টছত জিকি প্ৰথমে বেটিং কৰাৰ সিদ্ধান্ত ভুল প্ৰমানিত হ’ল ৰাজস্থান ৰয়েলছৰ। সঞ্জু চেমছনে যেন উইকেটৰ চৰিত্ৰ বুজি পোৱাত ভুল কৰিলে। আৰু তাৰেই মূল্য ভৰি ফাইনেলত পৰাজিত হ’ব লগা হ’ল ৰাজস্থান ৰয়েলছ। হাতত কম ৰাণলৈ কিছু সময়ৰ বাবে যুঁজিব পাৰে যদিও জিকিব নোৱাৰি। ফলত সঞ্জুৰ ৰাজস্থানক পৰাভূত কৰি হাৰ্ডিক পাণ্ডিয়াৰ গুজৰাট টাইটানছে আৱিৰ্ভাৱতেই আই পি এল ২০২২ৰ খিতাপ আজুৰি নিলে।
গুজৰাটৰ বাবেও আৰম্ভণিটো ভাল নাছিল। ঋদ্ধিমান সাহা মাত্ৰ ৭ ৰাণতে আউট হৈছিল। মেথিউ ৱেডেও বেছি ৰাণ সংগ্ৰহ কৰিব পৰা নাছিল। কিন্তু হাৰ্দিকে শুভমন গীলৰ সৈতে যুঁজ অব্যাহত ৰাখে। তৃতীয় উইকেটৰ যুটীত ৪৬ ৰাণৰ বৰঙণিয়ে খেলখনত পাৰ্থক্য আনিছিল। বাকী কামটো ‘কিলাৰ’ ডেভিদ মিলাৰ আৰু শুভমনে সমাপন কৰে। শুভমনে ছয় মাৰি দলটোৰ প্ৰথম আই পি এলৰ খিতাপ নিশ্চিত কৰে।
প্ৰথমবাৰৰ বাবে আইপিএলৰ ফাইনেলৰ দৰে এখন বৃহৎ মেচ খেলা গুজৰাট দলটোক বুজি পোৱাৰ কোনো উপায় নাছিল। তেওঁলোকৰ দৃঢ় মানসিকতা বাইশ গজৰ যুঁজত প্ৰতিফলিত হৈছিল। ফাইনেলত হাৰ্দিক, মহম্মদ ছামী, ৰছিদ খানে বলত আধিপত্য বিস্তাৰ কৰিছিল। যুৱ সাই কিশোৰে বলিং আৰু দুটা গুৰুত্বপূৰ্ণ কেচৰ সৈতে যোগ্য সহযোগ দিছিল। ফলস্বৰূপে, ৰাজস্থানে প্ৰথমে বেটিং কৰি ৯ উইকেটত ১৩০ ৰাণতে ইনিংছ সামৰিবলগীয়া হয়।
𝗖. 𝗛. 𝗔. 𝗠. 𝗣. 𝗜. 𝗢. 𝗡. 𝗦! 🏆 🙌
That moment when the @gujarat_titans captain @hardikpandya7 received the IPL trophy from the hands of Mr. @SGanguly99, President, BCCI and Mr. @JayShah, Honorary Secretary, BCCI. 👏 👏#TATAIPL | #GTvRR pic.twitter.com/QKmqRcemlY
— IndianPremierLeague (@IPL) May 29, 2022
ইডেন গাৰ্ডেনত প্ৰথম কোৱালিফায়াৰৰ পিছত এলিমনেটৰতো জছ বাটলাৰে আধিপত্য বিস্তাৰ কৰিছিল। চলিত আইপিএলত তেওঁএক অনবদ্য কৃতিত্ব অৰ্জন কৰিছে। তেওঁ মুঠতে চাৰিটা শতক অৰ্জন কৰিছে। ডেভিদ ৱাৰ্ণাৰৰ অভিলেখ ভংগ কৰি তেওঁ আইপিএলত সৰ্বকালৰ সৰ্বাধিক ব্যক্তিগত ৰাণ অভিলেখ গঢ়িছে। বাটলাৰে দেওবাৰেও ৰাজস্থানৰ হৈ সৰ্বাধিক স্ক’ৰ কৰিছিল। কিন্তু তেওঁ মাত্ৰ ৩৯ ৰাণহে কৰিবলৈ সক্ষম হৈছিল। ৰাজস্থানৰ ড্ৰেছিং ৰুমক সকাহ দিয়াৰ বাবে ই যথেষ্ট নাছিল।
যোৱা বছৰৰ পৰা হাৰ্দিকৰ বলিং সম্পৰ্কে বহু চৰ্চা হৈছে। পিঠিৰ আঘাত, অস্ত্ৰোপচাৰ সকলো মিলি হাৰ্ডিকে বলিং কৰাই এৰি দিছিল। আনকি তেওঁ ৰাষ্ট্ৰীয় দলৰহৈ বল নকৰা সম্পৰ্কে প্ৰশ্নও উঠিছিল। তেওঁকো আনকি দলৰ পৰা বাদ দিয়া হৈছিল। এইবাৰ ফাইনেলৰ আগতে তেওঁক বেছি হাত ঘুৰোৱা দেখা যোৱা নাছিল। কিন্তু বৃহৎ খেলখনত বলৰ সৈতে তেওঁৰ পূৰ্বৰ চমক দেখা গ’ল। গুজৰাটৰ অধিনায়কজনে মাত্ৰ ১৭ ৰাণত ৩ টা উইকেট দখল কৰে। তেওঁৰ চিকাৰৰ তালিকাত আছিল প্ৰতিপক্ষৰ শীৰ্ষ তিনিজন বেটছমেন। বাটলাৰ, সঞ্জু চেমছন আৰু চিমৰন হেটমেয়াৰ।
ছামী, ৰছিদ খান আৰু সাই কিশোৰে হাৰ্দিকক সঠিক সহযোগ আগ বঢ়াইছিল। ৰছিদে মাত্ৰ ১৮ ৰাণৰ বিনিময়ত ১ টা উইকেট দখল কৰে। সাইয়ে ২০ ৰাণত দখল কৰে ২ টা উইকেট।
