এন আৰ চিৰ কামৰ অজুহাতত চৰকাৰে পিছুৱাই থকা ৰাজ্যৰ পঞ্চায়ত নিৰ্বাচন অহা ১৫ জানুৱাৰিৰ ভিতৰত পাতিবলৈ নতুনকৈ চূড়ান্ত সময়সীমা বান্ধি দিছে গুৱাহাটী উচ্চ ন্যায়ালয়ে। ৯ অক্তোবৰত গুৱাহাটী উচ্চ ন্যায়ালয়ে ৰাজ্য চৰকাৰক এই নিৰ্দেশটো দিয়ে।
উল্লেখযোগ্য যে যোৱা ১৯ ফেব্ৰুৱাৰিতে বৰ্তমানৰ পঞ্চায়ত প্ৰতিনিধিসকলৰ কাৰ্য্যকাল অন্ত পৰিছে যদিও তেওঁলোকেই এই পৰ্য্যন্ত কাম চলাই নিছে।
আনহাতে ৰাজ্য চৰকাৰক পূৰ্বেও পঞ্চায়ত নিৰ্বাচন পাতিবলৈ সময় ধৰি দিছিল গুৱাহাটী উচ্চ ন্যায়ালয়ে। চৰকাৰে ঘাইকৈ এন আৰ চিত ৰাজ্য চৰকাৰৰ প্ৰায় ৫০ হাজাৰ কৰ্মচাৰী ব্যস্ত থকাৰ অজুহাতত পঞ্চায়ত নিৰ্বাচন পিছুৱাই আহিছিল।
২৯ মে’ত উচ্চ ন্যায়ালয়ে এটা নিৰ্দেশত ৰাজ্য চৰকাৰক ১৫ ছেপ্তেম্বৰৰ ভিতৰত পঞ্চায়ত নিৰ্বাচন পাতিবলৈ আদেশ দিছিল। কিন্তু চৰকাৰে পুনৰ সেই সময়সীমা বৃদ্ধি কৰিবলৈ আৱেদন জনাইছিল ন্যায়ালয়ত।
এই আৱেদনৰ ৯ অক্তোবৰত শুনানি লৈ সকলো কথা চালি-জাৰি চাই ন্যায়ালয়ে পঞ্চায়ত নিৰ্বাচন অনুষ্ঠিত কৰাৰ চূড়ান্ত সময়সীমা পুনৰ ধৰি দিয়ে চৰকাৰক। সেই অনুসৰি ১৫ জানুৱাৰিৰ ভিতৰত পঞ্চায়ত নিৰ্বাচনৰ সকলো প্ৰক্ৰিয়া সম্পূৰ্ণ কৰিব লাগিব চৰকাৰে।
ইয়াৰ লগতে ন্যায়ালয়ে চৰকাৰক পঞ্চায়ত নিৰ্বাচনৰ বাবে পুনৰ সময় বিচাৰিব নোৱাৰিব বুলি কঠোৰভাৱে জনাই দিয়ে।