চলিত বিত্তীয় বৰ্ষৰ এপ্ৰিল-জুনৰ সময়ছোৱাত ৩৫৫৮টা ভুৱা আৰু অস্তিত্বহীন সংস্থাই মিছা আশ্ৰয় লৈ ১৫,৮৫১ কোটি টকাৰ ইনপুট টেক্স ক্ৰেডিট আদায় কৰা বুলি এছ টিৰ বিষয়াসকলৰ দৃষ্টিগোচৰ হৈছে। যোৱা বছৰৰ একে সময়ছোৱাত সংগ্ৰহ কৰা ইনপুট টেক্স ক্ৰেডিটতকৈ এই পৰিমাণ ২৯ শতাংশ বেছি বুলি তেওঁলোকে দাবী কৰে।
কেন্দ্ৰৰ লগতে দেশৰ বিভিন্ন ৰাজ্যৰ জি এছ টি বিষয়াসকলে ২০২৫-২৬ বিত্তীয় বৰ্ষৰ প্ৰথম তিনিমাহত ৩৫৫৮টা ভুৱা সংস্থাৰ সন্ধান লাভ কৰিছে। অৱশ্যে যোৱা বিত্তীয় বৰ্ষৰ প্ৰথম তিনিমাহত এই সংখ্যা বেছি আছিল—৩,৮৪০ টা।
গোৱাৰ মুখ্যমন্ত্ৰী প্ৰমোদ সাৱন্তৰ নেতৃত্বত বিভিন্ন ৰাজ্যৰ বিত্তমন্ত্ৰীসকলে গঠন কৰা এটা পেনেলে বিভিন্ন ক্ষেত্ৰত কৰ ফাঁকিৰ পৰিসৰৰ তদন্ত কৰি আছে আৰু ইনপুট টেক্স ক্ৰেডিটৰ বাবে আৱেদন কৰাত কিমান পৰিমাণৰ জালিয়াতি হৈছে সেই বিষয়েও চোৱাচিতা কৰা হৈছে।
জি এছ টিৰ এজন বিষয়াৰ মতে, “গড়ে প্ৰতিমাহে ১২০০টা ভুৱা সংস্থা পোৱা গৈছে। এপ্ৰিল-জুনৰ সময়ছোৱাত ধৰা পৰা ভুৱা সংস্থাৰ সংখ্যা অৱশ্যে যোৱা বছৰৰ এপ্ৰিল-জুনতকৈ কম। ইয়াৰ পৰা স্পষ্টকৈ দেখা যায় যে ভুৱা জি এছ টি পঞ্জীয়নৰ বিৰুদ্ধে আমাৰ অভিযানে কাম কৰি আছে।’
চলিত বিত্তীয় বৰ্ষৰ এপ্ৰিল-জুনৰ ভিতৰত ভুৱা সংস্থা সৃষ্টি আৰু ভুৱা মিছীৰ আশ্ৰয় লৈ ইনপুট টেক্স ক্ৰেডিট দাবী কৰা ৫৩ জন লোকক গ্ৰেপ্তাৰ কৰিছে জি এছ টিৰ বিষয়াসকলে। তেওঁলোকৰ পৰা ৬৫৯ কোটি টকা সংগ্ৰহ কৰা হৈছে।
যোৱা বিত্তীয় বৰ্ষৰ একে সময়ছোৱাতে জি এছ টিৰ বিষয়াসকলে ২৬জন লোকৰ পৰা ৫৪৯ কোটি টকা সংগ্ৰহ কৰিছিল।
সামগ্ৰী আৰু সেৱা কৰৰ অধীনত যোগানকাৰীৰ পৰা সামগ্ৰী ক্ৰয় কৰাৰ সময়ত ব্যৱসায়ীয়ে দিয়া কৰক ইনপুট কৰ ক্ৰেডিট হিচাপে গণ্য কৰা হয়। সামগ্ৰী বিক্ৰীৰ পিছত চূড়ান্ত উৎপাদন কৰ পৰিশোধ কৰাৰ সময়ত ইয়াক ঘূৰাই পোৱাৰ বাবে দাবী কৰিব পাৰি।
ভুৱা সংস্থা সৃষ্টি কৰি ইনপুট টেক্স ক্ৰেডিট দাবী কৰাৰ প্ৰৱণতা জি এছ টিৰ বিষয়াসকলৰ মূৰৰ কামোৰণিৰ অন্যতম কাৰণ। জি এছ টিৰ বিষয়াসকলে দাবী কৰিছে যে এই ধৰণৰ কৰ ফাঁকিৰ ফলত দেশৰ ৰাজহত ব্যাপক ক্ষতি হয়।
যোৱা বিত্তীয় বৰ্ষত জি এছ টিৰ বিষয়াসকলে মুঠ ২৫,০০৯টা ভুৱা সংস্থা বিচাৰি পাইছিল। যাৰ জৰিয়তে অনৈতিক উপায়েৰে ৬১,৫৪৫ কোটি টকাৰ ইনপুট টেক্স ক্ৰেডিট সংগ্ৰহ কৰা হৈছিল।
ভুৱা জি এছ টি পঞ্জীয়ন ৰোধৰ বাবে দেশজুৰি দুটাকৈ অভিযান চলায় কৰ বিষয়াসকলে। ২০২৩ চনৰ ১৬ মে’ৰ পৰা ১৫ জুলাইলৈ চলোৱা প্ৰথমটো অভিযানত ২১,৭৯১টা অস্তিত্বহীন সংস্থা উদ্ধাৰ কৰা হয়। সেই অভিযানত কৰ বিভাগে ২৪,০১০ কোটি টকাৰ কৰ ফাঁকিও পাইছিল।
২০২৪ চনৰ ১৬ এপ্ৰিলৰ পৰা ৩০ অক্টোবৰলৈ চলোৱা দ্বিতীয়টো অভিযানত ১৮ হাজাৰ ভুৱা জি এছ টি পঞ্জীয়নভুক্ত সংস্থা উদ্ধাৰ হয়। যিয়ে মুঠ ২৫ হাজাৰ কোটি টকাৰ কৰ ফাঁকি দিছিল। ইয়াৰ পৰিপ্ৰেক্ষিতত কেন্দ্ৰই জি এছ টি পঞ্জীয়ন প্ৰক্ৰিয়া কটকটীয়া কৰিছে।
