খেলপথাৰত ২২ জন খেলুৱৈ। সকলোৰে দৃষ্টি নিবদ্ধ এগৰাকী খেলুৱৈৰ ওপৰত। নিপুণ ক্ৰীড়াশৈলীৰ অভিনৱ প্ৰদৰ্শনেৰে বিপক্ষৰ খেলুৱৈৰ মাজেৰে আগলৈ বল ঠেলি আগুৱাই গৈছে এই বিশেষ খেলুৱৈগৰাকী। তাৰ পিছতে ‘মেজিকেল লেফ্ট ফুটে’ৰে নেটলৈ লক্ষ্য কৰি নান্দনিকভাৱে ঠেলি দিছে বল। অথবা গলবক্সৰ ভিতৰত থকা সতীৰ্থৰ ভৰিতে তুলি দিছে নিখুঁত পাছ! ইয়াৰ পিছতে চাৰিওফালে হৰ্ষোল্লাস! — ফুটবলৰ এই চিনাকি দৃশ্যৰ চমৎকাৰী নায়কজনৰ নাম লিঅ’নেল আন্দ্ৰেছ মেছি।
মাত্ৰ ১১ বছৰ বয়সতে Growth Hormone Deficiency ৰোগত ভুগিও ন উদ্যমেৰে বিশ্ব ফুটবলৰ সৰ্বশ্ৰেষ্ঠ তাৰকা হিচাপে প্ৰতিষ্ঠিত হৈ পৰা আৰ্জেণ্টিনাৰ এই মহান ফুটবলাৰগৰাকীয়ে গৰকিলে জীৱনৰ ৩৬ টা বসন্ত। বিশ্বৰ অগনণ ফুটবল অনুৰাগী, প্ৰাক্তন ফুটবলাৰ আৰু ফুটবল বিশেষজ্ঞৰ ভাষাত ‘এলিয়েন’ ‘G.O.A.T’ খ্যাত মেছিয়ে ৩৬ বছৰৰ পিছতো মোহাচ্ছন্ন কৰি ৰাখিছে ফুটবল প্ৰেমী সকলক।
জীৱনৰ ৩৫ টা বসন্ত অতিক্ৰমি ৩৬ লৈ আগবঢ়াৰ সময়তে বিশ্ব ফুটবলৰ পৰম আকাংক্ষিত ক্ষণৰ সোৱাদ দিলে মেছিয়ে। গত বৰ্ষৰ ১৮ ডিচেম্বৰত চিৰ আকাংক্ষিত, চিৰ প্ৰতীক্ষিত ক্ষণৰ দৰ্শক হ’ল বিশ্ব ফুটবল। ফিফাৰ স্বৰ্ণিল বিশ্বকাপ ট্ৰফীত প্ৰথমটো সফলতাৰ চুম্বন আঁকিলে মেছিয়ে। ধন্য হ’ল বিশ্বজুৰি ফুটবলৰ কৌটি কৌটি সমৰ্থক। এতিয়াও এই ক্ষণ বুকুত থাপি যেন সুখানুভূতিৰ স্বপ্ন দেখি আছে মেছি অনুৰাগীয়ে।
লা পুলগা খ্যাত এই মহাতাৰকাগৰাকীৰ জীৱনৰ কেইটামান বিশেষ মুহূৰ্তৰ ছবি চাওঁ আহক-
