মোদী চৰকাৰে শেহতীয়াকৈ এটা বিৰাট দেশপ্ৰেমমূলক পদক্ষেপ গ্ৰহণ কৰিছে। দেশবাসীৰ মাজত দেশপ্ৰেম জাগ্ৰত কৰি তুলিবলৈ প্ৰতি ঘৰে ঘৰে তিনি বৰণীয়া জাতীয় পতাকা উত্তোলন কৰিবলৈ আহ্বান জনাইছে। সেয়ে ঘৰে ঘৰে চৰকাৰৰ ফালৰ পৰা জাতীয় পতাকাও প্ৰদান কৰা হ’ব। এই পদক্ষেপক ‘হৰ ঘৰ ত্ৰিৰংগা’ হিচাপে প্ৰচাৰ কৰা হৈছে। নিশ্চয়কৈ ভাল পদক্ষেপ। ই নিশ্চয়কৈ দেশবাসীক জাতীয় চেতনাৰে উদ্ধুদ্ধ কৰিব। চাও আহক এই সন্দৰ্ভত এক বিশেষ প্ৰতিবেদন।
আজাদী কা অমৃত মহোৎসৱ অৰ্থাৎ স্বাধিনতাৰ ৭৫ বৰ্ষ উদযাপনৰ উপলক্ষে ভাৰত চৰকাৰৰ সাংস্কৃতিক মন্ত্ৰালয়ে এই পদক্ষেপ গ্ৰহণ কৰিছে। সেই অনুসৰি চৰকাৰে জাতীয় পতাকা বিলাব আৰু দেশবাসীয়ে ঘৰে ঘৰে ১৩ আগষ্টৰ পৰা ১৫ আগষ্টলৈকে জাতীয় পতাকা উত্তোলন কৰি ৰাখিব। প্ৰধানমন্ত্ৰী নৰেন্দ্ৰ মোদীয়ে এটা টুইটযোগে এই ‘হৰ ঘৰ ত্ৰিৰংগা’ আন্দোলনত সকলোকে ভাগ লবলৈ আহ্বান জনাইছে।
উল্লেখ্য যে স্বাধীন ভাৰতৰ চিৰপৰিচিত পতাকাখন পৰম্পৰাগতভাৱে খাদী কাপোৰেৰে প্ৰস্তুত কৰি অহা হৈছিল। কিন্তু মোদী চৰকাৰে এতিয়াৰে পৰা পলিষ্টাৰ কাপোৰেৰেও জাতীয় পতাকা প্ৰস্তুত কৰিব পাৰিব বুলি সিদ্ধান্ত লৈছে। সেয়ে ২০০২ চনৰ ফ্লেগ ক’ড (2002 Flag Code) সংশোধন কৰা হৈছে।
সেই ফ্লেগ ক’ডত জাতীয় পতাকাক কেৱল শিপিনীৰ হাতে বোৱা কাপোৰেৰে প্ৰস্তুত কৰাৰ কথা আছে। এই কাপোৰসমূহ হৈছে খাদী, কপাহী, ঊল আৰু পাটকাপোৰ। ফ্লেগ ক’ৰ্ডৰ সংশোধনক লৈ সেয়ে লৈ তীব্ৰ বিতৰ্কও হৈছে। বহুতে কৈছে যে প্ৰয়োগৰ ফলত দেশৰ গ্ৰাম্যাঞ্চলত বাস কৰা লাখ লাখ শিপিনীৰ জীৱিকা নষ্ট হ’ব।
এই শিপিনীসকলেই মূলতঃ জাতীয় পতাকা প্ৰস্তুত কৰি আহিছে। জানিব পৰা মতে, প’লিষ্টাৰ কাপোৰৰ অনুমতি দিয়াৰ পাছতে খাদী পতাকাৰ বজাৰখন কমি আহিছে। কপাহী, খাদী পতাকাৰ সমাদৰ কমি আহিছে।
