ৰাজীৱ কুমাৰে অৱসৰ লোৱাৰ পিছত দেশৰ নতুন মুখ্য নিৰ্বাচনী আয়ুক্ত হিচাপে নিযুক্তি দিয়া হৈছে জ্ঞানেশ কুমাৰক। বুধবাৰে দায়িত্ব গ্ৰহণ কৰি শপত গ্ৰহণ কৰিব জ্ঞানেশ কুমাৰে।
কিন্তু ইয়াৰ সমান্তৰালৈ বুধবাৰে এক বিশেষ গোচৰৰ বিচাৰ চলিব উচ্চতম ন্যায়ালয়ত। যি আইনৰ অধীনত জ্ঞানেশ কুমাৰক মুখ্য নিৰ্বাচনী আয়ুক্ত হিচাপে নিৰ্বাচিত কৰা হৈছিল, সেই আইনৰ বিৰুদ্ধেই আজি গোচৰৰ শুনানি হ’ব উচ্চতম ন্যায়ালয়ত।
উল্লেখ্য যে জ্ঞানেশ কুমাৰ ভাৰতীয় প্ৰশাসনিক সেৱাৰ অৱসৰপ্ৰাপ্ত বিষয়া। তেওঁ গৃহ মন্ত্ৰালয়ত দীৰ্ঘদিন কাম কৰাৰ লগতে ২০১৯ চনত ৩৭০ অনুচ্ছেদ আঁতৰোৱাৰ সময়ত শ্ৰী ৰাম জন্মভূমি ট্ৰাষ্ট স্থাপন আৰু জম্মু-কাশ্মীৰৰ সৈতে জড়িত বিষয়সমূহৰ ক্ষেত্ৰত গুৰুত্বপূৰ্ণ প্ৰশাসনিক ভূমিকা পালন কৰিছিল। তেওঁ সংসদীয় পৰিক্ৰমা সচিব হিচাপেও কাম কৰিছিল।
জানিব পৰা মতে, ২০২৫ চনৰ মাৰ্চ মাহৰ পৰা ২০২৯ চনৰ জানুৱাৰী মাহলৈকে মুখ্য নিৰ্বাচনী আয়ুক্ত হিচাপে তেওঁ কাৰ্যনিৰ্বাহ কৰিব।
উল্লেখ্য যে ‘নতুন মুখ্য নিৰ্বাচন আয়ুক্ত আৰু অন্যান্য নিৰ্বাচন আয়ুক্ত (নিযুক্তি, সেৱাৰ চৰ্ত আৰু কাৰ্যকাল) আইন, ২০২৩’ ৰ অধীনত নিযুক্তি পোৱা প্ৰথমজন ব্যক্তি হৈছে জ্ঞানেশ কুমাৰ।
এই আইন অনুসৰি, প্ৰধানমন্ত্ৰী, এজন কেন্দ্ৰীয় মন্ত্ৰী আৰু এজন বিৰোধী নেতাৰে গঠিত তিনিজনীয়া বাচনি কমিটিয়ে মুখ্য নিৰ্বাচনী আয়ুক্তক নিৰ্বাচন কৰে।
ইয়াৰ পূৰ্বে ভাৰতৰ মুখ্য ন্যায়াধীশো এই বাচনি কমিটিৰ অংশ আছিল যদিও কেন্দ্ৰীয় চৰকাৰে গৃহীত কৰা এই নতুন আইনখনে মুখ্য ন্যায়াধীশৰ ভূমিকা আঁতৰাই পেলালে। কেন্দ্ৰীয় চৰকাৰে গৃহীত কৰা এই নতুন আইন খনক প্ৰত্যাহ্বান জনাই দাখিল কৰা এক গোচৰৰ শুনানি আজি উচ্চতম ন্যায়ালয়ে গ্ৰহণ কৰিব।
উল্লেখ্য যে ২০২৫ চনত বিহাৰ বিধানসভাৰ নিৰ্বাচন, ২০২৬ চনত কেৰালা, তামিলনাডু, আৰু পশ্চিম বংগৰ বিধানসভা নিৰ্বাচন, ২০২৭ চনত ৰাষ্ট্ৰপতি আৰু উপ-ৰাষ্ট্ৰপতি নিৰ্বাচনকে ধৰি গুৰুত্বপূৰ্ণ নিৰ্বাচনসমূহ পৰিচালনা কৰিব জ্ঞানেশ কুমাৰে।
