এ পি এছ চিৰ কেলেংকাৰিৰ গোচৰত শুকুৰবাৰে পুনৰ তিনি অভিযুক্ত ৰাজপত্ৰিত বিষয়াৰ জামিন গুৱাহাটী উচ্চ ন্যায়ালয়ে মঞ্জুৰ কৰে। নিশামণি ডেকা, পল্লৱী শৰ্মা চৌধুৰীৰ আৰু অলপতে গ্ৰেপ্তাৰ হোৱা এ চি এছ বিষয়া উৎপল ভূঞাৰ জামিন আবেদন ন্যায়ালয়ে মঞ্জুৰ কৰিছে।
উল্লেখযোগ্য যে নিশামণি ডেকা আৰু পল্লৱী শৰ্মা চৌধুৰী গ্ৰেপ্তাৰ হৈ বৰ্তমান জে’লত থকা ক্ৰমে বিকাশ কুমাৰ পিঞ্চা আৰু সুৰজিৎ চৌধুৰীৰ পত্নী। ন্যায়পালিকাক মেনেজ কৰাৰ প্ৰচেষ্টা চলোৱাৰ অভিযোগত সাঙোৰ খাই পৰা বিতৰ্কিত ব্যৱসায়ী সুৰজিৎ চৌধুৰীৰ লগতে এই অভিযোগত কৰ বিষয়া বিকাশ পিঞ্চাও আনকি সাঙোৰ খাই পৰিছিল।
আনহাতে, যোৱা কেইদিনত ধাৰাবাহিকভাৱে চৰ্তসাপেক্ষে ৪১জন ৰাজপত্ৰিত বিষয়াৰ জামিন মঞ্জুৰ কৰা উচ্চ ন্যায়ালয়ে অভিযুক্ত ৰাজপত্ৰিত বিষয়া জয়দেৱ মহন্ত আৰু ন্যায়পালিকাক মেনেজৰ অভিযোগত গ্ৰেপ্তাৰ হোৱা অধিবক্তা শৈলেন শৰ্মা বৰুৱাৰ জামিন আৱেদন নাকচ কৰে।
ইপিনে, এ পি এছ চিৰ বহু বিতৰ্কিত অপসাৰিত অধ্যক্ষ ৰাকেশ পালৰ মুক্তি পুনৰ অনিশ্চয়তাৰ দিশে গতি কৰিছে। ভঙাগড় থানাৰ কৃষি বিষয়া নিযুক্তি কেলেংকাৰিৰ ১৫৯/১৭ নম্বৰ গোচৰত শুকুৰবাৰে পালৰ জামিন আৱেদনৰ শুনানিৰ দিন আছিল যদিও আদালতে এই আৱেদনৰ শুনানি লৈ অহা ৩০ অক্টোবৰত এই গোচৰৰ শেহতীয়া কেছ ডায়েৰী দাখিলৰ নিৰ্দেশ জাৰি কৰে।
ইপিনে, শেহতীয়াকৈ ৰাকেশ পালৰ বিৰুদ্ধে চি আই ডিয়েও উৎকোচৰ আন এক গোচৰ ৰুজু কৰিছে আৰু এই গোচৰত ৰাকেশ পালক অচিৰেই পুনৰ গ্ৰেপ্তাৰ কৰাটো নিশ্চিত হৈ পৰিছে। সেয়েহে এটা গোচৰত জামিনৰ সম্ভাৱনা থাকিলেও আন এটা গোচৰত ৰাকেশ পালৰ কাৰাবন্দী জীৱন অব্যাহত থকাটো প্ৰায় নিশ্চিত।
