গুৱাহাটীত অহা বৰ্ষৰ জানুৱাৰী মাহত অনুষ্ঠিত হ’বলগীয়া তৃতীয় খেলো ইণ্ডিয়া য়ুথ গেমছ কৃতকাৰ্যতাৰে অনুষ্ঠিত কৰাৰ দিশত ৰাজ্য প্ৰশাসন তথা ক্ৰীড়া সন্থা সমূহক সৰ্বতো প্ৰকাৰৰ পদক্ষেপ লোৱাৰ বাবে মুখ্য মন্ত্ৰী সৰ্বানন্দ সোণোৱালে নিৰ্দেশ দিয়ে।
আজি জনতা ভৱনস্থিত মুখ্য মন্ত্ৰীৰ কাৰ্যালয়ৰ সভাকক্ষত এই সম্পৰ্কে অনুষ্ঠিত প্রথমখন উচ্চ পৰ্যায়ৰ পৰ্যালোচনামূলক বৈঠকত অধ্যক্ষতা কৰি মুখ্য মন্ত্ৰীয়ে কয় যে এই ক্ৰীড়া প্ৰতিযোগিতাখন সৰ্বতো প্ৰকাৰে সাফল্য মণ্ডিত কৰাৰ দিশত ৰাজ্য চৰকাৰে সকলো প্ৰকাৰৰ পদক্ষেপ ল’ব লাগিব।
খেলো ইণ্ডিয়া য়ুথ গেমছ যিহেতু উদীয়মান খেলুৱৈ সকলক চিনাক্তকৰণ তথা উদগণি প্ৰদানৰ দিশত প্ৰধানমন্ত্ৰী নৰেন্দ্ৰ মোদীয়ে গ্ৰহণ কৰা এক বিশেষ পদক্ষেপ হিচাপে পৰিগণিত হৈছে। সেয়েহে, এই প্ৰতিযোগিতাত দেশৰ বিভিন্ন প্ৰান্তৰ প্ৰায় ৯ হাজাৰ খেলুৱৈৰ উপস্থিতিৰে এক বৃহৎ ক্ৰীড়াঙ্গন হিচাপে অনুষ্ঠিত কৰাৰ দিশত আমি সকলোৱে মিলিত প্ৰচেষ্টাত পদক্ষেপ ল’ব লাগিব বুলিও মুখ্য মন্ত্ৰীয়ে কয়।
মুখ্য মন্ত্ৰীয়ে ক্ৰীড়া প্ৰাধিকৰণৰ সঞ্চালক সুভাষ বসুমতাৰীক সকলোবোৰ ক্ৰীড়াৰ বাবে সাজু কৰি তোলাৰ পদক্ষেপ ল’বলৈও নিৰ্দেশ দিয়ে। মুখ্য মন্ত্ৰীয়ে ইয়াৰ বাবে প্ৰয়োজনীয় মেৰামতি তাৎক্ষণিকভাৱে গ্ৰহণ কৰাৰ বাবে নিৰ্দেশ দিয়ে যাতে এই ক্ৰীড়া সূচলভাৱে অনুষ্ঠিতকৰণৰ বাবে আন্তঃগাঠনিসমূহ সাজু হৈ উঠে।
সোণোৱালে সংশ্লিষ্ট সকলো পক্ষকে এই ক্ৰীড়া প্ৰতিযোগিতাখন অনুষ্ঠিত কৰাৰ বিভিন্ন বিষয় সামৰি এখন উচ্চ পৰ্যায়ৰ সমিতি গঠনৰ বাবেও নিৰ্দেশ দিয়ে। মুখ্য মন্ত্ৰীয়ে ক্ৰীড়া বিভাগক এই ক্ৰীড়াৰ লগত জড়িত পৰিৱহন, তাৎক্ষণিক স্বাস্থ্য সেৱা, ক্ৰীড়াবিদ আৰু অন্যান্য সকলৰ বাবে থকা-খোৱাৰ ব্যৱস্থা ইত্যাদিৰ ওপৰত বিশেষভাৱে মনোনিৱেশ কৰাৰ বাবেও নিৰ্দেশ দিয়ে।
এই প্ৰতিযোগিতাখন অনুষ্ঠিত কৰাৰ দিশত সকলো ধৰণৰ নিৰাপত্তা ব্যৱস্থা সুদৃঢ়কৰণৰ বাবে মুখ্য মন্ত্ৰীয়ে অতিৰিক্ত আৰক্ষী সঞ্চালক প্ৰধান হৰমিত কৌৰ আৰু মুকেশ আগৰৱালক নিৰ্দেশ দিয়ে। সোণোৱালে প্ৰতিযোগিতাখনত অংশ ল’বলগীয়া ৰাজ্যখনৰ খেলুৱৈ সকলক উপযুক্ত প্ৰশিক্ষণ প্ৰদানৰ ব্যৱস্থা কৰিবলৈ ক্ৰীড়া বিভাগক নিৰ্দেশ দিয়ে যাতে ৰাজ্যখনৰ খেলুৱৈসকলে প্ৰতিযোগিতাখনত পদক অৰ্জনেৰে সফলতা লাভ কৰিবলৈ সক্ষম হয়।
উল্লেখযোগ্য যে, খেলো ইণ্ডিয়া য়ুথ গেমছত আৰ্চাৰী, বাস্কেটবল, বেডমিণ্টন, বক্সিং, ফুটবল, জিমনাষ্টিক, হকী, জুডো, কাবাদী, খো-খো,শ্বুটিং, ছুইমিং, টেবল টেনিছ, লন টেনিছ, ভলীবল, ৱেট লিফটিং, ৰেচলিং আদিৰ দৰে প্ৰতিযোগিতাসমূহ অনুষ্ঠিত হ’ব।
আজি অনুষ্ঠিত হোৱা বৈঠকত মুখ্য সচিব আলোক কুমাৰ, ৰাজ্যিক পৰ্যায়ৰ ছাত্ৰ আৰু যুৱ কল্যাণ উপদেষ্টা সমিতিৰ সদস্য সচিব লক্ষ্য কোঁৱৰ, মুখ্য মন্ত্ৰীৰ প্ৰধান সচিব সঞ্জয় লোহিয়া, প্ৰধান সচিব সমীৰ সিনহা, অবিনাশ যোশীৰ লগতে জেষ্ঠ বিষয়াসকল উপস্থিত থাকে।