অলপতে আম আদমি পাৰ্টী ত্যাগ কৰি বিজেপিত যোগ দিয়া প্ৰাক্তন ভাৰতীয় ক্ৰিকেটাৰ হৰভজন সিঙে তেওঁৰ পুৰণি দলটোৰ বিৰুদ্ধে এক গুৰুতৰ অভিযোগ উত্থাপন কৰিছে। তেওঁ দাবী কৰিছে যে আম আদমি পাৰ্টীৰ শীৰ্ষ নেতৃত্বই মোটা টকাৰ বিনিময়ত পঞ্জাৱৰ ৰাজ্যসভাৰ আসনসমূহ বিক্ৰী কৰিছে। উল্লেখ্য যে অলপ দিন আগলৈকে হৰভজন সিং আপ দলতেই আছিল আৰু এই দলৰ টিকটৰেই তেওঁ সংসদলৈ নিৰ্বাচিত হৈছিল। কিন্তু বিজেপিত যোগ দিয়াৰ পিছৰে পৰা তেওঁ পুৰণি দলটোৰ বিৰুদ্ধে সৰৱ হৈ পৰিছে।
আচলতে আপ এৰি বিজেপিত যোগ দিয়াৰ পিছৰে পৰা হৰভজন সিঙে ছচিয়েল মিডিয়াত তীব্ৰ সমালোচনাৰ মুখামুখি হবলগীয়া হৈছে। বিৰোধী দলৰ সমৰ্থকসকলে তেওঁক তীব্ৰভাৱে আক্ৰমণ কৰিছে। শেহতীয়াকৈ এজন লোকে ছচিয়েল মিডিয়াত হৰভজনক প্ৰশ্ন কৰিছিল যে পঞ্জাৱত ৭০০ ৰ পৰা ৮০০ কৃষকৰ মৃত্যুৰ বাবে দায়ী বিজেপিত তেওঁ কিয় যোগ দিলে আৰু যোগ দিয়াৰ সময়ত ৰাজ্যসভাৰ আসনখন কিয় এৰি নিদিলে। আনকি আপ এৰি বিজেপিলৈ যোৱা সাংসদসকলক ২০ ৰ পৰা ২৫ কোটি টকাকৈ ঘোচ দিয়া হৈছে বুলিও সেই পোষ্টটোত অভিযোগ কৰা হৈছিল।
এই পোষ্টটোৰ উত্তৰ দি হৰভজন সিঙে ওলোটাই আপক হে আক্ৰমণ কৰে। তেওঁ কয় যে তেওঁক বিশ্বাসঘাটক বুলি কোৱাৰ আগতে নিজৰ নেতাসকলক সোধক যে পঞ্জাৱৰ ৰাজ্যসভাৰ আসনসমূহ বিক্ৰী কৰিবলৈ তেওঁলোকে কিমান টকা ঘোচ লৈছে। হৰভজনে স্পষ্টকৈ কয় যে যদি তেওঁলোকৰ নেতাসকলে এই কথা কব নোৱাৰে, তেন্তে সময় অহাত তেওঁ নিজেই সকলো প্ৰশ্নৰ উত্তৰ দিব আৰু কোনে কিমান টকা লৈছে সেয়া ফাদিল কৰিব। কেৱল ৰাজ্যসভাৰ আসনেই নহয়, আপে পঞ্জাৱৰ কেইবাটাও মন্ত্ৰী পদো টকাৰ বিনিময়ত বিক্ৰী কৰিছে বুলি তেওঁ বিস্ফোৰক দাবী কৰে।
আম আদমি পাৰ্টীৰ বিৰুদ্ধে টকাৰ বিনিময়ত টিকট বিক্ৰী কৰাৰ এই অভিযোগ অৱশ্যে নতুন নহয় আৰু বিজেপিয়ে ইয়াৰ আগতেও এই বিষয় লৈ বহুবাৰ প্ৰশ্ন উত্থাপন কৰিছে। কিন্তু এইবাৰ হৰভজন সিঙৰ এই দাবীক সাৰথি কৰি পঞ্জাৱত কংগ্ৰেছ দলো সৰৱ হৈ পৰিছে। কংগ্ৰেছ নেতা প্ৰতাপ সিং বাজৱাই কৈছে যে হৰভজনে কৰা এই অভিযোগ অত্যন্ত গুৰুতৰ আৰু ইয়াৰ উত্তৰ অৰবিন্দ কেজৰিৱাল আৰু ভগৱন্ত মানে দিবই লাগিব।
