ধন সৰবৰাহৰ গোচৰত বুধবাৰে কেন্দ্ৰীয় তদন্তকাৰী সংস্থা এনফ’ৰ্চমেণ্ট ডাইৰেক্টৰেটে কালি গ্ৰেপ্তাৰ কৰে ঝাৰখণ্ডৰ মুখ্যমন্ত্ৰী হেমন্ত ছোৰেনক।
ইয়াৰ পিছতে আজি গ্ৰেপ্তাৰক প্ৰত্যাহ্বান জনাই উচ্চতম ন্যায়ালয়ৰ কাষ চাপে প্ৰাক্তন মুখ্যমন্ত্ৰীগৰাকী।
ছোৰেনৰ হৈ উচ্চতম ন্যায়ালয়ৰ সন্মুখত আবেদন উত্থাপন কৰে জ্যেষ্ঠ অধিবক্তা কপিল ছিবালে।
ভাৰতৰ মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত তিনিজনীয়া বিচাৰপীঠে শুকুৰবাৰে শীৰ্ষ আদালতত ছোৰেনৰ আবেদনৰ শুনানি গ্ৰহণ কৰিব।
উল্লেখ্য যে বুধবাৰে ভূমি জালিয়াতিৰ তথা ধন সৰবৰাহৰ অভিযোগত সাত ঘণ্টাৰো অধিক সময়ৰ জেৰাৰ পিছত ছোৰেনক গ্ৰেপ্তাৰ কৰে এনফ’ৰ্চমেণ্ট ডাইৰেক্টৰেটে।
গ্ৰেপ্তাৰৰ পূৰ্বে তেওঁ মুখ্যমন্ত্ৰী পদৰ পৰা পদত্যাগ পত্ৰ দাখিল কৰে। লগতে এক ভিডিঅ’ বাৰ্তা যোগে তেওঁ ‘মই মূৰ নোদোৱাওঁ, শেষত সত্যৰ জয় হ’ব বুলি মন্তব্য কৰে।
দৰিদ্ৰ, দলিত আৰু আদিবাসীক অত্যাচাৰ কৰা সামন্তীয় ব্যৱস্থাৰ বিৰুদ্ধে যুদ্ধ চলোৱাৰ সময় আহি পৰিছে বুলিও তেওঁ ভিডিঅ’ বাৰ্তাটোত উল্লেখ কৰে।
ছোৰেনে লগতে ধন সৰবৰাহৰ গোচৰৰ সৈতে তেওঁৰ কোনো সম্পৰ্ক নাই বুলি দাবী কৰে।
ছোৰেনৰ পদত্যাগৰ পিছতে দলৰ জ্যেষ্ঠ নেতা তথা ৰাজ্যৰ পৰিবহণ মন্ত্ৰী চম্পাই ছোৰেনক মুখ্যমন্ত্ৰী হিচাপে নিযুক্তি দিয়া হয়।
