হাৰিয়ানাৰ যশবৰ্ধন দালালে ভাৰতীয় ক্ৰিকেটত এক নতুন অভিলেখ গঢ়ি তুলিছে। চি কে নাইডু ট্ৰফীত মুম্বাইৰ বিৰুদ্ধে ৪২৬ ৰানৰ অপৰাজিত ইনিংছ খেলিছে। তেওঁৰ বেটিঙৰ বাবে হাৰিয়ানাই ৮ উইকেটত ৭৩২ ৰান সংগ্ৰহ কৰে।
উত্তৰ প্ৰদেশৰ সমীৰ ৰিজভিয়ে যোৱা বছৰ চি কে নাইডু ট্ৰফীত ৩১২ ৰানৰ ইনিংছ খেলিছিল। সেইটোৱেই আছিল ২৩ বছৰ অনুৰ্ধৰ প্ৰতিযোগিতাৰ ইতিহাসত এজন বেটছমেনৰ ইনিংছত সৰ্বাধিক ৰান। শনিবাৰে যশবৰ্ধনে তেওঁৰ সেই অভিলেখ ভংগ কৰে। ৪২৬ ৰানৰ অপৰাজিত ইনিংছ খেলি তেওঁ এক নতুন কৃতিত্ব অৰ্জন কৰে।
হাৰিয়ানাৰ অ’পেনাৰগৰাকীয়ে ৪৬৩টা বলৰ ইনিংছত ৪৬টা চাৰি আৰু ১২টা ছয় মাৰে। কিন্তু হাৰিয়ানাই নিজৰ ইনিংছ ঘোষণা কৰা নাছিল। সেয়ে দেওবাৰে নিজৰ ইনিংছ আৰু আগুৱাই নিয়াৰ সুযোগ পাব যুৱ বেটছমেনগৰাকীয়ে।
যশবৰ্ধনৰ এই ইনিংছৰ বাবেই মেচখনত হাৰিয়ানা ভাল স্থানত আছে। দ্বিতীয় দিনৰ শেষত মুম্বাইৰ বিৰুদ্ধে তেওঁলোকৰ স্ক’ৰ আছিল ৮ উইকেটত ৭৩২ ৰান।
হাৰিয়ানাৰ আনজন অ’পেনাৰ আৰ্শ ৰাংগাই ১৫১ ৰান সংগ্ৰহ কৰে। তেওঁৰ ৩১১টা বলৰ ইনিংছত ১৮টা চাৰি আৰু ১টা ছয় আছিল। প্ৰথম উইকেটৰ অংশীদাৰিত্বত আৰ্শ আৰু যশবৰ্ধনে ৪১০ ৰান সংগ্ৰহ কৰে। দলৰ বাকী বেটছমেনৰ কোনো এজনেও অৰ্ধশতক অৰ্জন কৰিব নোৱাৰিলে। মুম্বাইৰ সফল বলাৰ অথৰ্ব ভোছলেই ১৩৫ ৰানত ৫ টা উইকেট দখল কৰে।
