এছিয়ান গেইমছত অভূতপূৰ্ব সাফল্য লাভ কৰি নিজ ৰাজ্যলৈ উভতি অহাৰ পিছত শুকুৰবাৰে ৰাজ্য চৰকাৰৰ উদ্যোগত আয়োজন কৰা বৃহৎ অভিনন্দন অনুষ্ঠানৰ পিছত শনিবাৰে সৰুসজাই ষ্টেডিয়ামৰ প্ৰেক্ষাগৃহত এখন সংবাদমেল সম্বোধন কৰে স্বৰ্ণকন্যা হিমা দাসে।
হিমাই প্ৰথমতে অসমবাসীক ধন্যবাদ জনায়। অসম চৰকাৰক বিশেষভাৱে ধন্যবাদ জনোৱাৰ লগতে, জুবিন গাৰ্গ, অসমৰ ক্ৰীড়া বিভাগ,সৰুসজাই ষ্টেডিয়ামৰ কৰ্মকৰ্তা আৰু তেওঁক বিভিন্ন ধৰণে সহায় কৰা সকলোকে হিমাই ধন্যবাদ জ্ঞাপন কৰে।
হিমাই কয়, ‘’ৰ’দত দৌৰিব লাগিব তেতিয়াহে নতুন খেলুৱৈ ওলাব। আঘাত পাইছো, কিন্তু আঘাত নোপোৱাকৈ কেতিয়াও খেলিব নোৱাৰি।‘’
‘সময় আৰু ভাল কৰিব লাগিব মই,’ বুলি ব্যক্ত কৰি হিমাই কয়, ‘’মই সময়ৰ পিছত দৌৰো, কোনো মেডেলৰ পিছত নদৌৰো।‘’
হিমাই লগতে কয়, ‘’ ৪০০ মিটাৰ দৌৰত বেছিকৈ গুৰুত্ব দিয়া হয় যদিও ২০০ মিটাৰতো গুৰুত্ব দিওঁ।‘’
ইপিনে, চাকৰিৰ বিষয়টো এতিয়া চিন্তা কৰা নাই বুলি জানিব দি ধিং এক্সপ্ৰেছ খ্যাত হিমাই কয়, ‘’অলপ দিন ভাবো, তাৰ পিছত চৰকাৰে দিয়া অ’ফাৰৰ বিষয়ে সিদ্ধান্ত ল’ম।‘’
অসমৰ খেলুৱৈসকলক চৰকাৰে আৰ্থিকভাৱে সহায় কৰা প্ৰয়োজন বুলি মত প্ৰকাশ কৰে এছিয়ান গেইমছত স্বৰ্ণ পদক অৰ্জন কৰা খেলুৱৈগৰাকীয়ে।
সংবাদমেলত দেউতাকৰ পৰা বহু অনুপ্ৰেৰণা লাভ কৰিছিল বুলি উল্লেখ কৰি হিমাই জানিব দিয়ে যে ‘’দেউতাই ভাল ফুটবল খেলিছিল।‘’ ঘৰৰ পৰা ওলাই সৰুসজাই নহাহেঁতেন ইমানখিনি সফলতা অৰ্জন কৰিব নোৱাৰিলেহেঁতেন বুলিও হিমাই অকপটে স্বীকাৰ কৰে।
আনহাতে, জুবিনক বহুত ভাল লাগে বুলি ব্যক্ত কৰি হিমাই কয়,’’ জাকাৰ্টাত জুবিন গাৰ্গ, লক্ষজ্যোতি কোঁৱৰ আৰু অন্য বহুকেইগৰাকী অসমীয়াই উদগনি যোগোৱাৰ বাবে সফল হ’ব পাৰিলো।‘’
প্ৰৱল আত্মবিশ্বাস আৰু দৃঢ় প্ৰত্যয়েৰে হিমাই কয়, ‘’অসমবাসীয়ে কেৱল আশীৰ্বাদ দিয়ক বাকী মই কেনেকৈ মেডেল আনিব লাগে আনিম।‘’
কনটিনেনটেল কাপত ভৰিত আঘাত পোৱাৰ বাবে অংশগ্ৰহণ কৰিব নোৱাৰা হিমা ৪০০ মিটাৰ দৌৰত বৰ্তমান বিশ্বৰ ৫২ নম্বৰ স্থানত আছে। আগৰ ৫১ গৰাকীক পিছ পেলোৱাৰ বাবে চেষ্টা অব্যাহত ৰাখিব বুলি দৃঢ়তা প্ৰকাশ কৰে হিমাই।
খেলুৱৈৰ ভিতৰত শচীন তেণ্ডুলকাৰ আৰু লিঅ’নেল মেচিক বহুত ভাল পায় হিমাই।
আনহাতে আই অ’ এছ কোম্পানীয়ে স্প’ন্সৰ কৰাৰ কথা জানিব দি খেলুৱৈগৰাকীয়ে ইতিমধ্যে ২ বছৰৰ বাবে চুক্তিবদ্ধ হৈছে বুলি সদৰী কৰে।
তাৎপৰ্যপূৰ্ণভাৱে অতি কৌশলেৰে আজি হিমাই সংবাদমেলত ব্যক্ত কৰে যে অলিম্পিকত জয়ী হৈ অহাৰ পিছত সকলো চেনেললৈ তেওঁ নিজে সাক্ষাৎকাৰ দিবলৈ যাব।