প্ৰাক্তন মন্ত্ৰী তথা কংগ্ৰেছৰ জ্যেষ্ঠ নেতা ৰকিবুল হুছেইনৰ সৈতে সংঘাতত লিপ্ত হৈ হাজো কংগ্ৰেছৰ গুৰি ধৰোতা দুলু আহমেদ নিলম্বিত হ’ব লগীয়া হোৱাত হাজো ব্লক কংগ্ৰেছ শিবিৰত তীব্ৰ প্ৰতিক্ৰিয়াৰ সৃষ্টি হৈছে।
নিলম্বনৰ খবৰ পোৱাৰ লগে লগে মঙলবাৰে সন্ধিয়া হাজো ব্লক কংগ্ৰেছৰ শতাধিক কৰ্মীয়ে হাজোৰ বৰুৱাবাৰীস্থিত ৰাজীৱ ভৱনত সমবেত হৈ এখন প্ৰতিবাদী সভা অনুষ্ঠিত কৰে।
হাজো ব্লক কংগ্ৰেছৰ সভাপতি জিতেন্দ্ৰ ভৰালীৰ সভাপতিত্বত অনুষ্ঠিত সভাত সাধাৰণ সম্পাদক মতিউৰ ৰহমানৰ লগতে বিভিন্ন দলীয় নেতা-কৰ্মীয়ে শীঘ্ৰে দুলু আহমেদৰ নিলম্বন প্ৰত্যাহাৰ কৰিবলৈ দাবী জনায়।
ইয়াৰ উপৰি সভাৰ অন্তত একাংশ ক্ষুব্ধ কংগ্ৰেছীয়ে ৰকিবুল হায় হায়, ৰকিবুলৰ ষড়যন্ত্ৰ নচলিব, দুলু আহমেদৰ নিলম্বন প্ৰত্যাহাৰ কৰক, দুলু আহমেদ জিন্দাবাদ আদি ধ্বনিৰে পৰিৱেশ উত্তাল কৰি তোলে।
দুলু আহমেদৰ সমৰ্থক সকলে ইমানতে ক্ষান্ত নাথাকি প্ৰাক্তন মন্ত্ৰী ৰকিবুল হুছেইনৰ প্ৰতিকৃতি দাহ কৰি নেতৃত্বই গ্ৰহণ কৰা সিদ্ধান্তৰ বিৰুদ্ধে ক্ষোভ উজাৰে।
উল্লেখ্য যে কিছুদিন পূৰ্বে মৰিয়নীৰ কংগ্ৰেছ বিধায়ক ৰূপজ্যোতি কুৰ্মী আৰু প্ৰাক্তন মন্ত্ৰী ৰকিবুল হুছেইনৰ সংঘাত স্পষ্ট হোৱাৰ সময়তে দুলু আহমেদে নাম প্ৰকাশ নকাৰকৈ ফেচবুকত ৰকিবুল হুছেইনৰ বিৰুদ্ধে কেতবোৰ তাৎপৰ্যপূৰ্ণ মন্তব্য কৰিছিল।
“সকলো কংগ্ৰেছ কৰ্মীয়ে খবৰ কৰক।নগাওঁৰ গঁড় হত্যাকাৰী জনৰ পিতৃ বাঙলাদেশৰ ঢাকাৰ হয়।পিতৃ যদি বাংলাদেশী, পুত্ৰ কি?দলৰ কথা কি চিন্তা কৰিব”, এয়া আছিল দুলু আহমেদৰ ২৬ জুলাইৰ বিতৰ্কিত পোষ্টটো।
এই পোষ্টৰ পিছৰে পৰা বিভিন্ন জনে দুলু আহমেদক সমৰ্থন কৰা পৰিলক্ষিত হৈছিল আৰু কংগ্ৰেছত তীব্ৰ প্ৰতিক্ৰিয়াৰো সৃষ্টি হৈছিল।
প্ৰদেশ কংগ্ৰেছৰ এজন সাধাৰণ সম্পাদকৰ দায়িত্বত থকা আহমেদে সামাজিক মাধ্যমত এনেধৰণৰ মন্তব্য প্ৰকাশ কৰি দলীয় অনুশাসন ভংগ কৰাৰ অভিযোগ উত্থাপন হয় আৰু যাৰ বাবে তেওঁক মঙলবাৰে নিলম্বন কৰা হয়।
