সদৌ তিৱা ছাত্ৰ সন্থাৰ আন্দোলনৰ কাৰ্সূচী বাতিল। অহা ১৭ডিচেম্বৰত অনুষ্ঠিত হ’বলগীয়া তিৱা স্বায়ত্ত পৰিষদৰ নিৰ্বাচন সম্পূৰ্ণ অসাংবিধানিক, অবৈধ আখ্যাৰে এই নিৰ্বাচন বৰ্জনৰ দাবীৰে সদৌ তিৱা ছাত্ৰ সন্থা আৰু সহযোগী দল,সংগঠনসমৃহে কৰা প্ৰতিবাদ তথা আন্দোলন সাময়িকভাৱে বাতিল কৰা হৈছে।
আজি দিছপুৰৰ সচিবালয়ৰ সভাকক্ষত অসম চৰকাৰৰ ভৈয়াম জনজাতি ও পিছপৰা শ্ৰণীৰ কল্যাণ বিভাগৰ আয়ুক্ত সচিব আৰু বিভাগৰ অন্য বিষয়াৰ লগত সদৌ তিৱা ছাত্ৰ সন্থৰ এখনি সৌহাদ্যপূৰ্ণ বৈঠকত এই সিদ্ধান্তৰ বিষয়ে সদৰী কৰে ছাত্ৰ সংগঠনটোৰ সম্পাদক চেনি ৰাম মালাঙে।
সংবাদ মাধ্যমলৈ প্ৰেৰণ কৰা এক প্ৰেছ বিবৃতিত মালাঙে কয় যে তিৱা স্বায়ত্ত পৰিষদৰ পৰা বাদ পৰি ৰোৱা তিৱা তথা জনজাতি গাঁওসমূহ অন্তৰ্ভূক্ত কৰা আৰু তিৱা পৰিষদত অবাঞ্ছিতভাৱে অন্তৰ্ভূক্ত হোৱা অজনজাতি গাঁওসমূহ পৰিষদৰ পৰা বাদ দিয়াৰ সন্দৰ্ভত সিদ্ধান্ত ল’বলৈ বিভাগৰ আয়ুক্ত সচিব আৰু তিৱা সংগঠনৰ দুগৰাকী সদস্যক অন্তৰ্ভূক্ত কৰি এখন আয়োগ গঠন হোৱাৰ প্ৰস্তাৱ গ্ৰহণ কৰে।
ইয়াৰ উপৰিও স্বায়ত্ত পৰিষদৰ এলেকাক সংবিধানৰ ষষ্ঠ অনুসূচীত অন্তৰ্ভূক্ত কৰাৰ সন্দৰ্ভত আগন্তুক বিটিআৰ আৰু তিৱা স্বায়ত্ত পৰিষদৰ নিৰ্বাচনৰ পিছতে কেবিনেট মন্ত্ৰী গোটৰ সভা অনুষ্ঠিত কৰাৰো এক প্ৰস্তাৱ গ্ৰহণ কৰা হয়।
ইফালে আলোচনা কালত তিৱা পৰিষদ এলেকাক ৰাজধানী ক্ষেত্ৰ উন্নয়ন প্ৰাধিকৰণ আইনৰ পৰা বাদ দিয়াৰ বাবে ভৈয়াম জনজাতি পিছপৰা শ্ৰেণীৰ কল্যাণ বিভাগে যাৱতীয় ব্যৱস্থা গ্ৰহণ কৰা বিষয়ে আলোচনা কৰা হয়।
ইয়াৰ উপৰি তিৱা পৰিষদৰ নিৰ্বাচনত জনজাতি সংৰক্ষিত এলেকা হ্ৰাস কৰা আদি বিষয় সমূহো আলোচনা কৰা হয়। ইফালে আজি অনুষ্ঠিত হোৱা আচোলচনাৰ বিষয়বোৰ যদি নিৰাময়ৰ ব্যৱস্থা নকৰে তেতিয়া হ’লে অনাগত সময়ত পুনৰ আন্দোলনৰ সকীয়নি প্ৰদান কৰে চৰকাৰক। এই কথা বিবৃতিৰ জৰিয়তে ছাত্ৰ সংগঠনোৰ সাধাৰণ সম্পাদক চেনি ৰাম মালাঙে জানিবলৈ দিয়ে।
