ভাৰতত সলনি হোৱা জীৱনশৈলী, মানসিক চাপ, বেয়া খাদ্যাভ্যাস আৰু শাৰীৰিক পৰিশ্ৰমৰ অভাৱ এতিয়া এক গভীৰ স্বাস্থ্য সংকট হৈ পৰিছে। শেহতীয়াকৈ প্ৰকাশ পোৱা এক চৰকাৰী প্ৰতিবেদন অনুসৰি দেশত সৰ্বাধিক বত্ৰিছ দশমিক এক শতাংশ মৃত্যু কেৱল হৃদৰোগৰ বাবেই হৈছে। অৰ্থাৎ প্ৰতি তিনিজন ব্যক্তিৰ ভিতৰত এজনৰ মৃত্যু হৈছে কেৱল হৃদৰোগৰ ফলত। প্ৰতিবেদনখনত এইটোও প্ৰকাশ পাইছে যে উত্তৰ ভাৰতত এই অৱস্থা আটাইতকৈ বেছি উদ্বেগজনক। বিশেষজ্ঞসকলে সতৰ্ক কৰি দিছে যে যদি সময়মতে সজাগতা আৰু প্ৰতিৰোধৰ ব্যৱস্থা গ্ৰহণ কৰা নহয়, তেন্তে আগন্তুক সময়ত এই সংকট অধিক ভয়াবহ হৈ পৰিব পাৰে।
প্ৰতিবেদন অনুসৰি উত্তৰ ভাৰতত হৃদৰোগত আক্ৰান্ত হৈ মৃত্যু হোৱা লোকৰ হাৰ পঁয়ত্ৰিছ দশমিক এক শতাংশ হোৱাৰ বিপৰীতে মধ্য ভাৰতত এই হাৰ চৌবিছ দশমিক এক শতাংশ। চিকিৎসকসকলৰ মতে, অহৰহ মানসিক চাপ, ধূমপান, মদ্যপান, জাংক ফুড, মেদবহুলতা আৰু ব্যায়ামৰ অভাৱেই ইয়াৰ প্ৰধান কাৰণ। আজিকালি কম বয়সৰ লোকসকলৰ মাজতো ৰক্তচাপ আৰু ডায়েবেটিছৰ সমস্যা দ্ৰুতগতিত বৃদ্ধি পাইছে, যাৰ পোনপটীয়া প্ৰভাৱ হৃদয়ৰ ওপৰত পৰিছে। বিশেষজ্ঞসকলৰ মতে, কেৱল চহৰতে নহয়, এতিয়া গাঁওবোৰতো হৃদৰোগ দ্ৰুতগতিত বিয়পিবলৈ ধৰিছে আৰু কম বয়সীয়া যুৱক-যুৱতীসকলো ইয়াৰ বলি হৈছে।
হৃদৰোগৰ উপৰিও আন বহুতো গুৰুতৰ ৰোগ মৃত্যুৰ প্ৰধান কাৰণ হিচাপে চিহ্নিত হৈছে। উশাহ-নিশাহজনিত ৰোগত ছয় শতাংশ, পাচন তন্ত্ৰৰ ৰোগত পাঁচ দশমিক ন শতাংশ আৰু শ্বাস-প্ৰশ্বাসৰ সংক্ৰমণত পাঁচ দশমিক সাত শতাংশ লোকৰ মৃত্যু হৈছে। আনহাতে, ডায়েবেটিছ বা বহুমূত্ৰ ৰোগত মৃত্যু হোৱা লোকৰ সংখ্যাও দ্ৰুতগতিত বৃদ্ধি পাইছে আৰু দক্ষিণ ভাৰতত ইয়াৰ প্ৰভাৱ আটাইতকৈ বেছি। ইয়াৰ উপৰিও অচিনাক্ত জ্বৰ, আঘাত আৰু যক্ষ্মা ৰোগকো মৃত্যুৰ অন্যতম কাৰণ হিচাপে উল্লেখ কৰা হৈছে।
পুৰুষ আৰু মহিলাৰ মাজত ৰোগৰ প্ৰভাৱৰ ক্ষেত্ৰতো যথেষ্ট পাৰ্থক্য দেখা গৈছে। পাচন তন্ত্ৰৰ ৰোগত পুৰুষৰ মৃত্যুৰ হাৰ মহিলাতকৈ বহু বেছি। বিশেষজ্ঞসকলৰ মতে, পুৰুষৰ মাজত ধূমপান, মদ্যপান আৰু মানসিক চাপ বেছি হোৱাৰ বাবে ৰোগৰ আশংকা বৃদ্ধি পায়। আনহাতে, উন্নত চিকিৎসা সেৱা আৰু টীকাকৰণৰ বাবে কম বয়সত হোৱা মৃত্যুৰ হাৰ হ্ৰাস পাইছে যদিও জীৱনশৈলীৰ লগত জড়িত ৰোগসমূহ ভৱিষ্যতৰ বাবে এক ডাঙৰ ভাবুকি হৈ পৰিছে। এই ভয়াবহ পৰিস্থিতিৰ পৰা হাত সাৰিবলৈ বিশেষজ্ঞসকলে সকলোকে নিয়মীয়া স্বাস্থ্য পৰীক্ষা কৰোৱা, সন্তুলিত আহাৰ গ্ৰহণ কৰা, ব্যায়াম কৰা আৰু মানসিক চাপ হ্ৰাস কৰাৰ ওপৰত গুৰুত্ব আৰোপ কৰিছে।
