তামিলনাডু বিধানসভা নিৰ্বাচনত অভূতপূৰ্ব সফলতা লাভ কৰাৰ পিছত অভিনেতা-ৰাজনীতিবিদ বিজয় ক্ষমতা দখল কৰাৰ পৰা ‘এখোজ দূৰত’ আছিল। কিন্তু শেষ মুহূৰ্তৰ ৰাজনৈতিক সমীকৰণত ই ‘নাটকীয় ক্লাইমেক্স’ হৈয়েই থাকিল।
সংখ্যাগৰিষ্ঠতা প্ৰমাণ কৰিবলৈ প্ৰয়োজনীয় ১১৮ জন বিধায়কৰ সমৰ্থন অবিহনে বিজয়ক মুখ্যমন্ত্ৰী হিচাপে শপত গ্ৰহণ কৰিবলৈ দিয়া সম্ভৱ নহয় বুলি স্পষ্ট কৰি দিছে ৰাজ্যপাল আৰ ভি আৰ্লেকাৰে। ফলত শনিবাৰে অৰ্থাৎ আজি বিজয়ে মুখ্যমন্ত্ৰী হিচাপে শপত গ্ৰহণ কৰা হৈ নুঠিল।
২৩৪ আসনৰ তামিলনাডু বিধানসভাত মেজিক ফিগাৰ ১১৮। বিজয়ৰ দল তামিলাগা ভেত্ৰী কাঝাগামে ১০৮খন আসন লাভ কৰি নিজৰ আধিপত্য প্ৰদৰ্শন কৰিছে যদিও চৰকাৰ গঠনৰ বাবে আৰু ১০ জন বিধায়কৰ সমৰ্থনৰ প্ৰয়োজন।
কংগ্ৰেছে নিজৰ ৫ জন বিধায়কৰ সৈতে বিজয়ক সমৰ্থন জনোৱাৰ কথা ঘোষণা কৰিছিল যদিও শেষ মুহূৰ্তত আই ইউ এম এল (IUML) আৰু টি টি ভি দিনাকৰণৰ এ এম এম কেয়ে(AMMK)বিজয়ক পিঠি দিছে। ৰাজভৱনৰ সূত্ৰ অনুসৰি বিজয়ৰ হাতত বৰ্তমান ১১৬ জন বিধায়কৰ সমৰ্থন আছে, যিটো লক্ষ্যতকৈ ২ জন কম। ফলত এই পৰিস্থিতিত তামিলনাডুত চৰকাৰ গঠন আজি সম্ভৱ নহয়।
১০০ খনতকৈও অধিক আসন লাভ কৰাৰ পাছতো যে যাদুকৰী সংখ্যাটো লাভ কৰিব পৰা নাই সেয়া দেখি টিভিকে-ই বাওঁপন্থী আৰু কংগ্ৰেছৰ পৰা সহায় বিচাৰে। প্ৰথম অৱস্থাত দুয়োটা দলৰ কোনো এটাই আগ্ৰহ প্ৰকাশ কৰা নাছিল যদিও দুদিন পিছত কংগ্ৰেছে পুৰণি মিত্ৰতা ভংগ কৰি টিভিকেৰ কাষত থিয় দিছিল। সূত্ৰ অনুসৰি তেওঁলোকৰ ৫ জন বিধায়কক হায়দৰাবাদৰ এখন ৰিজ’ৰ্টলৈ স্থানান্তৰ কৰা হৈছে যাতে ‘হৰ্ছ ট্ৰেডিং’ নহয়।
আনহাতে, আই ইউ এম এলে এখন পত্ৰত উল্লেখ কৰিছে যে তেওঁলোক টিভিকেৰ মিত্ৰতাত নাই। পুনৰ এএমএমকেৰ মুৰব্বী টিটিভি দিনাকৰনে ৰাজ্যপাললৈ পত্ৰ লিখি বিজয় নহয় এআইএডিএমকে চৰকাৰ গঠনৰ আহ্বান জনায়। বিজয়ে দাখিল কৰা সমৰ্থন পত্ৰত স্বাক্ষৰ ভুৱা হ’ব পাৰে বুলি দাবী কৰে দিনাকৰনে।
বিগত দুদিনত দুবাৰকৈ ৰাজ্যপালক সাক্ষাৎ কৰিছে বিজয়ে। তেওঁ দাবী কৰে যে তেওঁৰ ওচৰত ১১৮ জন লোকৰ সমৰ্থন আছে। কিন্তু গৱৰ্ণৰ আৰ্লেকাৰে স্পষ্ট কৰি দিছে যে তেওঁ কোনো মৌখিক দাবীত পতিয়ন নাযায়; তেওঁ ১১৮ জন বিধায়কৰ স্বাক্ষৰৰ সৈতে সমৰ্থন পত্ৰ দাখিল কৰাৰ পিছতহে শপত গ্ৰহণৰ তাৰিখ ঘোষণা কৰিব।
এই ৰাজনৈতিক অস্থিৰতাৰ মাজতে বিজয়ৰ দলৰ বিধায়িকা মেৰী উইলছন এতিয়াও এই মিত্ৰতাক লৈ আশাবাদী। সংবাদ মাধ্যমৰ আগত তেওঁ কয় যে বিজয়ে আজি ৰাতি ভাল খবৰটো দিব আৰু তেওঁ কেৱল ৫ বছৰৰ বাবেই নহয় ভৱিষ্যতৰ বাবেও মুখ্যমন্ত্ৰী হ’ব।
উল্লেখ্য যে বিজয়ৰ উত্থানে ডি এম কে আৰু এ আই এ ডি এম কেৰ ৬২ বছৰীয়া দ্বিমেৰু ৰাজনীতিক কঁপাই তুলিছে। কিন্তু এই দুগৰাকী বিধায়কৰ অভাৱ চৰকাৰ গঠনৰ পথত বিজয়ৰ বাবে এক ডাঙৰ প্ৰত্যাহ্বান হৈ পৰিছে।
আনহাতে, বাওঁপন্থী দলসমূহে (চিপিআই আৰু চিপিএম) বাহিৰৰ পৰা সমৰ্থনৰ কথা কৈছে যদিও কংগ্ৰেছে কেবিনেটত যোগদানৰ বাবে চৰ্ত বান্ধি দিছে। এতিয়া বিজয়ে শেষ মুহূৰ্তত ট্ৰাম্প কাৰ্ড খেলি আৰু দুজন বিধায়কৰ সমৰ্থন লাভ কৰিব পাৰে নে তামিলনাডুৱে আকৌ এবাৰ অস্থিৰ ৰাজনৈতিক পৰিস্থিতিৰ দিশে আগবাঢ়ে সেয়া লক্ষ্যণীয় হ’ব।
