হৈ পৰে।
ইয়াৰ পাছত পুনৰ গোলাঘাট আৰক্ষীয়ে ৫৬২/২০১৭ গোচৰত ২০(বি) এন ডি পি এচ আইনৰ অধীনত গ্ৰেপ্তাৰ কৰে। কিন্তু এইবাৰো জামিন লাভ কৰিয়েই গোলাঘাট জিলাত ড্ৰাগছৰ ৰমৰমীয়া ব্যৱসায় আৰম্ভ কৰিছিল।
গোলাঘাট আৰক্ষীয়ে জ’জক পুনৰ ৮৮৮/১৮ নম্বৰৰ গোচৰৰ অধীনত ২২/২৭ এন ডি পি এচ আইনৰ অধীনত গ্ৰেপ্তাৰ কৰে যদিও বাৰে বাৰে জামিন লাভ কৰা জ’জয়ে পুনৰ জামিনত আহিয়েই জিলাখনত ভিন্ন প্ৰান্তত ড্ৰাগছৰ অবাধ বেহা গঢ়ি তুলিছিল।
আৰক্ষীৰ বাৰে বাৰে টোপনি হৰণ কৰা জ’জৰ বিৰুদ্ধে গোলাঘাট আৰক্ষীয়ে গৃহ বিভাগক তথ্য সহকাৰে বিষয়টো অৱগত কৰাত নাৰ্কেটিক বৰ্ডৰ অধীনৰ প্ৰিভেনশ্যন অফ ইলিচিট ট্ৰেফিকিং এন ডি পি এচ আইন ১৯৮৮ অধীনত বুধবাৰে গ্ৰেপ্তাৰ কৰি জেললৈ প্ৰেৰণ কৰে।
স্মৰ্তব্য যে, এই আইনৰ অধীনত অপৰাধীয়ে দুবছৰ পৰ্যন্ত কোনো জামিন লাভ কৰিব নোৱাৰে।