সমগ্ৰ বিষয়টোক লৈ সৰৱ হৈ পৰিছে তৃণমূল কংগ্ৰেছৰ ৰাষ্ট্ৰীয় মুখপাত্ৰ সকেত গোখলে। গোখলেই টুইটাৰত ধাৰাবাহিকযোগে চৰকাৰৰ এই সিদ্ধান্তৰ আঁৰৰ কথাবোৰ ফাঁচ কৰি আহিছে। তেওঁ লিখিছে যে নিজৰ কৰ্পৰেট বন্ধুসকলক সহায় কৰিবলৈকে প্ৰধানমন্ত্ৰীয়ে ফ্লেগ ক’ড সংশোধন কৰিছে। ইয়াক তেওঁ potential scam হিচাপেও আখ্যা দিছে।
উল্লেখযোগ্য যে ভাৰতত প’লিষ্টাৰ কাপোৰৰ বজাৰখন আছে মুকেশ আম্বানীৰ ৰিলায়েন্স ইণ্ড্ৰাষ্টিজৰ দখলত। ভাৰতৰ উপৰিও সমগ্ৰ বিশ্ব জুৰি ৰিলায়েন্সে প’লিষ্টাৰৰ বজাৰত তীব্ৰ প্ৰতিদ্বন্দিতাত অৱতীৰ্ণ হৈ আছে। বছৰি ৰিলায়েন্সে ২.৫ মিলিয়ন টন প’লিষ্টাৰ প্ৰস্তুত কৰি আহিছে।
তৃণমূল কংগ্ৰেছৰ গোখলেৰ টুইটটোৰ পৰা স্পষ্ট হৈ পৰিছে যে প্ৰকৃততে মোদী চৰকাৰে কাক সহায় কৰিবলৈ উলাইছে! মোদী চৰকাৰে বিচাৰিছে যে জাতীয় পতাকাসমূহ পলিষ্টাৰেৰে নিৰ্মাণ হওক আৰু ইয়াৰ লাভ পাওক আম্বানীয়ে। পলিষ্টাৰৰ বজাৰত যাতে আম্বানীৰ লাভ অটুত থাকক, সেইবাবেই মোদী চৰকাৰে ফ্লেগ ক’ডৰ দৰে এটা সাংবিধানিক নিয়মাৱলীকে সংশোধন কৰি পেলালে।
তদুপৰি ৰাষ্ট্ৰীয়তাবাদ, দেশপ্ৰেমৰ নামতো এইদৰে নিজৰ পুঁজিপতি বন্ধুসকলক মুনাফা লুটাত সহযোগী হৈ পৰিছে। ‘হৰ ঘৰ ত্ৰিৰংগা’ নিঃসন্দেহে এক ভাল পদক্ষেপ। দেশৰ জাতীয় পতাকাখনৰ এক নিজস্ব গৰিমা আছে। প্ৰতিজন ভাৰতীয়ৰ গৌৰৱ দেশৰ ত্ৰিৰংগা।
কিন্তু এই ত্ৰিৰংগাক লৈয়েই মোদী চৰকাৰে জনচক্ষুৰ আঁৰত এই খেলা খেলি প্ৰকৃততে জনতাক বুৰ্বক বনাব বিচাৰিছে। দেশপ্ৰেমৰ নামতো এইদৰে পুঁজিপতিৰ লাভ-লোকচানক জড়িত কৰি মোদী চৰকাৰে নিজৰ পৰিচয় দাঙি ধৰিছে। এতিয়া ভাবক, আপুনি মই প’লিষ্টাৰেৰে নিৰ্মিত ত্ৰিৰংগা পতাকা উত্তোলন কৰি ‘ভাৰত মাতা কী জয়’ চিঞৰি দেশপ্ৰেমত উদ্ধুদ্ধ হ’ম, কিন্তু ইয়াৰ ফলত কোন লাভান্বিত হ’ব।
পূৰ্বে জাতীয় পতাকা প্ৰস্তুত কৰি গ্ৰাম্যাঞ্চলৰ দৰিদ্ৰ শিপিনীসকলে দুটকা ঘটিবলৈ সুযোগ পাইছিল, এতিয়া দেশৰ মাতৃস্বৰূপা শিপিনীসকলৰ মুখৰ ভাতখিনিও কাঢ়িবলৈ পদক্ষেপ লোৱা হৈছে। দেশপ্ৰেমৰ নামত এইসমূহ বেপাৰ নহয়নে?
