বিটিচিৰ পৰিষদীয় নিৰ্বাচনতে বিপিএফৰ লগত মিত্ৰতা ছেদ কৰি এতিয়া ‘হাগ্ৰামা বধ’ অভিযানত উঠি পৰি লাগিছে বিজেপি।
বিজেপিৰ গাত পূৰ্বৰে পৰা এটা চেকা লাগি আহিছে যে মিত্ৰতাৰ পাশত আৱদ্ধ কৰি সমগ্ৰ দেশতে আঞ্চলিক ৰাজনৈতিক শক্তিসমূহ এফালৰ পৰা মষিমূৰ কৰিব বিচাৰিছে।
তাৰ প্ৰতিফলন শেহতীয়াকৈ বিটিচি পৰিষদীয় নিৰ্বাচনত দেখিবলৈ পোৱা গ’ল। বিটিচি পৰিষদীয় নিৰ্বাচনত বিপিএফে ১৭খন আসন লাভ কৰাৰ পাছতো বিজেপিয়ে চলে বলে কৌশলে য়ুপিপিএলৰ সৈতে মিত্ৰতা কৰি পৰিষদ গঠন কৰিলে। অথচ বিজেপিয়ে বিটিচি নিৰ্বাচনত লাভ কৰিছিল মাথো ৯ খন আসন।
বিটিচি নিৰ্বাচনলৈ মাজত কেইটামান মাহ থকাৰ সময়তে বিপিএফৰ সাংসদ বিশ্বজিৎ দৈমাৰীয়ে যোগদান কৰিছিল বিজেপিত।
এতিয়া বিশ্বজিৎ দৈমাৰীৰ পিছে পিছে বিজেপিৰ পৰা টোপ গিলিবলৈ সাজু হৈছে বিপিএফৰ মন্ত্ৰী তথা পৰ্যটন মন্ত্ৰী চন্দন ব্ৰহ্ম।
অচিৰেই চিদলী সমষ্টিৰ বিধায়ক ব্ৰহ্মই বিজেপিত যোগদান কৰিব বুলি এক সুত্ৰত প্ৰকাশ পাইছে। সূত্ৰটোৰ মতে অসমৰ এজন প্ৰভাৱশালী মন্ত্ৰীৰ পৰিকল্পনাৰে বিপিএফ প্ৰধান হাগ্ৰামা মহিলাৰীৰ ৰাজনৈতিক জীৱনক মষিমূৰ কৰবিলৈ উঠি পৰি লাগিছে বিজেপিয়ে।
সূত্ৰটোৱে দাবী কৰাৰ পিছতে আমাৰ সাংবাদিকে মন্ত্ৰী চন্দন ব্ৰহ্মৰ সৈতে ফোন যোগে সংযোগ স্থাপন কৰিবলৈ চেষ্টা কৰে যদিও তেওঁ ফোন বন্ধ কৰি থোৱা পায়।
সুত্ৰটোৱে দাবী কৰা মতে হাগ্ৰামা মহিলাৰী আৰু চন্দন ব্ৰহ্মৰ মাজত সংঘাত ইতিমধ্যে আৰম্ভ হৈছে। আৰু ‘হলা গছ দেখি বাগি কুঠাৰ মৰাৰ’ লেখীয়া এতিয়া হাগ্ৰামাৰ ‘সোঁহাত-বাওঁহাত’ক আঁতৰাই ‘হাগ্ৰামা’ৰ ৰাজনৈতিক ভৱিষ্যত ধ্বংস কৰাৰ যুঁজত অৱতীৰ্ণ হৈছে বিজেপিৰ আটাইতকৈ ‘দক্ষ আৰু প্ৰতাপী মন্ত্ৰীগৰাকী।
সুত্ৰটোৱে দাবী কৰা মতে বিপিএফক প্ৰায় নিঃশেষ কৰি কেইবাগৰাকী বিধায়কে নিৰ্বাচনৰ পূৰ্বলৈকে পৰ্যায়ক্ৰমে গেৰুৱা সাজ পৰিধান কৰিব।
মুঠৰ ওপৰত য়ুপিপিএলৰ সন্মিলিত প্ৰচেষ্টাত বিপিএফক শূন্য কৰাৰ মন্ত্ৰণাত এতিয়া ব্যস্ত বিজেপিৰ সেনাপতিৰ এটাই লক্ষ্য ‘কেনেকৈ বিপিএফৰ ১২খন আসন বিজেপি বা য়ুপিপিএলৰ হাতলৈ নিব পাৰি?’
উল্লেখযোগ্য যে, আজি গণ শক্তিৰ নেতা তথা জোনাইৰ বিধায়ক ভূবন পেগুৱেও গেৰুৱা সাজ পিন্ধে।
