হাৰিয়ানাৰ চনীপতত এক অতি ভয়ংকৰ আৰু চাঞ্চল্যকৰ ঘটনা সংঘটিত হৈছে। অফিচৰ কাম শেষ কৰি নিজৰ গাঁৱৰ ঘৰলৈ যাবলৈ বাহনৰ বাবে অপেক্ষা কৰি থকা এগৰাকী যুৱতীক তিনিজন যুৱকে ধৰ্ষণ কৰাৰ অভিযোগ উত্থাপন হৈছে। এই সমগ্ৰ ঘটনা পোহৰলৈ অহাৰ পিছতে আৰক্ষীয়ে ক্ষিপ্ৰতাৰে অভিযান চলাই এজন অভিযুক্তক গ্ৰেপ্তাৰ কৰিবলৈ সক্ষম হৈছে।
আৰক্ষীৰ সূত্ৰৰ পৰা জানিব পৰা মতে চনীপতৰ আইটিআই চকত এই ঘটনাটো সংঘটিত হৈছিল। ভুক্তভোগী যুৱতীগৰাকীয়ে অফিচৰ পৰা ওলাই ঘৰলৈ যাবলৈ ৰাস্তাৰ কাষত থিয় হৈ আছিল। সেই সময়তে এখন গাড়ীত তিনিজন যুৱক তেওঁৰ ওচৰলৈ আহে আৰু নিজকে একেখন গাঁৱৰে বাসিন্দা বুলি পৰিচয় দিয়ে। তেওঁলোকে যুৱতীগৰাকীক ঘৰত নমাই দিয়াৰ প্ৰস্তাৱ দিয়ে আৰু যুৱতীগৰাকীয়েও তেওঁলোকৰ কথা বিশ্বাস কৰি গাড়ীত উঠে।
অভিযোগ অনুসৰি গাড়ীৰ ভিতৰত যুৱককেইজনে যুৱতীগৰাকীক জোৰকৈ মদ খুৱাই দিয়ে। কিছু সময়ৰ পিছত যেতিয়া যুৱতীগৰাকী অচেতন হৈ পৰে তেতিয়া তিনিওজন যুৱকে মিলি তেওঁক ধৰ্ষণ কৰে। তাৰ পিছত অভিযুক্তকেইজনে যুৱতীগৰাকীক তেওঁৰ ঘৰৰ ওচৰত নমাই দি থৈ যায়। যেতিয়া যুৱতীগৰাকীৰ জ্ঞান ঘূৰি আহে তেতিয়া তেওঁ পৰিয়ালৰ লোকক সকলো কথা বিৱৰি কয় আৰু লগে লগে আৰক্ষী থানাত গোচৰ তৰা হয়।
এই ঘটনাৰ তদন্ত আৰম্ভ কৰি আৰক্ষীয়ে শনিবাৰে সুমিত নামৰ এজন অভিযুক্তক গ্ৰেপ্তাৰ কৰিবলৈ সক্ষম হয়। আৰক্ষী বিষয়া নিধি নয়নে জনোৱা মতে ধৃত যুৱকজনক জিম্মাত লৈ অধিক তথ্যৰ বাবে সোধা-পোছা চলাই থকা হৈছে। অৱশ্যে এই জঘন্য কাণ্ডৰ সৈতে জড়িত আন দুজন যুৱক বৰ্তমানো পলাতক হৈ আছে। আৰক্ষীয়ে তেওঁলোকক বিচাৰি উলিয়াবলৈ বিভিন্ন ঠাইত তালাচী চলাই আছে বুলি জানিব পৰা গৈছে।
