দাদা বাইদেউ উঠি ল’ব,,,,,,, হেণ্ডিমেনৰ মুখত এই চিঞৰকেইটা এতিয়া শুনিবলৈ পোৱা নাযায় গুৱাহাটীৰ চিটী বাছত। কিয়নো এতিয়া গুৱাহাটীৰ চিটীবাছ অথবা অন্যান্য যাত্ৰীবাহী বাহনত নাই যাত্ৰীৰ ভিৰ।
পূৰ্বতে গুৱাহাটীৰ ৰাজপথত দৈনিক ৩০০-৪০০ চিটী বাছ চলিলেও এতিয়া নামমাত্ৰ চিটীবাছৰহে চলাচল দেখিবলৈ পোৱা গৈছে।
চৰকাৰে ৫০ শতাংশ যাত্ৰীৰে বাণিজ্যিক যাত্ৰীবাহী চলাচলৰ অনুমতি দিলেও বাহনৰ তেল ভৰাবলৈয়ো নুজুৰে সেই ধন।
‘আমাৰ লোকচান মানে দিনটো গাড়ী চলাই তেল ভৰাবলৈ পইচাই নুজুৰে। সেইকাৰণে বহুতে চিটিবাছ চলোৱাটোৱেই বাদ দিছে।‘ মোহিত নামৰ এজন চিটিবাছ চালকে এইদৰে কয়।
আন এগৰাকী মেজিক চালক গোপালে আমাৰ সাংবাদিকৰ আগত কয় ‘আমাৰ নাওখন ডুবু ডুবু হৈছে। দিন বেয়াৰ ফালে গৈ আছে। য’ত পূৰ্বে ১০ ৰ পৰা ১২ গৰাকীকৈ যাত্ৰী মেজিকত উঠাইছিলো। এতিয়া মাত্ৰ ৪-৫ জনহে উঠাব পাৰো। কেতিয়াবা যাত্ৰীয়ে নাপাওঁ।‘
আনকি, বহু গাড়ীচালক অথবা হেণ্ডিমেনে জীৱনৰ পথ সলাই এতিয়া শাক-পাছলি অথবা ফলমূলৰ ব্যৱসায়ত নামি পৰা দেখা গৈছে। ইয়াৰোপৰি, কোনো কোনোৱে নিজকে নলা চাফা কৰা কামত নিযোগ কৰিছে। ৰাজ্যত ২০ লক্ষাধিক লোক এনে বানিজ্যিক বাহনৰ সৈতে জড়িত হৈ আছিল যদিও বহুতে এতিয়া হেৰুৱাইছে সংস্থাপন।
এই সন্দৰ্ভত সদৌ অসম মটৰ পৰিবহন সন্থাৰ সাধাৰণ সম্পাদক প্ৰদীপ দাসে কয়, ‘গাড়ীৰ চালক হেণ্ডিমেনে ক’ৰবাৰ পৰা মাছ আনি বা শাক-পাছলি আনি বিক্ৰী কৰিছে। গুৱাহাটীৰ ৫০ শতাংশ চিটিবাছৰ চালক হেণ্ডিমেনে এতিয়া গাড়ী চলোৱা এৰি মাছ মাংস ব্যৱসায়ত ধৰিছে।‘
মুঠৰ ওপৰত এতিয়া চৰম হতাশাৰ সন্মুখীন হৈছে পৰিবহন মটৰ সন্থাৰ অধীনৰ ব্যৱসায়িক বাহনসমূহ। আনহাতে, প্ৰধান মন্ত্ৰী নৰেন্দ্ৰ মোদীয়ে ঘোষণা কৰা ২০ লাখ কোটি টকাৰ পেকেজে ৰাজ্যৰ পৰিবহন উদ্যোগটোক স্পৰ্শ নকৰাৰ অভিযোগ আনিছে সদো অসম মটৰ পৰিবহন সন্থাৰ সাধাৰণ সম্পাদক প্ৰদীপ দাসে।
লকডাউনৰ সময়ত দেওলীয়া অৱস্থাৰ সন্মুখীন হোৱা স্বত্ত্বেও চালক হেণ্ডিমেন অথবা কৰ্মচাৰীয়ে কোনো চৰকাৰী সাহায্য লাভ কৰিবলৈ সক্ষম হোৱা নাই।
দাসে কয় ‘চৰকাৰে পৰিবহন উদ্যোগটো ধ্বংস কৰাৰ উপক্ৰম হৈছে। যদিও ক’ৰ’নাই ধ্বংস কৰিছে তাতকৈ বেছি চৰকাৰে ধ্বংস কৰিছে। কেন্দ্ৰীয় চৰকাৰৰ ২০ হাজাৰ কোটি টকাৰ পেকেজৰ এটকাও ৰাজ্যৰ পৰিবহন বিভাগত খৰচ কৰা নেদেখিলো। আনকি চালক-হেণ্ডিমেনকো আৰ্থিক সাহায্য দি সহায় কৰা পৰিলক্ষিত নহ’ল।‘
