মঙলবাৰে পুৱাৰ পৰা গুগলৰ প্লে ষ্টৰত পুনৰ উপলব্ধ হৈছে জনপ্ৰিয় মেছেজিং এপ টেলিগ্ৰাম। কেন্দ্ৰীয় চৰকাৰে এই এপটোৰ ওপৰত আৰোপ কৰা সাময়িক নিষেধাজ্ঞা ২২ জুনৰ মাজনিশা অন্ত পৰাৰ পিছতে গুগলে এই পদক্ষেপ গ্ৰহণ কৰিছে। অৱশ্যে গুগলে এপটো প্লে ষ্টৰলৈ ঘূৰাই অনাৰ পূৰ্বেও কিছুমান পুৰণি ব্যৱহাৰকাৰীয়ে ইয়াক ব্যৱহাৰ কৰিবলৈ সক্ষম হৈছিল।
আনহাতে, পুৱা প্ৰায় ১০ বজালৈকে এপলৰ এপ ষ্টৰত টেলিগ্ৰাম উপলব্ধ হোৱা নাছিল। এই সন্দৰ্ভত জানিবলৈ এপললৈ ইমেইলযোগে প্ৰশ্ন প্ৰেৰণ কৰা হৈছিল যদিও তেওঁলোকৰ পৰা তাৎক্ষণিকভাৱে কোনো সঁহাৰি পোৱা নগ’ল। চৰকাৰী সূত্ৰৰ পৰা জানিব পৰা মতে চৰকাৰে ২২ জুনলৈকে টেলিগ্ৰামৰ ওপৰত যি সম্পূৰ্ণ নিষেধাজ্ঞা আৰোপ কৰিছিল, সেই নিৰ্দেশনাত কোনো সালসলনি কৰা হোৱা নাই বা ইয়াৰ সময়সীমাও বৃদ্ধি কৰা হোৱা নাই।
উল্লেখ্য যে নিট পৰীক্ষাৰ ভুৱা প্ৰশ্নকাকত বিয়পোৱা কাৰ্য ৰোধ কৰাত ব্যৰ্থ হোৱা, বিভ্ৰান্তিকৰ তথ্য প্ৰচাৰ কৰা আৰু পৰীক্ষা প্ৰক্ৰিয়াত প্ৰভাৱ পেলোৱা অন্যান্য বেয়া কামবোৰৰ বাবেই চৰকাৰে টেলিগ্ৰাম নিষিদ্ধ কৰাৰ নিৰ্দেশ দিছিল। এই নিষেধাজ্ঞা লগোৱাৰ পূৰ্বে যোৱা ৩ জুনত চৰকাৰী বিষয়াসকলে টেলিগ্ৰামৰ কৰ্তৃপক্ষৰ সৈতে আলোচনাত মিলিত হৈ এই উদ্বেগসমূহ প্ৰকাশ কৰিছিল। ইয়াৰ পিছতে কেন্দ্ৰীয় চৰকাৰে ২২ জুনলৈকে এপটোৰ লগতে ইয়াৰ ৱেব সংস্কৰণ আৰু লিংকসমূহ বন্ধ কৰাৰ সিদ্ধান্ত লৈছিল।
ইয়াৰ উপৰিও চৰকাৰে অহা ৩০ জুনলৈকে টেলিগ্ৰামত মেছেজ সলনি বা এডিট কৰিব পৰা সুবিধাটো বন্ধ ৰাখিবলৈ কঠোৰ নিৰ্দেশ দিছে। আনহাতে, যোৱা ২১ জুনত নিট পৰীক্ষা পুনৰ শান্তিপূৰ্ণভাৱে অনুষ্ঠিত কৰা হয় আৰু বৰ্তমানলৈকে এই পৰীক্ষাত কোনো ধৰণৰ বেমেজালি বা প্ৰতাৰণামূলক কামৰ খবৰ পোৱা হোৱা নাই।
