ৰাজ্যখনৰ ছয় জনগোষ্ঠীৰ জনজাতিকৰণৰ বিষয়টোকলৈ সন্তুষ্ট নহয় বিপিএফ। বিজেপিৰ মিত্ৰজোঁটৰ অন্যতম অংশীদাৰ বিপিএফ জনজাতিকৰণৰ সিদ্ধান্তৰ দিশত এইবাৰ বাধা হৈ থিয় দিছে। নতুনকৈ জনগোষ্ঠীকেইটাৰ জনজাতিকৰণ কৰিলে বড়োসকলে চৰকাৰী সা-সুবিধা লাভত বহুক্ষেত্ৰত বঞ্চিত হোৱাৰ শংকা প্ৰকাশ কৰি বিপিএফে বিজেপিৰ ওপৰত চাপ সৃষ্টি কৰিবলৈ আৰম্ভ কৰিছে।
এই সন্দৰ্ভত কেন্দ্ৰীয় গৃহমন্ত্ৰীক সাক্ষাৎ কৰিবলৈ হাগ্ৰামা মহিলাৰীয়ে ইতিমধ্যে দিল্লীলৈ গৈছে। জানিব পৰা মতে, নতুন দিল্লীত উপস্থিত হোৱা মুখ্য মন্ত্ৰী সৰ্বানন্দ সোণোৱাল আৰু বিত্তমন্ত্ৰী ড০ হিমন্ত বিশ্ব শৰ্মাৰ লগতে বি টি চি প্ৰধান হাগ্ৰামা মহিলাৰী আৰু মন্ত্ৰী চন্দন ব্ৰহ্ময়ো দিল্লীত বাহৰ পাতি আছে।
উল্লেখযোগ্য যে আহোম, চুতীয়া, মৰাণ, মটক, কোঁচ-ৰাজবংশী আৰু চাহ জনগোষ্ঠীক জনজাতিকৰণৰ বাবে সংসদত কেন্দ্ৰীয় চৰকাৰে বিধেয়ক উত্থাপন কৰাৰ পাছতেই বি পি এফৰ মুৰব্বী হাগ্ৰামা মহিলাৰীয়ে বিজেপিক তেওঁৰ অসন্তুষ্টিৰ কথা জনাইছে।
তদুপৰি, বৃহস্পতিবাৰে মুখ্য মন্ত্ৰী সোণোৱাল আৰু হাগ্ৰামাৰ মাজত এই বিষয়টোকলৈ আলোচনাও অনুষ্ঠিত হৈছিল। কিন্তু উক্ত আলোচনাত কোনো ফলপ্ৰসূ সমাধান নোলোৱাত হাগ্ৰামা মহিলাৰীয়ে দিল্লীলৈ যোৱাৰ সিদ্ধান্ত গ্ৰহণ কৰে।
আনহাতে, বিপিএফে ছয় জনগোষ্ঠীৰ জনজাতিকৰণৰ পূৰ্বে বিষয়টোত তেওঁলোকৰ সাংবিধানিক সুৰক্ষা তথা সা-সুবিধাসমূহ অটুট থাকিবনে নাই সেই সম্পৰ্কত স্পষ্ট হ’ব বিচাৰিছে। তদুপৰি, ছয় জনগোষ্ঠীক জনজাতিকৰণ কৰাৰ ক্ষেত্ৰত বি পি এফক আন্ধাৰত ৰাখিলে তেওঁলোকে বিজেপিৰে মিত্ৰতা ভংগ কৰাৰো ইংগিত বিজেপি নেতৃত্বক দাঙি ধৰিছে বুলি জানিব পৰা গৈছে।