অৱশেষত স্বামী ধৰ্মেন্দ্ৰৰ স্বাস্থ্য সন্দৰ্ভত প্ৰচাৰ হৈ থকা একাধিক ভুৱা বাতৰি সন্দৰ্ভত মাত মাতিছে প্ৰবীণ অভিনেত্ৰী হেমা মালিনীয়ে। ৮৯ বছৰীয়া তাৰকাগৰাকীৰ মৃত্যুৰ উৰাবাতৰি অস্বীকাৰ কৰি হেমাই এক্সত (পূৰ্বৰ টুইটাৰ) এই ভুল তথ্য বিয়পি পৰাত ক্ষোভ আৰু হতাশা প্ৰকাশ কৰে।
হেমা মালিনীয়ে লিখিছে, ‘যিটো হৈছে সেয়া ক্ষমাৰ অযোগ্য! চিকিৎসাৰ প্ৰতি সঁহাৰি জনাই সুস্থ হৈ উঠা এজন ব্যক্তিৰ বিষয়ে দায়িত্বশীল চেনেলসমূহে কেনেকৈ মিছা বাতৰি প্ৰচাৰ কৰিব পাৰে? এইটো অত্যন্ত অসন্মানজনক আৰু দায়িত্বহীন। অনুগ্ৰহ কৰি পৰিয়ালটোক আৰু তেওঁলোকৰ গোপনীয়তাৰ প্ৰয়োজনীয়তাক সন্মান কৰক।’
যোৱা নিশা আৰু আজি পুৱাও বিয়পি পৰা উৰাবাতৰিয়ে অনুৰাগী তথা চলচ্চিত্ৰ জগতৰ মাজত ব্যাপক উদ্বেগৰ সৃষ্টি কৰে। অৱশ্যে ধৰ্মেন্দ্ৰৰ পৰিয়ালে সত্যটো স্পষ্ট কৰিবলৈ খৰখেদাকৈ আগবাঢ়ি আহিলে।
তেওঁৰ কন্যা এষা দেওলেও ইনষ্টাগ্ৰামত এক কঠোৰ বিবৃতিত ভিত্তিহীন বাতৰি প্ৰচাৰ কৰা সংবাদ মাধ্যমক তীব্ৰ সমালোচনা কৰে। তেওঁ লিখিছে, “সংবাদ মাধ্যমে যেন অতিমাত্ৰা সক্ৰিয় হৈ উঠিছে আৰু ভুৱা বাতৰি বিয়পাইছে। মোৰ দেউতা সুস্থিৰ আৰু সুস্থ হৈ উঠিছে। আমি সকলোকে অনুৰোধ কৰিছো যে আমাৰ পৰিয়ালক গোপনীয়তা ৰক্ষা কৰিবলৈ দিয়ক। মোৰ দেউতাৰ আশু আৰোগ্যৰ বাবে আপোনালোকৰ প্ৰাৰ্থনাৰ বাবে ধন্যবাদ।”
এষাই অনুৰাগীসকলক লগতে আশ্বস্ত কৰে যে ধৰ্মেন্দ্ৰ চিকিৎসাধীন হৈ আছে আৰু সুস্থিৰ। স্বাস্থ্যৰ অৱনতি ঘটাৰ বাবে কালি (১০ নৱেম্বৰ) মুম্বাইৰ ব্ৰিচ কেণ্ডি হাস্পতালত ভৰ্তি হোৱা প্ৰবীণ অভিনেতাগৰাকী চিকিৎসকৰ তীক্ষ্ণ পৰ্যবেক্ষণত আছে।
মঙলবাৰে পুৱা এষা আৰু হেমা মালিনী দুয়োগৰাকীয়ে নিশ্চিত কৰিছে যে ধৰ্মেন্দ্ৰ জীয়াই আছে আৰু সুস্থ হৈ উঠিছে। জনসাধাৰণ আৰু সংবাদ মাধ্যমক এই সময়ত দায়িত্বশীল আচৰণ কৰিবলৈ আৰু পৰিয়ালৰ গোপনীয়তাক সন্মান কৰিবলৈ অনুৰোধ জনাইছে।
