চৌদিশে ধূলিৰ আচ্ছাদন আৰু যান-বাহনৰ ধোঁৱাই উশাহ ল’বলৈ কষ্টকৰ কৰি তুলিছে গুৱাহাটী মহানগৰীৰ পৰিৱেশ। বৰ্তমান এক ভয়ংকৰ বায়ু প্ৰদূষণৰ কৱলত পৰিছে ৰাজ্যৰ প্ৰধান চহৰখন। চলিত ফেব্ৰুৱাৰী মাহত মহানগৰীৰ বায়ুৰ মান সূচকাংক (AQI) উদ্বেগজনকভাৱে অৱনমিত হৈ বিপজ্জনক স্তৰৰ ওচৰ পাইছেগৈ। বিশেষকৈ চৌদিশে চলি থকা নিৰ্মাণকাৰ্য, নীতি-নিয়মৰ উলংঘন আৰু শীতকালৰ শুকান বতৰৰ বাবে সৃষ্টি হোৱা এই প্ৰদূষণে এতিয়া মহানগৰীবাসীৰ স্বাস্থ্যৰ প্ৰতি এক গুৰুতৰ ভাবুকি কঢ়িয়াই আনিছে।
অসম প্ৰদূষণ নিয়ন্ত্ৰণ পৰিষদৰ তথ্য অনুসৰি, যোৱা ১৬ ফেব্ৰুৱাৰীত বায়ুৰ মান সূচকাংক সৰ্বাধিক ২৯৪-লৈ বৃদ্ধি পাইছিল। পহিলা ফেব্ৰুৱাৰীৰ পৰা ৩ ফেব্ৰুৱাৰীলৈ, ৫ ফেব্ৰুৱাৰীত আৰু ১২-১৬ ফেব্ৰুৱাৰীলৈ এই সূচকাংক ২০১-৩০০ ৰ ভিতৰত আছিল, যিটোৱে ‘বেয়া’ (Poor) অৱস্থাক সূচায়। আনহাতে, ১৭-২২ ফেব্ৰুৱাৰীলৈ ই ‘মধ্যমীয়া’ (Moderate) অৱস্থা ১০১-২০০ ৰ ভিতৰলৈ ঘূৰি আহে।
উল্লেখ্য যে গুৱাহাটীৰ বায়ুত থকা ১০ মাইক্ৰ’মিটাৰ বা তাতকৈ সৰু আকাৰৰ ধূলিকণাৰ (PM 10) প্ৰধান উৎসসমূহৰ ভিতৰত ধূলি আৰু নিৰ্মাণ কাৰ্যৰ পৰা ৩২ শতাংশ, গাড়ীৰ ধোঁৱাৰ পৰা ১৯ শতাংশ, কল-কাৰখানাৰ ধোঁৱাৰ পৰা ১৬ শতাংশ আৰু কাঠ, কয়লা বা জৈৱ ইন্ধনৰ ধোঁৱাৰ পৰা ৯ শতাংশ সৃষ্টি হয়। আনহাতে, ২.৫ মাইক্ৰ’মিটাৰ বা তাতকৈ সৰু আকাৰৰ অতি সূক্ষ্ম তথা অধিক ক্ষতিকাৰক ধূলিকণাৰ (PM 2.5) ক্ষেত্ৰত গাড়ী-মটৰৰ ধোঁৱাৰ পৰা সৰ্বাধিক ৫২ শতাংশ সৃষ্টি হয়। ইয়াৰ লগতে ব্যৱসায়িক ৰন্ধন আৰু ঘৰৰ পৰা ১৬ শতাংশ, পথৰ ধূলিৰ পৰা ১৬ শতাংশ, কল-কাৰখানাৰ ধোঁৱাৰ পৰা ৬ শতাংশ, নিৰ্মাণ কাৰ্যৰ পৰা ৪ শতাংশ আৰু খৰি, গছৰ পাত, জাবৰ আদি জ্বলোৱাৰ পৰা ৩ শতাংশ ধূলিকণা নিৰ্গত হয়।
সাম্ভাব্য বৰষুণ সন্দৰ্ভত বতৰ বিজ্ঞানীয়ে সদৰী কৰা মতে, আগন্তুক পাঁচ দিনত উত্তৰ-পূৰ্বাঞ্চলৰ লগতে অসম, অৰুণাচল প্ৰদেশ, মেঘালয় আৰু নাগালেণ্ডৰ কিছু স্থানত পাতলীয়া বৰষুণৰ সম্ভাৱনা আছে। অৱশ্যে, গুৱাহাটী আৰু ইয়াৰ পাৰ্শ্বৱৰ্তী অঞ্চলসমূহত বৰষুণৰ পৰিৱৰ্তে আগন্তুক সাত দিনলৈ বতৰ সাধাৰণতে ডাৱৰীয়া হৈ থকাৰহে সম্ভাৱনা অধিক।
