পৰিবেশ ৰক্ষাৰ বাবে নাইবা বনাঞ্চল বৃদ্ধিৰ বাবে নহয়, কেৱল মাথোঁ গীনিজ ৰেকৰ্ড কৰাৰ বাবেহে আছিল চৰকাৰৰ ‘অমৃত বৃক্ষ আন্দোলন’- এই মন্তব্য আপ অসমৰ ৰাজ্যিক উপ সভাপতি জিতুল ডেকাৰ।
আজি আম আদমি পাৰ্টিৰ ৰাজ্যিক কাৰ্যালয়ত আয়োজন কৰা এখন সংবাদ মেলত ৰাজ্যৰ শাসকীয় বিজেপি চৰকাৰৰ ‘অমৃত বৃক্ষ আন্দোলন ‘ ৰ প্ৰকৃত স্বৰূপ উদঙাইবিৰুদ্ধে সোচ্চাৰ হৈ আপৰ উপ সভাপতি জিতুল ডেকাই এই অভিযোগ উত্থাপন কৰে।
ডেকাই কয়, “বৃহৎ বৃক্ষৰোপন অভিযান পৰিবেশ আৰু বন বিভাগৰ উল্লেখনীয় সাফল্য বুলি প্ৰচাৰ চলাই আজি চৰকাৰে আনুষ্ঠানিক ভাবে ৯টা শাখাত বিশ্ব অভিলেখৰ প্ৰমাণ পত্ৰ গিনিজ কতৃপক্ষৰ পৰা গ্ৰহণ কৰা অনুষ্ঠান আয়োজন কৰিছে।”
চৰকাৰে এই প্ৰমাণ পত্ৰ ল’ব বিচৰা ৯ টা অভিলেখৰ অন্যতম এটা হ’ল- যোৱা ১৫ ছেপ্তেম্বৰত ডিব্ৰুগড় বন সংমণ্ডলৰ অধীনত অভয়পুৰত এঘণ্টাত ৩,৩১,৯২৯ টা গছপুলি ৰোপণ কৰি কৰা অভিলেখ।
গছপুলি ৰোপণ কৰা দুমাহ উকলি যোৱাৰ পিছত চৰকাৰৰ এই অভিলেখ সন্দৰ্ভত আপ অসমৰ ডিব্ৰুগড় জিলাৰ সভাপতি দ্বিজেন গগৈ আৰু নাহৰকটিয়া সমষ্টি সমিতিৰ সম্পাদক সুব্ৰত ভূঞাৰ নেতৃত্বত এটি দলে সেই স্থান পৰিদৰ্শন কৰিছিল।
জিতুল ডেকাই উল্লেখ কৰা মতে, দুয়োগৰাকী আপ নেতাই অভয়পুৰ সন্দৰ্ভত যি তথ্য প্ৰদান কৰিলে সেয়া ছবিয়ে হতবাক কৰি তুলিব অসমৰ ৰাইজক। চৰকাৰে ডিব্ৰুগড়ৰ অভয়পুৰত বৃক্ষৰোপন কৰা স্থানত ৰোপন কৰা ৯০ শতাংশ গছপুলিয়ে এতিয়া মৰি গৈছে বুলি উল্লেখ কৰে ডেকাই।
সংবাদ মেলত আপ নেতাগৰাকীৰ দাবী, কেৱল শুকান গছপুলি আৰু বাঁহৰ কামিৰে ভৰি আছে অভিলেখ সৃষ্টি কৰা অঞ্চল। চৰকাৰৰ উদ্দেশ্য যে কেৱল গীনিজ ৰেকৰ্ড কৰা, পৰিবেশ ৰক্ষা কৰা নহয় সেয়া এই কথাই প্ৰমাণ কৰিছে বুলি বিজেপি চৰকাৰক সমালোচনা কৰে জিতুল ডেকাই।
কাকতত বিজ্ঞাপন দি এনে অভিলেখৰ বাবে বনমন্ত্ৰী চন্দ্ৰ মোহন পাটোৱাৰী আৰু চৰকাৰৰ বন বিভাগে প্ৰমাণ পত্ৰ দিবলৈ লাজ পাব লাগে বুলিও আপ নেতাগৰাকীয়ে কটাক্ষ কৰে।
অমৃত বৃক্ষ আন্দোলনেৰে বিশ্ব অভিলেখ কৰা বুলি গৌৰৱ কৰা মুখ্যমন্ত্ৰী হিমন্তবিশ্ব শৰ্মাই যোৱা দুমাহৰ আগতে ৰোপন কৰা গছ পুলি সমূহ বৰ্তমান কি অৱস্থাত আছে বন বিভাগক সুধিছেনে বুলিও তেওঁ প্ৰশ্ন কৰে।
যিহেতু চৰকাৰক কেৱল গীনিজ ৰেকৰ্ড কৰা প্ৰমাণ পত্ৰ লাগে, সেয়ে লাখ লাখ গছপুলি ৰোপন কৰি গছপুলি সমূহ মাৰি পেলোৱা ৰেকৰ্ডৰ বাবেও গীনিজ কতৃপক্ষক আবেদন জনাব পাৰে বুলি চৰকাৰলৈ বিদ্ৰুপাত্মক পৰামৰ্শ আগবঢ়ায় তেওঁ।
তেতিয়া চৰকাৰৰ ৰেকৰ্ডৰ সংখ্যা আৰু এটা বৃদ্ধি হ’ব। বন আৰু পৰিবেশ ৰক্ষাৰ নামত চৰকাৰৰ এনে আন্তৰিকতাহীন কাৰ্যক ধিক্কাৰ দিছে আপ, অসমে । আজিৰ সংবাদ মেলত ৰাজ্যিক কাৰ্যনিৰ্বাহক সদস্য আমিৰ হুছেইনো উপস্থিত থাকে।
