নাগৰিকত্ব সংশোধনী বিধেয়ক, ২০১৬ বাতিলৰ দাবীত ৰাজ্যখনৰ চাৰিওফালে তীব্ৰ প্ৰতিবাদ অব্যাহত থকাৰ সময়তে গোৱালপাৰা জিলাৰ কৃষ্ণাইতো আজি এই বিধেয়কৰ বিৰোধিতা কৰি একাংশ ছাত্ৰ-ছাত্ৰীয়ে প্ৰতিবাদ সাব্যস্ত কৰে।
আজি জিলাখনৰ কৃষ্ণাইৰ হাব্ৰাঘাট মহাবিদ্যালয়ৰ ছাত্ৰ-ছাত্ৰী সকলে অনিৰ্দিষ্টকালীন শ্ৰেণী বৰ্জন কাৰ্যসূচীৰে নাগৰিকত্ব বিধেয়কখনৰ প্ৰতিবাদ কৰে। প্ৰতিবাদকাৰী ছাত্ৰ-ছাত্ৰীসকলে মহাবিদ্যালয় চৌহদতে মুখ্য মন্ত্ৰী, প্ৰধান মন্ত্ৰীৰ প্ৰতিমূৰ্তি দাহ কৰি বিজেপি বিৰোধী বিভিন্ন প্ৰতিবাদী শ্ল’গানেৰে মহাবিদ্যালয় চৌহদ উত্তাল কৰি তোলে।
প্ৰতিবাদকাৰী ছাত্ৰ-ছাত্ৰীসকলে আজি মহাবিদ্যালয় চৌহদৰ পৰাই জাতিধ্বংসী বিধেয়কখন গৃহীত হ’লে মহাবিদ্যালয়তে আত্মহত্যাৰ দৰে চৰম পন্থা লোৱাৰ হুংকাৰ দিয়াৰ লগতে মহাবিদ্যালয়খনত তলা লগাই দিয়াৰো সকীয়নি প্ৰদান কৰে।
