ক’ৰ’না ভাইৰাছৰ সংক্ৰমণৰ সময়ত জনসাধাৰণক খবৰ দিয়াৰ স্বাৰ্থত নিজৰ জীৱনকো তুচ্ছ কৰি কাম কৰি থকা সাংবাদিক সকলৰ বাবে বীমাৰ সুবিধা ঘোষণা কৰিছে হাৰিয়ানাৰ বিজেপি নেতৃত্বাধীন ৰাজ্য চৰকাৰে।
হাৰিয়ানাৰ মুখ্য মন্ত্ৰী মনোহৰলাল খট্টৰে বৃহস্পতিবাৰে তেওঁৰ চৰকাৰে ক’ৰ’নাৰ সংক্ৰমণৰ সময়ত কাম কৰি থকা প্ৰতিগৰাকী ৰিপোৰ্টাৰলৈ ১০ লাখ টকাৰ বীমা সুবিধা আগবঢ়োৱাৰ সিদ্ধান্ত লোৱাৰ কথা ঘোষণা কৰে।
হাৰিয়ানাত বৰ্তমানলৈ ২৭০ গৰাকী ব্যক্তি ক’ৰ’নাত আক্ৰান্ত হোৱাৰ বিপৰীতে তিনি গৰাকী ব্যক্তিৰ ক’ৰ’না ভাইৰাছৰ সংক্ৰমণৰ ফলত মৃত্যু হৈছে।
উল্লেখযোগ্য যে, ভাৰতত বহু কেইগৰাকী কৰ্তব্যৰত সাংবাদিক ক’ৰ’নাৰ দ্বাৰা আক্ৰান্ত হৈছে।
দিল্লী চৰকাৰৰ লগতে অসম চৰকাৰেও সাংবাদিক সকলৰ বাবে বিনামূলীয়া ক’ৰ’না পৰীক্ষাৰ সুবিধা কৰি দিছে।
উল্লেখযোগ্য যে, কেন্দ্ৰ চৰকাৰৰ লগতে বহু ৰাজ্য চৰকাৰে চিকিৎসা কৰ্মীকে ধৰি আৰক্ষীৰ লোক সকললৈ স্বাস্থ্য বীমা ঘোষণা কৰিছিল।
